ގިރާވަރު ފަޅުގެ މަސައްކަތް ހުއްޓިފައި އޮންނަތާ ދުވަސްތަކެއް ވެއްޖެ ކަމަށާއި އެ މަޝްރޫއު ހުއްޓިފައި ވަނީ އެ ފަޅު ހިއްކާ ކުންފުންޏަށް މިދިޔަ އަހަރުގެ އޮކްޓޯބަރު މަހު ދައުލަތުން ދޭން ޖެހޭ ފައިސާގެ ބޮޑު ޕޭމަންޓެއް ނުދައްކައި އޮތުމުން ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް ރޭ ވިދާޅުވެއްޖެ އެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން މުއްތަލިބް ވިދާޅުވީ މާލޭގެ ރައްޔިތުންނަށް ގޯތި ދިނުމަށް މިދިޔަ ސަރުކާރުން ހިއްކަން ފެށި ގިރާވަރު ފަޅުގެ މަޝްރޫއަކީ މިހާތަނަށް އެންމެ ބޮޑު ހަރަދެއް ކޮށްގެން ހިއްކާ ފަޅު ކަމަށެވެ. އަދި އެ ފަޅުން 160 ހެކްޓަރުގެ ބިން ހިއްކަން ހަމަޖެހިފައިވާއިރު އެ މަޝްރޫއު ހުއްޓިފައި އޮންނަތާ މިހާރު ދުވަސްކޮޅެއް ވެއްޖެ ކަމަށް އޭނާ ވިދާޅުވި އެވެ.
"މިހާރު މަސައްކަތް ހުއްޓިފައި އޮތް އެންމެ ބޮޑު ސަބަބަކީ ދައުލަތުން ކޮންޓްރެކްޓާ އަށް ދައްކަންޖެހޭ ފައިސާގެ ޑިލޭއެއް، އެއީ މިދިޔަ އަހަރު ސެޕްޓެމްބަރު/އޮކްޓޯބަރު ހިސާބުގައި ލާފައި އޮތް ބިލަކަށް ޕޭމަންޓް ނުލިބިގެން ޑިލޭއެއް އައިސްފައި ވަނީ،" މުއްތަލިބް ވިދާޅުވި އެވެ.
މުއްތަލިބު ވިދާޅުވީ ދައްކަންޖެހިފައި އޮތީ ބޮޑު އަދަދެއް ކަމަށާއި އެ ފައިސާ ވީހާ ވެސް އަވަހަކަށް ހަމަޖައްސައި މަޝްރޫއު އަލުން ފަށައިގެން ކުރިއަށް ގެންދެވޭތޯ ސަރުކާރުން މަސައްކަތް ކުރަމުން އަންނަ ކަމަށެވެ. ނަމަވެސް، އެ ބިލަށް ދައްކަންޖެހެނީ ކިހާ އަދައެއްގެ ފައިސާއެއް ކަމެއް މިނިސްޓަރު ވިދާޅެއް ނުވެ އެވެ.
ގިރާވަރު ފަޅުން 50 ހެކްޓަރުގެ ބިން މިހާރު ހިއްކާ ނިމިއްޖެ އެވެ. މިނިސްޓަރު ވިދާޅުވީ ގިރާވަރުގެ ބިން ހިއްކުމުގެ މަޝްރޫއު ނިންމައި ގުޅިފަޅާ އެއްގޮތަށް އެ ތަނަށް ބޭނުންވާ އަސާސީ ވަސީލަތްތައް ގާއިމުކުރުމަކީ ސަރުކާރުން އެންމެ ބޮޑު އިސްކަމެއް ދޭ އެއް ކަންތައް ކަމަށެވެ.
މުއްތޮލިބު އިތުރަށް ވިދާޅުވީ ގިރާވަރުފަޅުގެ މަގުތައް ހެދުމަށާއި އަސާސީ ހިދުމަތްތައް ގާއިމްކުރަން ކުންފުނިތަކުން ޝައުގުވެރިކަން ފާޅުކޮށްފައި އެބަހުރި ކަމަށާއި އެކަމުގެ އެއްބަސްވުންތައް ވެސް ވަރަށް އަވަހަށް ސޮއިކުރެވިގެންދާނެ ކަމަށެވެ.
ގުޅީފަޅު ހިއްކުމާއި ގިރާވަރުފަޅު ހިއްކުމުގެ މަސައްކަތް ފެށީ ކުރީ ސަރުކާރުގަ އެވެ.
އޭރު އެ ސަރުކާރުން ފެށި މަޝްރޫއުތަކުގައި އޮތީ ގުޅީފަޅުން 150 ހެކްޓަރު އަދި ގިރާވަރުފަޅުން 169 ހެކްޓަރު ހިއްކާށެވެ. ފަހުން މި ސަރުކާރުން ވަނީ ގުޅީފަޅަށް 85 ހެކްޓަރުގެ ބިން އަދި ގިރާވަރުފަޅަށް 50 ހެކްޓަރުގެ ބިން އިތުރުކުރަން ނިންމާފައިވާކަން އިއުލާންކޮށްފަ އެވެ. އެކަމަކު މި މަސައްކަތް އަދި ހަވާލުކުރި ކަން ސާފެއް ނޫނެވެ.
