އައްޑޫ ސިޓީ ހިތަދޫގައި އަމިއްލަ ފަރާތަކުން ކުރިން ފައިވާން ފެކްޓްރީއެއްގެ ގޮތުގައި ބޭނުންކުރި އިމާރާތެއް ރޯވެ، ބޭނުން ނުކުރެވޭ މިންވަރަށް އެތަން އަނދައިފި އެވެ.
އެ ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ. ނަމަވެސް ދަގަނޑުން ހަދާފައިވާ އެ ބިޔަ އޮނިގަނޑު އަލިފާނުގެ ހޫނުގައި ހަލާކުވި އެވެ.
އެ އިމާރާތުގައި އަލިފާން ރޯވީ މެންދުރު ފަހު 2:49 ހާއިރު ކަމަށާއި ބޯކޮށް ހިފާފައި ހުރި އަލިފާންގަނޑު ނިންވާލެވުނީ ގާތްގަނޑަކަށް ގަޑިއެއްހާއިރު ފަހުން ކަމަށް އެމްއެންޑީއެފުން ބުނެ އެވެ.
"އެތަން ވަނީ ބޭނުން ނުކުރެވޭ ވަރަށް ހަލާކުވެފައި ކަމަށް،" އެމްއެންޑީއެފުން ބުނެ އެވެ.
އެއީ ކެމިކަލް ގުދަންކުރާ ތަނެއް ކަމަށް، އަލިފާނުގެ ހާދިސާއަށް ފަހު ސޯޝަލް މީޑިއާގައި ފެތުރިގެން ދިޔަ އެވެ. ނަމަވެސް ދޮގެއް ކަމަށް އެމްއެންޑީއެފުން ބުނެ އެވެ.
އައްޑޫގައި ކުރިން ފައިވާ ފެކްޓްރީ ހިންގާ މާ ފުޅާ ދާއިރާއެއްގައެއް ނޫނެވެ. އެތަނުން އާންމުކޮށް އުފެއްދުންތައް ތައްޔާރުކޮށް ދިނީ ރިސޯޓުތަކަށެވެ.
