ދޯހާ، ގަތަރު (ޖެނުއަރީ 24) - ގަތަރުގައި މިހާރު ކުރިއަށްދާ އޭޝިއަން ކަޕް ފުޓްބޯޅަ މުބާރާތުގެ ދެ ވަނަ ބުރުން ފަލަސްތީނުން ފުރަތަމަ ފަހަރަށް ޖާގަ ހޯދިއިރު، އިންޑިއާ އާއި ޗައިނާ މުބާރާތުގެ ގްރޫޕް ސްޓޭޖުން ކަޓައިފި އެވެ.
މިއީ ފަލަސްތީނުން އޭޝިއަން ކަޕްގައި ކުޅޭ ތިން ވަަަނަ ފަހަރެވެ. މީގެ ކުރިން، 2015 އާއި 2019 ގައި ކުޅެގެން ގްރޫޕް ސްޓޭޖުން ކެޓީ އެވެ.
ގްރޫޕް ސީގައި މި ފަަހަރު ވާދަކުރާ ފަލަސްތީނުން ވަނީ ހޮން ކޮންގް އަތުން 3-0 އިން މޮޅުވެ، މުބާރާތުގެ ތާރީހުގައި އެ ޓީމުގެ ފުރަތަމަ މޮޅު ހޯދައިފަ އެވެ. ފަލަސްތީނުން ގްރޫޕްގެ ތިން ވަނައިގައި ނިންމާލިއިރު، ޔޫއޭއީއާ ވަނީ 1-1 އިން އެއްވަރުކޮށްފަ އެވެ. ބަލިވީ ގްރޫޕްގެ އެއް ވަނަ ހޯދި އިރާން އަތުން 4-1 އިން އެކަންޏެވެ.
އިރާން ނުވަ ޕޮއިންޓާ އެކު، އެއް ވަނައިގައި އޮވެ ނިންމާލިއިރު، ދެ ވަނަ އަށް ދިޔަ ޔޫއޭއީ އަށް ވަނީ ހަތަރު ޕޮއިންޓް ލިބިފަ އެެވެ. ފަލަސްތީނު ތިން ވަނަ އަށް ދިޔައީ ވެސް ހަތަރު ޕޮއިންޓާ އެކު އެވެ. ފުލުގައި ނިންމާލި ހޮން ކޮންގަށް ޕޮއިންޓެއް ނުލިބެ އެވެ.
ފަލަސްތިނުން ދެ ވަނަ ބުރު (ގަދަ 16 ބުރު)ގެ ޖާގަ ހޯދީ އެންމެ ރަނގަޅު ނަތީޖާ ހޯދި ތިން ވަނަ އަށް ދިޔަ ޓީމުތަކުގެ ތެރެއިން ގަދަ ހަތަރެއްގައި ހިމެނިގެންނެވެ.
ހޮން ކޮންގް ކޮޅަށް ފަލަސްތީނުގެ ގޯލުތައް ޖެހީ އިބްރާހިމް މުހައްމަދު ދަބާ ދެ ގޯލުގެ އިތުރުން ޒައިދު ގުންބަރު އެވެ.
ގްރޫޕް ބީގައި ވާދަކުރާ އިންޑިއާ ވަނީ ގްރޫޕް ފަހު މެޗުން 1-0 އިން ސީރިއާ އަތުން ބަލިވެފަ އެވެ. އިންޑިއާ އެ ގްރޫޕްގެ ފުލަށް ދިޔައިރު، އެ ޓީމަށް ގޯލެއް ވެސް ނުޖެހެ އެވެ. އެ ގްރޫޕްގެ އެއް ވަނަ އަށް ދިޔައީ، އުޒްބެކިސްތާނާ 1-1 އިން އެއްވަރުވި އޮސްޓްރޭލިއާ އެވެ. އޮސްޓްރޭލިއާ އަށް ހަތް ޕޮއިންޓް ލިބުނުއިރު، އުޒްބެކިސްތާން އަށް ވަނީ ފަސް ޕޮއިންޓް ލިބިފަ އެވެ.
ސީރިއާ އިން ހަތަރު ޕޮއިންޓް ހޯދިއިރު، އެ ޓީމަށް ވެސް ވަނީ ގަދަ 16 އިން ފުރުސަތު ލިބިފަ އެވެ. އެހެންކަމުން، މި ގްރޫޕްގައި އިންޑިއާ ފިޔަވައި އޮތް ތިން ޓީމު ވެސް ނޮކައުޓް ބުރުން ފެންނާނެ އެވެ.
ގްރޫޕް އޭގައި ވާދަކުރި ޗައިނާ ވަނީ ފުރަތަމަ ދެ މެޗުން ތަޖިކިސްތާން އާއި ލެބަނަންއާ އެއްވަރުވެފަ އެވެ. ފަހު މެޗުން ގަތަރު އަތުން ބަލިވީ 1-0 އިންނެވެ.
މި ގްރޫޕްގެ އެއް ވަނަ ދިޔައީ ތިން މެޗުން ވެސް މޮޅުވެ، ނުވަ ޕޮއިންޓް ހޯދި ގަތަރެވެ. ދެ ވަނަ އަށް ދިޔައީ، ރާއްޖެ އާއި އަފްގާނިސްތާނަށް ކުރިން ކޯޗުކޮށްދިން ޕީޓަ ސެގާޓް އިރުޝާދުދޭ ތަޖިކިސްތާން އެވެ. ތަޖިކިސްތާނަަށް ވަނީ ހަތަރު ޕޮއިންޓް ލިބިފަ އެވެ. ޗައިނާ ތިން ވަނަ ހޯދީ ދެ ޕޮއިންޓާ އެކު ކަމަށްވާއިރު، އެ ޓީމަށް އެންމެ ރަނގަޅު ނަތީޖާ ނެރުނު ތިން ވަނަ އަށް ދިޔަ ޓީމުތަކުގެ ތެރެއިން ވެސް ފުރުސަތެއް ނުލިބުނެވެ. އެހެންވެ މުބާރާތުން ކެޓީ އެވެ.
ލެބަނަން މި ގްރޫޕްގެ ފުލަށް ދިޔައިރު، އެ ޓީމަށް ލިބުނީ އެއް ޕޮއިންޓެވެ.
