ލަންޑަން (ޖެނުއަރީ 13) - އިނގިރޭސި ޕްރިމިއާ ލީގުގައި ރޭ ބޯންމައުތު އަތުން 4-0 އިން މޮޅުވެ، ލިވަޕޫލުން ލީގުގެ އެއް ވަނައިގައި ފަސް ޕޮއިންޓުގެ ލީޑު ދަމަހައްޓަައިފި އެވެ.
ލިވަޕޫލް އެއް ވަނައިގައި އޮތީ، 21 މެޗުން 48 ޕޮއިންޓާ އެކު އެވެ. ދެ ވަނައިގައި އޮތް އެންމެ ފަހުގެ މެންޗެސްޓާ ސިޓީ އަަށް 20 މެޗުން ވަނީ 43 ޕޮއިންޓް ލިބިފަ އެވެ.
މިއީ، މި ސީޒަނުގައި ލިވަޕޫލުން އެ ޓީމުގެ މިސްރު ތަރި މުހައްމަދު ސަލާހު ނުލައި ލީގުގައި ކުޅުނު ފުރަތަމަ މެޗެވެ. މި ވަގުތު މިސްރު ޓީމާ އެކު، އެފްރިކަން ކަޕް ކުޅެން ގޮސް ހުރި ސަލާހުގެ ފަލަމަސްގަނޑަށް ލިބުނު އަނިޔާއަކާ ހެދި އޭނާ ހުރީ ކުޅުމާ ދުރުގަ އެވެ.
ބޯންމައުތު ކޮޅަށް ލިވަޕޫލުން ހުރިހާ ގޯލެއް ޖެހީ ވެސް ދެ ވަނަ ހާފުގަ އެވެ. މުހިންމު ގިނަ ކުޅުންތެރިންތަކެއް ނުލައި ކުޅުނު ލިވަޕޫލް ޓީމަށް ރޭގެ މެޗުގައި ޑިއޯގޯ ޖޮޓާ ދިން ބޯޅައަކުން ލީޑުނަގައިިދިނީ، 49 ވަނަ މިނިޓްގައި ޑާވިން ނޫނޭޒް އެވެ. އޭގެ ފަހުން، މެޗުގެ 70 އާއި 79 ވަނަ މިނިޓްގައި ޖޮޓާ ވަނީ ދެ ގޯލު ޖަހައި، ލިވަޕޫލަށް ހަމަޖެހުމެއް ހޯދައިދީފަ އެވެ.
އިތުރު ވަގުތުގައި ލިވަޕޫލްގެ ފަހު ގޯލު ޖެހީ ނޫނޭޒް އެވެ. މި މެޗުގައި ޖެހި ދެ ގޯލާ އެކު، ނޫނޭޒް ވަނީ މި ސީޒަނުގެ ހުރިހާ މުބާރާތެއްގައި 10 ގޯލު ޖަހައި، 10 ގޯލު ޖަހަން ފުރުސަތު ހޯދައިދީފަ އެވެ. އޭނާ އަކީ އެ އަދަދު ހަމަކުރި ލީގުގެ ފުރަތަމަ ކުޅުންތެރިޔާ އެވެ.
އަމިއްލަ ދަނޑުގައި ކުޅުނު ޝެފީލްޑް ޔުނައިޓެޑުން ވަނީ އިތުރު ވަގުތުގައި ގޯލު ޖަހައި، 2-2 އިން ވެސްޓް ހޭމް ޔުނައިޓެޑާ އެއްވަރުކޮށްފަ އެވެ. މެޗުގެ 28 ވަނަ މިނިޓްގައި މެކްސްވެލް ކޯނޭ ވަނީ ވެސްޓް ހޭމް އަށް ލީޑުނަގައިދީފަ އެވެ. ޝެފީލްޑަށް ފުރަތަމަ ހާފު ނިމުމުގެ ކުރިން އެއްވަރުކޮށްދިނީ ބެން ބެރެޓަން ޑިއާޒް އެވެ.
ވެސްޓް ހޭމް އިން ދެ ވަނަ ފަހަރަށް ލީޑުނެގީ 79 ވަނަ މިނިޓްގައި ޖޭމްސް ވޯޑް ޕްރައުސް ޖެހި ޕެނަލްޓީންނެވެ. އިތުރު ވަގުތުގެ 13 ވަނަ މިިނިޓްގައި ޝެފީލްޑް ޔުނައިޓެޑްގެ ރިއާން ބްރޫސްޓާ އަށް ވަނީ ރަތް ކާޑެއް ދައްކައިފަ އެވެ. މިއީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމި ނިންމުމެކެވެ. އެއީ، ވެސްޓް ހޭމްގެ އެމަސަން އަށް ބްރޫސްޓާ ކުރި ޓެކަލް އެއް ބެލުމަށް ފަހު އެވެ. އޭގެ ތިން މިނިޓް ފަހުން، ދެ ވަނަ ރީނދޫ ކާޑާ އެކު ވެސްޓް ހޭމްގެ ވްލަޑިމީރް ސޯފާލް އަށް ރަތް ކާޑެއް ދެއްކި އެވެ.
ވެސްޓް ހޭމް ކޮޅަށް ޝެފީލްޑުން ގޯލު ޖެހި ފަހު ވަގުތު އެވެ. މިއީ، 113 ވަނަ މިނިޓްގައި ޕެނަލްޓީ އަކުން އޮލީ މެކްބާނީ ޖެހި ގޯލެކެވެ. މިއީ ޕްރިމިއާ ލީގުގެ ތާރީހުގައި ވެސް މެޗެއްގައި ފެނުނު އެންމެ ލަސް ގޯލެވެ.
ވެސްޓް ހޭމް ހަ ވަނައިގައި އޮތީ 21 މެޗުން 35 ޕޮއިންޓް ހޯދައިގެންނެވެ.
