ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ ހިޔާ ފްލެޓް މަޝްރޫއު ކުރިއަށްގެންދިޔަ ޗައިނާ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަން (ސީއެސްސީއީސީ) އިން ރަސްމާލޭގައި 15،000 ހައުސިން ޔުނިޓް އަޅަން ހުށަހަޅާފައިވާ ކަމަށް ސަރުކާރުން ބުނެފި އެވެ.
ރައީސް އޮފީހުގައި އިއްޔެ ބޭއްވި ޕްރެސް ބްރީފިންގައި އެ އޮފީހުގައި ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ ސީއެސްސީއީސީ އިން އެކަމަށް ޝައުގުވެރިކަން ފާޅުކޮށް ސަރުކާރަށް ޕްރޮޕޯސަލެއް ހުށަހަޅާފައިވާ ކަމަށެވެ.
އަދި އެ ޕްރޮޕޯސަލް އާ ގުޅިގެން ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ ގުޅިގެން އެ މަޝްރޫއުގެ އަގާއި ކޮޮލިޓީއާއި ގުޅުން ގުޅުންހުރި ކަންތައްތަކުގައި "ނެގޯޝިއޭޓް" ކުރަން ފެންނަ ކަމަށް އިކޮނޮމިކް ކައުންސިލުން ނިންމާފައިވާ ކަމަށް ނާޒިމް ވިދާޅުވި އެވެ.
ސީއެސްސީއީސީ އަކީ ދުނިޔޭގެ އެންމެ ބޮޑު އިންވެސްޓްމަންޓް އަދި ކޮންސްޓްރަކްޝަން ކުންފުނިތަކުގައި ގުނާލެވޭ ކުންފުންޏެކެވެ. ހިޔާ މަޝްރޫއަކީ އެކުންފުނިން ރާއްޖޭގައި ހިންގި ފުރަތަމަ މަޝްރޫއެެވެ. ރައީސް ޑރ. މުއިއްޒު ހައުސިން މިިނިސްޓަރަކަށް ހުންނަވައިގެން ފެށި ހިޔާ މަޝްރޫއާ ގުޅޭގޮތުން ހަދާފައިވާ އޮޑިޓް ރިޕޯޓުން އެނގޭ ގޮތުގައި ހިޔާ މަޝްރޫއު ކުރިއަށްގެންދިއުމަށް އެދި ފަސް ކުންފުންޏަކުން ޕްރޮޕޯސަލް ހުށަހެޅި އިރު ސީއެސްސީއީސީ އަކީ އެމަޝްރޫއަށް އެންމެ ބޮޑު އަގެއް ހުށަހެޅި ކުންފުންޏެވެ.
މި ސަރުކާރުގެ ހައުސިންގެ ބިޔަ މަޝްރޫއުކަމަށްވާ ރަސްމާލެ މަޝްރޫއު ކުރިއަށްގެންދިއުމަށް ކ. ފުށިދިއްގަރު ފަޅުން 1،153 ހެކްޓަރުގެ ބިން ހިއްކުމުގެ މަސައްކަތް މިހާރު ވަނީ ފަށައިފަ އެވެ.
