ސްޓެލްކޯ އިން ކަރަންޓުގެ ހިދުމަތް ފޯރުކޮށްދެމުން އަންނަ ފަސް ރަށެއްގައި ރިނިއުވަބަލް އެނާޖީ ހައިބްރިޑް ސިސްޓަމް ގާއިމުކުރުމުގެ މަސައްކަތް ކޮށްދޭނެ ފަރާތެއް ހޯދަން އިއުލާނުކޮށްފި އެވެ.
ހައިބްރިޑް އެނާޖީ ސިސްޓަމް ނުވަތަ އިއާދަކުރަނިވި ހައިބްރިޑް ހަކަތަ ނިޒާމަކީ ކަރަންޓު އުފައްދަން ބޭނުންކުރާ ތަފާތު ބާވަތުގެ ހަކަތަ ބޭނުންކޮށްގެން ކަރަންޓު އުފައްދާ ނިޒާމެކެވެ. މިފަދަ ނިޒާމުތަކުގައި އާންމުކޮށް ތެލާއި، އިރުގެ ހަކަތަ، ވައިގެ ހަކަތަ ފަދަ ތަފާތު އިއާދަކުރަނިވި ހަކަތަ އުފައްދާ ވަސީލަތްތަށް އިންޓަގްރޭޓް ކުރެ އެވެ.
ސްޓެލްކޯ އިން މި ހައިބްރިޑް ސިސްޓަމްތައް ގާއިމުކުރަނީ ކ. ގުރައިދޫ، އއ. ފެރިދޫ، އއ. މާޅޮސް، އދ. ހަންޏާމީދޫ އަދި ވ. ފެލިދޫގަ އެވެ. އެ ފަސް ރަށުގައި ވެސް ކަރަންޓުގެ ހިދުމަތް ފޯރުކޮށްދެނީ ސްޓެލްކޯ އިންނެވެ.
އެ ކުންފުނިން އިއްޔެ ކުރި އިއުލާނެއްގައި ވަނީ އެ ރަށްތަކުގައި ހައިބްރިޑް އެނާޖީ ސިސްޓަމް ގާއިމުކުރުމުގެ މަސައްކަތް ކޮށްދޭން ޝައުގުވެރިވާ ފަރާތްތަކުން ބިޑް ހުށަހެޅުމަށް ހުޅުވާލާފަ އެވެ. ޕްރޮޕޯސަލް ހުށަހެޅޭނީ ދިވެހި ކުންފުނިތަކަށް އެކަންޏެވެ.
އިއުލާނުގައިވާ ގޮތުން މި މަސައްކަތަށް ޕްރޮޕޯސަލް ހުށައެޅުން ހަމަޖެހިފައިވަނީ ދެ މަރުހަލާ އަކަށެވެ. އެގޮތުން މި މަސައްކަތުގެ ޓެކްނިކަލް ޕްރޮޕޯސަލް އަދި ޑިޒައިން ކުރެހުން ހުށައެޅުމަށް ހަމަޖެހިފައިވަނީ 22 ފެބުރުވަރީ 2024 ވާ ބުރާސްފަތި ދުވަހުގެ 11:00 ގައެވެ.
ޕްރޮޕޯސަލ ތަކުގެ ތެރެއިން ޓެކްނިކަލް ގޮތުން ހޮވޭ ޕްރޮޕޯސަލްތައް ކަނޑައަޅައި، އެފަރާތްތަކަށް ފައިނޭންޝަލް ޕްރޮޕޯސަލް ހުށައެޅުމަށް ފަހުން ދައުވަތު ދޭނެ ކަމަށް ސްޓެލްކޯއިން ބުނެ އެވެ.
އެ މަސައްކަތުގެ ބިޑް ސެކިއުރިޓީގެ ގޮތުގައި 20,000ރ. ނުވަތަ އެއަގަށްވާ އެމެރިކާ ޑޮލަރު ހުށަހަޅަން ޖެހެ އެވެ. އަދި ބިޑް ކާމިޔާބު ކުރާ ފަރާތުން ޕާފޯމަންސް ސެކިއުރިޓީގެ ގޮތުގައި ހުށަހަޅާ އަގު ވެސް އަދާކުރަންޖެހޭނެ އެވެ.
