މެންޗެސްޓާ (ޖެނުއަރީ 6) - މެންޗެސްޓާ ޔުނައިޓެޑްގެ ވިންގް، ޖޭޑާން ސަންޗޯ ލޯނު އެއްބަސްވުމެއްގެ ދަށުން އޭނާގެ ކުރީގެ ކްލަބު ކަމަށްވާ ޖަރުމަންގެ ބޮރޫޝިއާ ޑޯޓްމަންޑަށް ދޫކޮށްލަން ޔުނައިޓެޑުން މަސައްކަތްކުރަމުންދާ ކަމަށް ރިޕޯޓްތަކުން ބުނެފި އެވެ.
ރިޕޯޓްތަކުން ބުނާގޮތުގައި މި ސީޒަންގެ ބާކީ އޮތް މުއްދަތަށް ސަންޗޯ، 23، އޭނާގެ ކުރީގެ ކްލަބު ޑޯޓްމަންޑަށް ލޯނު އެއްބަސްވުމެއްގެ ދަށުން ބަދަލުވާނީ ދެ ކްލަބުގެ މެދުގައި ހަދާ އެއްބަސްވުމުގެ ބައެއް މާއްދާތަކަށް ދެ ކްލަބުން އެއްބަސްވުމުންނެވެ.
ޑޯޓްމަންޑްގައި ހުރުމަށް ފަހު 2021 ވަނަ އަަހަރުގެ ޖުލައި މަހު ސަންޗޯ ޔުނައިޓެޑަށް ބަދަލުވީ 73 މިލިއަން ޕައުންޑްގެ ޓްރާންސްފާ ފީއެއްގަ އެވެ.
ޔުނައިޓެޑްގެ ކޯޗު އެރިކް ޓެން ހާގާ ޖެހުނު މަައްސަލައަކާ ގުޅިގެން، މިދިޔަ އަހަރުގެ އޮގަސްޓް މަހުގެ 26 ގެ ފަހުން ސަންޗޯ ޔުނައިޓެޑަށް މެޗެއް ނުކުޅެ އެވެ. މިދިޔަ ސެޕްޓެމްބަރު މަހުން ފެށިގެން، ސަންޗޯ، ޔުނައިޓެޑްގެ ސީނިއާ ޓީމުގެ ފަރިތަކުރުންތަކުގައި ބައިވެރިއެއްނުވެ އެވެ.
ޔުނައިޓެޑާ ގުޅުނު ފަހުން، ސަންޗޯ އަށް އެއް ފެންވަރެއްގައި ފޯމު ހިފެހެއްޓޭ ގޮތެއްނުވެ އެވެ. މިހާތަނަށް ޔުނައިޓެޑަށް އޭނާ ކުޅުނު 58 މެޗުގައި ނުވަ ލަނޑު ޖެހިއިރު، ހަ ލަނޑު ޖަހަން ވަނީ ފުރުސަތު ތަނަވަަސްކޮށްދީފަ އެވެ.
ޑޯޓްމަންޑް އިން ބޭނުންވަނީ މިހާރު އެ ކްލަބުން މިހާރު ކުރިއަށް ގެންދާ ޓްރެއިނިން ކޭމްޕްގައި ސަންޗޯ ބައިވެރިވުމަށެވެ. ޖަރުމަން ލީގު މި މަހުގެ 13 ވަނަ ދުވަހު އަލުން ފެށުމުގެ ކުރިން ޑޯޓްމަންޑް އެކުވެރިކަމުގެ ދެ މެޗު ކުޅޭނެ އެވެ.
