ފެނަކަ ކޯޕަރޭޝަނުން ގދ. ވާދޫ ގެންދިޔަ 5،000 ބަސްތާ ސިމެންތި ބަނދަރުމަތީގައި ހުންނަތާ ދޮޅު އަހަރުވެއްޖެ ކަމަށް އެ ރަށު ކައުންސިލުން ބުނެފި އެވެ.
ކައުންސިލް ރައީސް ހަސަން އަބްދުﷲ މިއަދު "އަދަދު" ނޫހަށް ވިދާޅުވީ ރަށު ބަނދަރުމަތީގައި ގިނަ އަދަދަކަށް ސިމެންތި އަދި ހިލަވެލި ބަސްތާތައް ބަހައްޓާފައި ހުރީ ސަތަރި އަޅައި ބަންދުކޮށްފައި ކަމަށެވެ. އެ ތަކެއްޗަކީ ފެނަކައިގެ އާ އިންޖީނުގެ އާއި ޓްރާންސްޕޯމަރު ބެހެއްޓުމުގެ މަސައްކަތަށް ގެންގޮސްފައި ހުރި ސިމެންތި ކަމަށް އޭނާ ވިދާޅުވި އެވެ.
"މިރަށު ބަނދަރުމަތީގައި އެބަހުރި ފެނަކަ މަޝްރޫއަކަށް ބޭނުންކުރުމަށް ގެނެސްފައި ހުރި ސިމެންތިއާ ހިލަވެލި. އެތަނުގަ އެ ހުންނަތާ މިހާރު ދޮޅު އަހަރަށްވުރެ ގިނަވެއްޖެ. އެތަކެތި ބޭނުންކުރަން އޮތް މަޝްރޫއު މިހާރު އޮތީ ހުއްޓިފައި" ހަސަން ވިދާޅުވި އެވެ.
ސިމެންތިތައް ބޭނުން ނުކޮށް ހުރިއިރު އިންޖީނުގެ ހެދުމުގެ މަސައްކަތް މިހާރު ވަނީ ހުއްޓާލައިފަ އެވެ. އަދި އެ މަސައްކަތް ކުރަން ނެގި ވަގުތީ މުވައްޒަފުން ވަނީ ވަކިކޮށްފަ އެވެ.
ފެނަކައިގެ އޮފިޝަލަކު މިއަދު ވިދާޅުވީ އެހާ ގިނަ އަދަދެއްގެ ސިމެންތި ގެންދިޔައީ ކީއްކުރަންކަން ނޭނގޭ ކަމަށާއި، އެކަން ބަލަމުންދާ ކަމަށެވެ. އިމާރާތް ކުރުމުގެ އެއްބައި ނިމިފައި ހުރި ވާދޫ އާ އިންޖީނުގޭގެ އިމާރާތަށް އެހާ ގިނަ އަދަދެއްގެ ސިމެންތި ބޭނުން ނުވާނެ ކަމަށް ވެސް އެ އޮފިޝަލް ވިދާޅުވި އެވެ.
މާލޭ ބާޒާރުގައި ސިމެންތި ވިއްކާ އެވްރެޖު އަގަށް ބެލިޔަސް، އެއީ 500،000 އަށް ވުރެ ގިނަ ރުފިޔާގެ ސިމެންތި އެވެ. ނަމަވެސް، ވާދޫ އަށް ތަކެތި ގެންގޮސްފައި ވަނީ ކޮން އަގެއްގައި ކަމެއް އަދި ނޭނގެ އެވެ.
ވާދޫ ބަނދަރުމަތީގެ ބޮޑު ސަރަހައްދެއްގައި ސިމެންތި އާއި ހިލަވެލި ބަސްތާ ޖަހާފައި ހުރުމުން، ބަނދަރު ބޭނުންކުރާ ފަރާތްތަކާއި، ފުރަންދާ މީހުންނާއި އަންނަ މީހުންނަށް ދަތިވާ ކަމަށް ކައުންސިލުގެ ރައީސް ހަސަން ވިދާޅުވި އެވެ. އަދި އެ ބަސްތާތައް އެތަނުން ނެގުމަށް ވެސް ފެނަކަ އަށް އަންގާފައިވާ ކަމަށް އޭނާ ވިދާޅުވި އެވެ.
ނިމިގެން ދިޔަ ސަރުކާރުގައި ވާދޫގައި ފެނަކައިގެ އޮފީސް އިމާރާތެއް ވެސް ހުޅުވި އެވެ.
