ބާލިން (ޖެނުއަރީ 12) - މެންޗެސްޓާ ޔުނައިޓެޑްގެ ކޯޗު އެރިކް ޓެން ހާގްއާ މައްސަލަ ޖެހި އެ ޓީމުގެ ސްކޮޑުން ބާކީ ކުރި ޖޭޑަން ސަންޗޯ އޭނާގެ ކުރީގެ ކުލަބް ބްރޫޝިއާ ޑޯޓްމަންޑަށް ލޯނު އެއްބަސްވުމެއްގެ ދަށުން ބަދަލު ވެއްޖެ އެވެ.
ޑޯޓްމަންޑްގައި ހުރުމަށް ފަހު 2021 ވަނަ އަަހަރުގެ ޖުލައި މަހު ސަންޗޯ ޔުނައިޓެޑަށް ބަދަލުވީ 73 މިލިއަން ޕައުންޑް (93 މިލިއަން ޑޮލަރު)ގެ ޓްރާންސްފާ ފީއެއްގަ އެވެ.
މެންޗެސްޓާ ޔުނައިޓެޑުގައި މިދިޔަ ދެ ސީޒަނުގައި ސަންޗޯގެ ފަރާތުން މޮޅު ކުޅުމެއް ފެނިފައިވީ ނަމަވެސް މި ސީޒަން ފަށައިގެން އޭނާއަށް ޔުނައިޓެޑުގެ ފުރަތަމަ 11 އިން ޖާގަ ހޯދަން ވަނީ އުނދަގޫ ވެފަ އެވެ. އަދި ޓެން ހާގް މީޑިއާގައި ސަންޗޯ, ފަރިތަކުރުންތަކުގައި އެންމެ އެދެވޭ ގޮތައް މަސައްކަތް ނުކުރާ ކަމަށް ބުނުމުން ސަންޗޯ ވަނީ އެކަން ސޯޝަލް މީޑިއާގައި ދޮގު ކޮށްފަ އެވެ. އެއާ އެކު ޓެން ހާގް އާއި ސަންޗޯއާ ދެމެދު މައްސަލަ ޖެހި, ޔުނައިޓެޑުން ވަނީ ސަންޗޯ މާފަށް އެދެން އަންގައިފަ އެވެ. އެކަމަކު ސަންޗޯ ވަނީ މާފަށް އެދެން ދެކޮޅު ހަދައިފަ އެވެ.
މިދިޔަ އަހަރުގެ އޮގަސްޓު މަހުގެ 26 ވަނަ ދުވަހުގެ ފަހުން ސަންޗޯ މެޗެއް ކުޅެފައި ނުވާއިރު, ޑޯޓްމަންޑަށް ބަދަލުވުމަށްފަހު ސަންޗޯ ބުނީ އަލުން އެނބުރި ގެއަށް އާދެވުމުގެ އިހުސާސް ކުރެވުނު ކަމަށެވެ.
"މި ކުލަބްގެ އެތެރޭގައި ކަންހިނގާ ގޮތާއި ބޭރުގައި ކަން ހިނގާ ގޮތް އަހަރެންނަށް އެނގޭ. ސަޕޯޓަރުންގެ ޑިމާންޑްތަކާ ކަންކަން ވެސް އަހަރެންއަށް އިނގޭ. މިދިޔަ ދެ އަހަރު އެހެން ކުލަބެއްގައި ހުރި ނަމަވެސް ޑޯޓުމަންޑްގެ މެނޭޖުމަންޓާ އަހަރެންއާ ވަރަށް ގާތް" ސަންޗޯ ބުންޏެވެ.
މި އެއްބަސްވުމުގެ ދަށުން ޑޯޓުމަންޑުން މެންޗެސްޓާ ޔުނައިޓެޑަށް 3.4 މިލިއަން ޑޮޮލަރު ދައްކާނެ އެވެ. އަދި އޭގެ އިތުރުން ޗެމްޕިއަންސް ލީގުގެ ސްކޮޑުގައި ސަންޗޯ ހިމެނުމަށް ހަތަރު މިލިއަން ޑޮލަރު ދައްކާނެ އެވެ.
ޔުނައިޓެޑަށް ކުޅެދިން 58 މެޗުގައި ސަންޗޯ ވަނީ އެ ޓީމަށް ނުވަ ލަނޑު ޖަހައިފަ އެވެ.
