ފ. ނިލަންދޫގައި ހަދަން ނިންމާފައިވާ އެއާޕޯޓު އެޅުމުގެ ކުރިން ބޭނުންވާ ސާވޭތައް ހެދުމާއި އީއައިއޭ ހެދުން އެމްޓީސީސީއާ މިއަދު ހަވާލުކޮށްފި އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވީ މިއަދު ނިލަންދޫގައި އަޅަން ނިންމާފައިވާ އެއާޕޯޓަށް ދާނެ ހަރަދު އިނގޭނީ އެމްޓީސީސީއާ މިއަދު ހަވާލު ކުރި ސާވޭތަކާއި އީއައިއޭ ނިމުމުން ކަމަށެވެ.
"އެތަނަށް ބޭނުން ވާނީ ކިހާ ވަރެއްގެ ވެއްޔެއްތޯ، ކިހާ ވަރެއްގެ ޝޯ ޕްރޮޓަކްޝަނެއްތޯ އެނގޭނީ ދިރާސާތައް ނިމިގެން،" މިނިސްޓަރު ވިދާޅުވި އެވެ.
މި އަހަރުގެ ބަޖެޓުގައި ހިމަނާފައި އޮތީ ނިލަންދޫ އެއާޕޯޓުގެ އަޅަން ބޭނުންވާ ބިން ހިއްކުމެވެ. އެއާޕޯޓުގެ އަމަލީ މަސައްކަތް ކުރުން މިއަހަރުގެ ބަޖެޓުގައެއް ނުޖަހަ އެވެ.
ނިލަންދޫގައި އެއާޕޯޓެއް އަޅަން އެންމެ ފުރަތަމަ ނިންމީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ. ނަމަވެސް އެ މަޝްރޫއު ކުރިއަށް ގޮސްފައެއް ނުވެ އެވެ. ސަރުކާރުން އެއިރު ބުނީ މަޝްރޫއު މަޑުޖައްސާލަންޖެހުނީ ފ. އަތޮޅު ވިއްކާލަން އުޅޭ ކަމަށް ބުނެ އެއިރުގެ އިދިކޮޅު ފަރާތްތަކުން ދެއްކި ވާހަކަތަކުގެ ސަބަބުން ކަމަށެވެ.
"ރާއްޖޭގެ ބިން ވިއްކަނީއޭ އަނެއްކައްޗެކޭ ކިޔައިގެން ތަފާތު ވާހަކަތައް ދައްކާ މި ޕްރޮޖެކްޓް ރާއްޖެއަށް އައުމަށް ހުރަސް އެޅި ފަރާތަކީ އިދިކޮޅު ފަރާތްތައް،" ރައީސް ޑރ. މުހައްމަދު މުއިއްޒުގެ އެޑްވައިޒަރު އަބްދުއްރަހީމް އަބްދުﷲ ފެބްރުއަރީ، 2018، ގައި ވިދާޅުވެފައިވެ އެވެ.
