ކުރީގެ ރައީސް އަބްދުﷲ ޔާމީންގެ ސަރުކާރުގައި، މޯލްޑިވްސް ގޭސް ޕްރައިވެޓް ލިމިޓެޑް ކުންފުނީގެ މެނޭޖިން ޑިރެކްޓަރު ކަން ކުރެއްވި އަބްދުﷲ މައުމޫނުގެ މައްޗަށް ދައުވާކޮށްދިނުމަށް އެދި، ޕްރޮސެކިއުޓަ ޖެނެރަލްގެ އޮފީހަށް އެންޓި ކޮރަޕްޝަން ކޮމިޝަން (އޭސީސީ)އިން ފޮނުވައިފި އެވެ.
އޭސީސީން އިސް ނަގައިގެން ބެލި މައްސަލައެއްގައި، ގޭސް ކުންފުނީގެ މެނޭޖިން ޑިރެކްޓަރު ކަމުގައި އަބްދުﷲ މައުމޫން ހުންނެވި ދުވަސްވަރު ކައްކާ ގޭސް ބޭރުގެ ކުންފުންޏަކުން ހޯދުމުގެ މުއާމަލާތުގެ ތެރޭގައި، 3.1 މިލިއަން ރުފިޔާ ކުންފުނިން ނަގާފައިވާ ކަމަށް ހޯދިފައިވާ ކަމަށް އެ ކޮމިޝަނުން ބުންޏެވެ.
"ޢަބްދުﷲ މައުމޫނު ރިޝްވަތުގެ ގޮތުގައި އެ ކުންފުނިން ޖުމްލަ 3,106,189.38 ރ. ނަގާފައިވާކަން ތަހުގީގަށް ހޯދާފައިވެ އެވެ. އަދި އެ ފައިސާ އޭނާއާ ގުޅުން އޮންނަކަމަށް ތުހުމަތު ކުރެވޭ އަދި އޭނާގެ ޢާއިލީ ބައެއް ފަރާތްތަކާއި ގުޅުން އޮންނަކަމަށް ތުހުމަތުކުރެވޭ ބައެއް ކުންފުނިތަކަށް އެ ފައިސާ ޖަމާކޮށްފައިވެ އެވެ." އޭސީސީން މިއަދު ނެރުނު ބަޔާނެއްގައި ބުނެ އެވެ.
މި މައްސަލާގައި އޭނާގެ މައްޗަށް ހަތް ދައުވާއެއް އުފުލުމަށް، ޕީޖީ އޮފީހުގައި އޭސީސީން އެދިފައިވެ އެވެ.
- ދައުލަތުން ކުރާ ކަމަކާ ގުޅިގެން ރިޝްވަތު ހިފުމުގެ ކުށުގެ ދައުވާ
- މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި ހޯދައިދިނުމުގެ ކުށުގެ ދައުވާ
- ކުށެއް ކުރަން އުޅުމުގެ ކުށުގެ ދައުވާ
- ކުށެއް ކުރަން އެދުމުގެ ދައުވާ
- ކުށެއް ކުރުމަށް ރޭވުމުގެ ދައުވާ
- ރިޝްވަތު ގަބޫލުކުރުމުގެ ކުށުގެ ދައުވާ
- ރަސްމީ ހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން މަންފާ ހޯދުމާއި ހޯދައިދިނުމުގެ ދައުވާ
އަދި މި މައްސަލާގައި ހިމެނޭ 3,106,189.38 އަނބުރާ ހޯދުމަށް ނިންމާފައިވާ ކަމަށް އޭސީސީން ބުނެފައިވެ އެވެ.
