ލަންޑަން (ޖެނުއަރީ 19) - ބެޓިންގެ 232 ގަވާއިދަކާ ހިލާފުވެގެން، މިދިޔަ މެއި މަހު ސަސްޕެންޑްކުރި ބްރެންޓްފޯޑްގެ ފޯވާޑް އައިވާން ޓޯނީ، އަދަބުން މިނިވަން ވެފައިވާއިރު، ކެރިއަރުގައި ބޮޑު ކްލަބަކަށް ކުޅެ ކާމިޔާބީތަކެއްގެ ހުވަފެން ދެކޭ ކަމަށް ބުނެފި އެވެ.
ޓޯނީ، 27، ވަނީ އިނގިރޭސި އެފްއޭގެ ބެޓިން ގަވާއިދާ ހިލާފުވެފައިވާ ކަމަށް އެއްބަސްވެފަ އެވެ. އެހެންވެ، އިނގިރޭސި އެފްއޭ އިން ނިންމީ ޓޯނީ ބެޓިން މައްސަލައާ ހިލާފުވެފައިވާ ކަމަށް ފާހަގަވެފައިވާ 232 މައްސަލަ އަށް ބަލައި، އޭނާ އަށް 8 މަހުގެ ސަސްޕެންޝަނެއް ދިނުމުގެ އިތުރުން 50،000 ޕައުންޑް (63،000 ޑޮލަރު) އިން ޖޫރިމަނާ ކުރުމަށެވެ.
މީގެ ދެ ދުވަސް ކުރިން ޓޯނީގެ ސަސްޕެންޝަނުގެ މުއްދަތު ވަނީ ހަމަވެފަ އެވެ. މި މަހު ހުޅުވިފައި އޮތް ފިނި މޫސުމުގެ ޓްރާންސްފާ މާކެޓްގައި ޓޯނީ އަށް ގިނަ ކްލަބްތަކަކުން ފާރަަލަ އެވެ. އޭގެ ތެރޭގައި މެންޗެސްޓާ ޔުނައިޓެޑާއި ޗެލްސީ އަދި އާސެނަލް ހިމެނެ އެވެ.
ސްކައި ސްޕޯޓްސް އަށް ދިން އިންޓަވިއުއެއްގައި ޓޯނީ ވަނީ، ސަސްޕެންޝަނުގައި އޭނާ ހުރި މުއްދަތުގައި، ބްރެންޓްފޯޑުން ދިން އެއްބާރުލުމަށް ޝުކުރު އަދާކޮށް އެ ޓީމަށް ހިދުމަތްތަކެއް ކޮށްދެން ބޭނުންވާ ކަމަށެވެ. އެކަމަކު، ފުޓްބޯޅަ ކެރިއަރުގައި ދާން ބޭނުންވާ މަންޒިލަށް ވާސިލްވާން ކާމިޔާބު ހޯދަން ޖެހޭ ކަމަށާއި އެކަން ކުރެވެން އޮތީ ބޮޑު ކްލަބަކަށް ކުޅުމުގެ ހުވަފެން ވެސް ހަގީގަތަކަށް ހަދައިގެން ކަމަށް ޓޯނީ ވަނީ ބުނެފަ އެވެ.
"ބޮޑު ކްލަބެއްގެ ހުށަހެޅުން ލިބުމުން ނިންމާނެ ނިންމުމަކާ ބެހޭގޮތުން ސީދާ އެއްޗެއް ނުބުނެވޭނެ. އެއީ ކަމެއް ކުރަން ރަނގަޅު ވަގުތަކީ މިއީއޭ ބުނެ ޕްރިޑިކްޓެއް ނުކުރެވޭނެ. އެކަމަކު، ޔަގީންކަމެއް އެބައޮތް، ބޮޑު ކްލަބަކަށް ކުޅުމަށް ދެކޭ ހުވަފެނެއް އެބައޮތް،" ޓޯނީ ބުންޏެވެ.
"ކޮންމެ ކުޅުންތެރިއަކު ވެސް ބޭނުންވާނެ ހުރިހާ ތަށްޓަކަށް ވާދަކުރާ ބޮޑު ޓީމަކަށް ކުޅެން. އެ ފަދަ ކްލަބަކަށް ދާނީ ކޮން ވަގުތެއްގައިތޯ ޖެނުއަރީ އަކީ ރަނގަޅު ވަގުތެއްތޯ، ނިންމަން ޖެހޭނީ ކިހާ ފައިސާއެއް ލިބޭ ޑީލެއްތޯ މިއީ ހުސް މި ކަމާ ގުޅިފައި ހުރި އެކި ކަންކަން،"
އިނގިރޭސި އެކި ޑިވިޝަންތަކުގައި ކުޅެފައިވާ ޓޯނީ ވަނީ ގައުމީ ސީނިއާ ޓީމަށް ވެސް ކުޅެފަ އެވެ. އޭނާ ބުނީ މި ވަގުތު އެންމެ ބޮޑު ފޯކަސް އަކީ ސަސްޕެންޝަނަށް ދިޔައިރު ހުރި ލެވަލަށް ވުރެ ރަނގަޅަށް މިހާރު ދަނޑުމަތީގައި ޕާފޯމް ކުރުން ކަމަށެވެ.
