މިދިޔަ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމުގެ ދަށުން މާލެ ސަރަހައްދުން ދޫކުރި 4000 ފުލެޓު ލިބުނު ފަރާތްތަކާ ހަވާލުކުރުމަށް ރައީސް ޑރ. މުހައްމަދު މުއިއްޒު ދެއްވި މުހުލަތު މިއަދަށް ހަމަވެ، އެކަން ލަސްވުން އިދިކޮޅު އެމްޑީޕީއިން ކުށްވެރިކޮށްފި އެވެ.
މިއަދުގެ ނިޔަލަށް ހައުސިން މިނިސްޓްރީން ފުލެޓުތައް ދީ ނިންމާނެ ކަމަށް ރައީސް ވިދާޅުވީ، ލިބުނު ބަޔަކު، އެންޓި ކޮރަޕްޝަން ކޮމިޝަންގެ އޮފީހަށް ގޮސް މުޒާހަރާ ކުރަން ފެށުމުންނެވެ.
"ގޯތި އަދި ފްލެޓު ލިބޭނެ ކަމަށް ފައިނަލް ލިސްޓުގައި ހިމެނި ގެޒެޓުކޮށްފައިވާ ފަރާތްތަކަށް ރަޖިސްޓްރީ ހަދައިދީ ގޯތި/ފްލެޓު ހަވާލު ކުރުމަކީ އަޅުގަޑު ވައުދުވީ ގޮތަށް ކުރިއަށް ދާނެ ކަމެއް. މި ހަފުތާ އާއި މި އަންނަ ހަފުތާ ތެރޭ ރަޖިސްޓްރީ ހަވާލުކޮށް ނިންމުމުގެ މަސައްކަތް ހައުސިން މިނިސްޓްރީ އިން ކުރިއަށް ގެންދާނެ،" ޖެނުއަރީ 2، ގެ މެންދުރު 2:29 ގައި ރައީސް މުއިއްޒު އެކްސްގައި ލިޔުއްވާފައިވެ އެވެ.
މި މައްސަލާގައި އެމްޑީޕީއިން މިއަދު ނެރުނު ނޫސް ބަޔާނެއްގައި ބުނީ، މިދިޔަ ސަރުކާރުން މި ފުލެޓުތައް ލިބޭ ފަރާތްތަކުގެ ލިސްޓު ގެޒެޓުކޮށް، ގުރުއަތު ނަގައި އެއްބަސްވުންތައް ހަދާފައިވީ ނަމަވެސް މިއަދާ ހަމައަށްވެސް ސަރުކާރުން އެ ފުލެޓުތައް ދިނުމަށް އެއްވެސް މަސައްކަތެއް ނުކުރާ ކަމަށެވެ.
އަދި، ސަރުކާރުގެ އެ އަމަލުތަކުގެ ޝަކުވާ ފުލެޓު ލިބުނު ފަރާތްތަކުން އެ ޕާޓީއާ ހަމައަށް ގެނެސްފައިވާ ކަމަށްވެސް، ގެދޮރުވެރިޔާ ސްކީމު ތައާރަފު ކުރި އެމްޑީޕީން ބުންޏެވެ.
"ރިޔާސީ އިންތިހާބުގެ ކެމްޕެއިންގައިވެސް އަދި ވެރިކަމާ ހަވާލުވެވަޑައިގެން ފަހުންވެސް ރައްޔިތުންނަށް ވައުދުވެވަޑައިގަންނަވަމުންދާ ގޮތާ ހިލާފަށް އަދި ރައްޔިތުންނަށް އޮޅޭ ގޮތަށް އެކިފަހަރު އެކި ގޮތް ގޮތަށް ފްލެޓްތަކުގެ ވާހަކަ ރައީސް ޑރ މުއިއްޒު ދައްކަވަމުންދިއުމަކީވެސް ރައްޔިތުން ކަންބޮޑުވާ ކަމެއް" އެމްޑީޕީގެ ބަޔާނުގައި ބުންޏެވެ.
އެމްޑިޕީއިގެ ބަޔާން ނިންމައިލަމުން ސަރުކާރަށް ގޮވައިލީ، އެ ޕާޓީގެ ސަރުކާރުން ފެށި މި މަޝްރޫއުގެ ދަށުން ފްލެޓު ދީފައިވާ ފަރާތްތަކަށް އެ ފްލެޓުތައް ދިނުމުގެ މަސައްކަތް މިހާރުން މިހާރަށް ފެށުމަށެވެ.
ރައީސް އެކްސްގައި އެ ފަދައިން ޕޯސްޓު ކުރެއްވި ނަމަވެސް، ސަރުކާރުން މިހާރު ބުނަނީ މިއަދުގެ ނިޔަލަށް ރަޖިސްޓްރީތައް ހަވާލު ނުކުރެވޭނެ ކަމަށެވެ. އަދި މިހަފުތާގެ ނިޔަލަށް ރަޖިސްޓްރީ ހަވާލުކޮށް ނިންމާނެ ކަމަށް ކުރިން ބުނެފައިނުވާނެ ކަމަށް ވެސް ސަރުކާރުން ބުންޏެވެ.
ރައީސް އަދި މިނިސްޓްރީގެ ވާހަކަތަކަށްފަހު ފްލެޓު ލިބުނު 4000 މީހުންގެ ތެރެއިން ބައެއް މީހުން ވަނީ މިއަދު އަނެއްކާ ވެސް އޭސީސީގެ އޮފީހަށް ގޮސް މުޒާހަރައެއްކޮށްފަ އެވެ. ބައެއް މީހުން އެތަނަށް ގޮސް ތިބީ ރައީސް މުއިއްޒުގެ ޓުވީޓުގެ ފޮޓޯއެއް ހިފައިގެންނެވެ.
