ފުށިދިއްގަރުފަޅު ހިއްކަން ވެލި ނަގަނީ މާލެއަތޮޅު އުތުރުބުރިން ނޫން ކަމަށާއި އީއައިއޭ ރިޕޯޓާ އެއްގޮތަށް ވެލި ނަގަމުންދަނީ މާލެއަތޮޅު ދެކުނުބުރިން ކަމަށް އިންފްރާސްޓްރަކްޗާ މިނިސްޓަރު، އަބްދުﷲ މުއްތަލިބު މިއަދު ވިދާޅުވެއްޖެ އެވެ.
މުއްތަލިބު އެހެން ވިދާޅުވީ ޕީޕީއެމުން ވަކިވެވަޑައިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންނަވައި އަލަށް އުފެއްދުމުގެ މަސައްކަތް ކުރަމުންދާ އައު ސިޔާސީ ޕާޓީ، ޕީއެންއެފުން ކުރިއަށް ގެންދިޔަ ޖަލްސާއެއްގައި އެ މަސައްކަތުގައި އިސްކޮށް އުޅުއްވާ އައްބާސް އާދިލް ރިޒާ ކުރެއްވި ތުހުމަތުތައް ދޮގު ކުރައްވައި އެކްސްގައި ކުރެއްވި ޕޯސްޓެއްގަ އެވެ.
އެ ޕޯސްޓުގައި މުއްތަލިބު ވިދާޅުވީ ރަސްމާލެ ޕްރޮޖެކްޓުގެ ސަބަބުން މިހާރު ކުރިއަށްދާ އެހެން އެއްވެސް މަޝްރޫއަކަށް ބުރުލެއް ނާރާނެ ކަމަށެވެ.
"ރަސްމާލެ ޕްރޮޖެކްޓުގެ ބޮރޯ އޭރިއާ [ވެލި ނަގާ ސަރަހައްދަކީ] އީއައިއޭ ރިޕޯޓުގައި ފާހަގަކޮށްފައިވާ ފަދައިން މާލެއަތޮޅު ދެކުނުބުރި،" މުއްތަލިބުގެ ޕޯސްޓުގައި ވިދާޅުވެފައިވެ އެވެ.
ޕީއެންއެފްގެ ޖަލްސާގައި ވާހަކަ ދައްކަވަމުން އައްބާސް ތުހުމަތު ކުރެއްވީ ފުށިދިއްގަރުފަޅު ހިއްކުމަށް ބޭނުން ކުރަމުން ދަނީ ގުޅީފަޅު ހިއްކުމަށް ނަގާފައިވާ ވެލި ކަމަށެވެ. އެވާހަކަތަކަށް ރައްދުދެއްވައި ފުށިދިއްގަރުފަޅު ހިއްކުމުގެ މަޝްރޫއުގެ ބެލެނިވެރި ފަރާތް، އާބަންކޯގެ މެނޭޖިން ޑިރެކްޓަރު ފަޒުލް ރަޝީދު ވެސް ވަނީ އެކްސްގައި ޕޯސްޓު ކުރައްވައިފަ އެވެ.
ފަޒުލްގެ ޕޯސްޓުގައި ވަނީ ރައްޔިތުންގެ ހިތުގައި ނުތަނަވަސްކަން އުފެއްދުމަށް ބައެއް ބޭފުޅުން ކުރާ މަސައްކަތް ކުށްވެރި ކުރައްވާ ކަމަށެވެ.
"ރަސްމާލެ ރިކްލެމޭޝަން ކުރިއަށް ދަނީ ގުޅީފަޅުން، ފިރާވަރުފަޅުން، ތިލަފުށިން، ހުޅުމާލެ ހިއްކާ ސަރަހައްދުން ވެލި ނަގައިގެންނެއް ނޫން،" ފަޒުލްގެ ޕޯސްޓުގައި ލިޔުއްވާފައިވެ އެވެ.
ގާތްގަނޑަކަށް 1،280 ހެކްޓަރުގެ ބޮޑު ފުށިދިއްގަރުފަޅުން 1153 ހެކްޓަރުގެ ބިން ހިއްކުމުގެ މަސައްކަތް ކުރަމުންދަނީ ސްރީލަންކާގެ ސީއެމްސީސީންނެވެ. އެ މަޝްރޫއު ހިންގުމަށް ހޭދަވާނެ އަސްލު އަގު ސަރުކާރުން ހާމަކޮށްފައެއް ނުވެ އެވެ. ނަމަވެސް އެ މަސައްކަތް ކުރާ ކުންފުންޏަށް އެ މަޝްރޫއުގެ ބަދަލެއްގެ ގޮތުގައި ސަރުކާރުން ވަނީ ހުޅުމާލެއިން 10 ހެކްޓަރު އަދި ފުށިދިއްގަރު ފަޅުން ހިއްކާ ސަރަހައްދުން 60 ހެކްޓަރުގެ ބިން 99 ދިނުމަށް ނިންމައިފަ އެވެ.
ފުށިދިއްގަރު ފަޅު ހިއްކުމުގެ މަޝްރޫއު ސަރުކާރުން ކުރިއަށްގެންދާ ގޮތުގައި ހާމަކަމެއް ނެތުމުން ކަންބޮޑުވުން ފާޅުކޮށް އެ މަޝްރޫއުގެ ތަފުސީލު ހާމަކުރުމަށް ގޮވާލާ ކުއްލި މައްސަލައެއް ވަނީ މަޖިލީހަށް ވެސް ހުށަހަޅައިފަ އެވެ.
