އިންޑިއާ ނޫން އެހެން ބައެއް ގައުމުތަކުން ވެސް އާސަންދަ ހިދުމަތް ލިބޭނެ އިންތިޒާމުތައް ހަމަޖެއްސެވުމަށް މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ދިވެހި ރައްޔިތުންގެ ސިއްހީ ފަރުވާގެ ހަރަދުތައް ކަވަރުކޮށްދޭ ސަރުކާރުގެ ހެލްތު ސްކީމް، އާސަންދަގެ ހިދުމަތް ރާއްޖޭން ބޭރު ގައުމުތަކުގެ ތެރެއިން، މިހާރު ލިބެނީ އަވައްޓެރި އިންޑިއާ އަދި ސްރީލަންކާގެ ހޮސްޕިޓަލުތަކަކުންނެވެ.
ޗައިނާއަށް ކުރެއްވި ދަތުރުފުޅަށް ފަހު އެ ދަތުރުގެ މައުލޫމާތު ދެއްވުމަށް، ވެލާނާ އިންޓަނޭޝަނަލް އެއާޕޯޓުގައި ދެއްވި ޕްރެސް ބްރީފިންގައި ރައީސް މުއިއްޒު ވިދާޅުވި ގޮތުގައި އެމަނިކުފާނު މަސައްކަތް ކުރައްވަމުން ގެންދަވަނީ ތައިލެންޑާއި ޔުނައިޓެޑް އެރެބް އެމިރޭޓްސް (ޔޫއޭއީ) އިން އާސަންދަ ހިދުމަތް ލިބޭނެ ގޮތް ހަމަޖެއްސުމަށް ކަމަށެވެ.
"އާސަންދައަކީ ވަކި ގައުމަކުން ހުންނަ މެޑިކަލް ފެސިލިޓީތަކަށް ގޮސްގެން ލިބޭ ގޮތަށް ނަހަދައި އެއަށް ވުރެ ފެންވަރު ރަނގަޅު ގައުމުތަކަށް، ޔޫއޭއީއާއި ތައިލެންޑްއަށް އިރާދަކުރެއްވިއްޔާ އާސަންދަ ފުޅާކުރާނަން،" ރައީސް މުއިއްޒު ވިދާޅުވި އެވެ.
އެމަނިކުފާނު ވިދާޅުވީ، މަސައްކަތް ކުރައްވަމުން ގެންދަވަނީ އެކޮމޮޑޭޝަން ހަރަދުތައް ކަވަރު ކުރެވޭ ގޮތަށް އެ ގައުމުތަކުން އާސަންދަ ހިދުމަތް ދިނުމަށް ކަމަށެވެ.
ރައީސް މުއިއްޒު މި ކަން އިއުލާން ކުރެއްވުމަށް ފަހު ވިދާޅުވީ މިދިޔަ ސަރުކާރުގައި ފެނިގެން ދިޔައީ ކޮންމެ ކަމެއް ނިންމުމުގައި ވަކި ގައުމަކަށް ބަރޯސާވެގެން ތިބި މަންޒަރު ކަމަށެވެ. ވަކި ގައުމެއްގެ ނަން ވިދާޅު ނުވި ނަމަވެސް އެމަނިކުފާނު އިޝާރާތް ކުރެއްވީ އިންޑިއާއަށެވެ. މިދިޔަ ސަރުކާރުގައި އިންޑިއާގެ ނުފޫޒު ގަދަ ކަމަށް، އޭރުގެ އިދިކޮޅު ފަރާތްތަކުން ތުހުމަތުކުރެ އެވެ.
ޖެނުއަރީ 7، ފެށިގެން ރައީސް މުއިއްޒު ޗައިނާއަށް ކުރެއްވި ދަތުރު ނިންމާލެއްވީ ހުކުރު ދުވަހެވެ. އެ ދަތުރުގައި ޗައިނާ އާއި ރާއްޖެއާ ދެމެދު 20 އެއްބަސްވުމެއްގައި ސޮއި ކުރި އެވެ. އޭގެ ތެރޭގައި ފަތުރުވެރިކަމުގެ ދާއިރާއިން ގުޅުން ބަދަހި ކުރުމުގެ އެއްބަސްވުމެއް ވެސް ހިމެނެ އެވެ. އަދި ގުޅިފަޅާއި ގިރާވަރުފަޅާއި ފުށިދިއްގަރުފަޅުގެ މަގު ހެދުމާއި ޔުޓިލިޓީސް ބިނާކުރުން ހިމެނެ އެވެ.
