ރައްޔިތުން މަޖިލީހުގެ އިންތިހާބުގައި ވާދަކުރުމަށް ފޯމް ހުށަހަޅަން ހުޅުވާލާނީ ޖެނުއަރީ 30 ގައި ކަމަށް އިލެކްޝަންސް ކޮމިޝަނުން އިއްޔެ ހާމަކުރި އެވެ.
އެ ކޮމިޝަންގެ ނައިބު ރައީސް އިސްމާއީލް ހަބީބު "އަދަދު" ނޫހަށް މިއަދު ވިދާޅުވީ ކެންޑިޑޭޓުންގެ އެޕްލިކޭޝަން ފޯމް ހުށަހެޅުމަށް ފުރުސަތު އޮންނާނީ ޖެނުއަރީ 30 އިން ފެބްރުއަރީ 14 ގެ ނިޔަލަށް ކަމަށެވެ.
ވިހި ވަނަ މަޖިލީހުގެ އިންތިހާބު ބޭއްވުމަށް ނިންމާފައި ވަނީ މާޗު 17 ވަނަ ދުވަހު އެވެ.
މިއީ ރޯދަ މަހެއްގައި އަލަށް އިންތިހާބެއް ބާއްވާ ފަހަރެވެ. މި އަހަރުގެ ރޯދަ މަސް ފެށޭނީ މާޗު 11 ވަނަ ދުވަހު އެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގައި 87 މެމްބަރުން ތިއްބެވި ނަމަވެސް، އާ މަޖިލީހުގައި 93 މެމްބަރުން ތިއްބަވާނެ އެވެ.
އިލެކްޝަން ކޮމިޝަނުން މިހާރު ތައްޔާރުކޮށްފައިވާ ވޯޓާސް ލިސްޓުގައި މާޗު 17 ވަނަ ދުވަހާ ހަމައަށް އުމުރުން 18 އަހަރު ފުރޭ މީހުންނާއެކު ވޯޓުލުމުގެ ހައްގު ލިބިގެންވާ މީހުންގެ ޖުމުލަ އަދަދަކީ 284،327 އެވެ. އެއީ 139،165 އަންހެނުން އަދި، 145،162 ފިރިހެނުން ނެވެ.
"މިހާރު އާންމުކޮށްފައިވާ ލިސްޓުގައި ނަމާއި އެޑްރެސް އޮތީ ރަނގަޅަށްތޯ ބެއްލެވުން އެދެން. ރަނގަޅަށް ނެތްނަމަ ޝަކުވާ ހުށަހެޅުމުގެ ފުރުސަތު ލިބިވަޑައިގަންނަވާނެ. ފަރުދީ ޒިންމާ އަދާކުރެއްވުން ވަރަށް މުހިންމު،" ހަބީބު ވިދާޅުވި އެވެ.
