ލަންޑަން (ޑިސެމްބަރު 29) - އިނގިރޭސި ޕްރިމިއާ ލީގުގައި ރޭ އަމިއްލަ ދަނޑުގައި ވެސްޓް ހޭމް ޔުނައިޓެޑް އަތުން 2-0 އިން ބަލިވެ، އާސެނަލަށް ލީގުގެ އެއް ވަނަ އަށް އަރަން ލިބުނު ފުރުސަތު ގެއްލިއްޖެ އެވެ.
ލީގުގެ އެއް ވަނައިގައި ލިވަޕޫލް އޮތީ 19 މެޗުން 42 ޕޮއިންޓާ އެކު އެވެ. ރޭ މޮޅުވެގެން އެއް ވަނަ އަށް އެރެން އޮތް އާސެނަލް، ދެ ވަނައިގައި އޮތީ 19 މެޗުން 40 ޕޮއިންޓް ހޯދައިގެންނެވެ. ތިން ވަނައިގައި އޮތީ 19 މެޗުން 39 ޕޮއިންޓް ހޯދާފައިވާ އެސްޓަން ވިލާ އެވެ.
އާސެނަލްގެ އެމިރޭޓްސް ސްޓޭޑިއަމްގައި ރޭ ކުުޅުނު މެޗުގައި ވެސްޓް ހޭމް އިން ލީޑުނެގީ 13 ވަނަ މިނިޓްގައި ތޯމަސް ސޫޝެކް ޖެހި ގޯލުންނެވެ. އޭނާ މި ލަނޑު ޖެހީ ޖެރޮޑް ބޮވެން ދިން ބޯޅައަކުންނެވެ. ބޮވެން އެ ބޯޅަ ދިންއިރު ބޯޅަ ވަނީ ބޭރުވެފައި ކަމަށް އާސެނަލުން އެޕީލްކުރި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު، ނިންމީ ގޯލު ބަލައިގަންނާށެވެ.
ފުރަތަމަ ހާފުގައި އާސެނަލަށް ލަނޑު ޖަހައިދޭން އެންމެ ހުސް ފުރުސަތެއް ލިބުނީ ބުކާޔޯ ސަކާ އަށެވެ. އޭރިއާތެރެއިން ހުސްކޮށް ލިބުނު ފުރުސަތުން ސަކާ ޖެހި ބޯޅަ އަމާޒުވީ ގޯލުގެ ދަނޑިއަށެވެ.
ވެސްޓް ހޭމް އިން ވަނީ ދެ ވަނަ ހާފުގެ ކުޅުން ފެށިގެން 10 ވަނަ މިނިޓްގައި ދެ ވަނަ ގޯލު ޖަަހައިފަ އެވެ. މި ލަނޑު ޖެހީ މެޗުގެ 55 ވަަނަ މިނިޓްގައި ކޮންސްޓަންޓީނޯސް މަވްރަޕޯނަސް އެވެ. މިއީ ޖޭމްސް ވޯޑް-ޕްރައުސް ނެގި ކޯނަރަކުން މަވްރަޕޯނަސް ބޮލުން ޖެހި ގޯލެކެވެ. އާސެނަލަށް ކުރިން ކުޅެފައިވާތީ، އިހުތިރާމް އަދާކުރުމުގެ ގޮތުން މަވްރަޕޯނަސް މި ލަނޑު ޖަހާފައި އުފާފާޅެއް ނުކުރެ އެެވެ.
އާސެނަލަށް ގޯލެއް ޖަހައިދޭން އެ ޓީމުގެ ކެޕްޓަން މާޓިން އޮޑެގާޑް އާއި ލެއަންޑްރޯ ޓްރޮސާޑް ޖެހި ޝޮޓްތައް ވެސްޓް ހޭމް ކީޕަރު އަރެއޯލާ މަތަކުރި އެވެ. ގޯލު ކުރިމަތިން ހުސްކޮށް އާސެނަލްގެ ގަބްރިއެލް ޖީސޫސް އަށް ލިބުނު ފުރުސަތުން ބޮލުން ފޮނުވާލި ހަމަލާ ދިޔައީ ހުރަސްދަނޑިމަތިންނެވެ.
ވެސްޓް ހޭމް އަށް މި މެޗުގައި ތިން ވަނަ ގޯލެއް ޖަހަން ވެސް ފުރުސަތު ލިބުނެވެ. އެ ގޮތުން ވެސްޓްގެ ސައީދު ބެންރަހްމާ އިތުރު ވަގުތުގައި ފޮނުވާލި ޕެނަލްޓީ އާސެނަލް ކީޕަރު ޑޭވިޑް ރާޔާ ވަނީ މަތަކޮށްފަ އެވެ. މިއީ، ކުރިން ވެސްޓް ހޭމް އަށް ކުޅުމަށް ފަހު އާސެނަލަށް ބޮޑު އަގުގައި މި ފަހަރު ބަދަލުވި ޑެކްލަން ރައިސް އޭރިއާތެރެއިން ވެސްޓް ހޭމްގެ އެމަސަން އަށް ކުރި ފައުލަކަށް ދިން ޕެނަލްޓީ އެކެވެ.
މިއީ މި ސީޒަނުގައި އަމިއްލަ ދަނޑުގައި އާސެނަލް ބަލިވި ފުރަތަމަ މެޗެވެ. އަނެއްކޮޅުން، ވެސްޓް ހޭމްގެ ކޯޗު ޑޭވިޑް މޮއިސް އާސެނަލް ދަނޑުގައި ހޯދި ފުރަަތަމަ މޮޅެވެ. މި ނަތީޖާއާ އެކު ވެސްޓް ހޭމް އޮތީ 19 މެޗުން 33 ޕޮއިންޓާ އެކު ލީގުގެ ހަ ވަނައިގަ އެވެ.
