ދޯހާ، ގަތަރު (ޖެނުއަރީ 28) - އޭޝިއަން ކަޕްގެ ގަދަ 16 ބުރުގައި މިރޭ ޔުނައިޓެޑް އަރަބް އެމިރޭޓްސް (ޔޫއޭއީ)އާ ދެކޮޅަށް ނުކުންނައިރު، މުބާރާތުގައި މިހާތަނަށް ވެސް ލިބުނީ ކާމިޔާބު ކަމަށް ނިންމައި، އަވަހަށް ގެއަށް ދިއުމުގެ ވިސްނުމެއް ނުގެންގުޅޭ ކަމަށް ތަޖިކިސްތާންގެ ކޯޗު ޕީޓަ ސެގާޓް ބުނެފި އެވެ.
ކްރޮއޭޝިއާ އަށް ނިސްބަތްވާ ސެގާޓް ވަނީ މީގެ ކުރިން ދިވެހިރާއްޖޭގެ ގައުމީ ފުޓްބޯޅަ ޓީމާއި އަފްގާނިސްތާން ޓީމަށް ކޯޗުކޮށްދީފަ އެވެ. އެ ގޮތުން، އަފްގާނިސްތާނާ އެކު، 2015 ވަނަ އަހަރުގެ ސާފް ޗެމްޕިއަންޝިޕްގެ ރަނަރަޕަށް ދިޔަ، ސެގާޓް ވަނީ، 2018 ވަނަ އަހަރު ރާއްޖެ އަށް ސާފް ޗެމްޕިއަންޝިޕް ކާމިޔާބުކޮށްދީފަ އެވެ.
ރާއްޖޭގެ ކޯޗުކަމުން، 2019 ވަނަ އަހަރުގެ ސައުތު އޭޝިއަން ގޭމްސް އަށް ފަހު ވަކިކުރި ސެގާޓް، ތަޖިކިސްތާނާ ހަވާލުވީ، 2022 ވަނަ އަހަރު ޖެނުއަރީ މަހު އެވެ.
މި ފަހަރުގެ އޭޝިއަން ކަޕުން ތަޖިކިސްތާން ފުރުސަތު ހޯދިއިރު، މިއީ މިހާތަނަށް ތަޖިސްތާނުން މި ލެވަލްގެ މުބާރާތެއްގައި ކުޅޭ ފުރަތަމަ ފަހަރެވެ. ފުރަތަމަ ފަހަރު ވެސް ސެގާޓް މި ވަނީ، ތަޖިކިސްތާން ނޮކައުޓް ބުރަށް ގެންގޮސްދީފަ އެވެ.
ތައިލެންޑްގައި 2022 އަހަރު ބޭއްވި ކިންގްސް ކަޕާއި މިދިޔަ އަހަރު މެލޭޝިއާގައި ބޭއްވި މަރެޑެކޭ މުބާރާތުގެ ޗެމްޕިއަންކަން ތަޖިކިސްތާނަށް ހޯދައިދިން ސެގާޓް ބުނީ، އޭނާ ދެކޭ ގޮތުގައި މި ފަހަރުގެ އޭޝިއަން ކަޕްގައި އަދިވެސް އެ ޓީމަށް ކުރިއަށްދެވިދާނެ ކަމަށެވެ.
"ގްރޫޕް ސްޓޭޖް ވަރަށް ފުރިހަަމަ ކޮށްދިޔައީ، އެކަމަކު އަދިވެސް ކުރިއަށްދާން ބޭނުންވަނީ. އަހަންނަށް ގޮސް ކުޅުންތެރިން ކައިރިއަކު ނުބުނެވޭނެ. އަހަރެމެން މި އޮތީ މި ހިސާބަށް ވެސް އާދެވިފައޭ. އެހެންވީމަ ދެން ގެއަށް ދިއުން ވެސް ރަނގަޅުވާނެއޭ. އަހަރެން މި ހުރީ އަދި ވެސް އަޒުމުތަކެއް އޮވެގެން،" މި ފަހަރުގެ ގްރޫޕް ސްޓޭޖުގައި، ޗައިނާއާ އެއްވަރުކޮށް، ލެބަނަން އަތުން ތަޖިކިސްތާން މޮޅުކޮށްދިން ސެގާޓް ބުންޏެވެ.
ސެގާޓް ބުނީ ގައިގައި ހުރި ހުރިހާ ހަކަތައެއް ބޭނުންކޮށްގެން ވިޔަސް، ޔުއޭއީ އަތުން މޮޅުވާން މަސައްކަތް ކުރާނެ ކަމަށެވެ.
އޭޝިއަން ކަޕްގެ ގަދަ 16 ބުރުގައި ތަޖިކިސްތާނާއި ޔޫއޭއީ ކުޅޭ މެޗު ފަށާނީ މިރޭ 21:00 ގަ އެވެ. އޭގެ ކުރިން، ނޮކައުޓް ފުރަތަމަ މެޗުގައި އޮސްޓްރޭލިއާ އާއި އިންޑޮނޭސިއާ ކުޅޭ މެޗު 16:30 ގައި ފަށާނެ އެވެ.
