މި އަހަރުގެ ތިން ވަނަ ދައުރު މި މަހުގެ 28 ވަނަ ދުވަހުގެ ނިޔަލަށް ކުރިއަށްގެންދަން ފާސްކުރުމަށް ފަހު ކޮމިޓީ ބައްދަލުވުންތަކެއް ފިޔަވައި އިތުރު އެއްވެސް މަސައްކަތެއް ނުކޮށް ދެ މަސް ދުވަހުގެ ޗުއްޓީއަކަށް ދާން ރައްޔިތުންގެ މަޖިލިސް ތައްޔާރުވެއްޖެ އެވެ.
މަޖިލީހުގެ ތިން ވަނަ ދައުރު ނިމޭ ތާރީހަކީ ނޮވެމްބަރު 27 އެވެ. ނަމަވެސް، އޭރު ވެސް މަސައްކަތްތައް ހުރުމުން، ޑިސެމްބަރު ހަތަކަށް އަދި އެއަށްފަހު ޑިސެމްބަރު 18 އަށް މުއްދަތު އިތުރުކުރި އެވެ. އެއަށްފަހު ޑިސެމްބަރުގައި 18 ގައި އަނެއްކާ ވެސް 10 ދުވަސް ދައުރަށް އިތުރުކުރި އެވެ.
މި މުއްދަތުގެ ތެރޭގައި މަޖިލީހުގެ ތަޅުމުންނާއި ކޮމިޓީތަކުން ނިންމަން ޖެހޭ މުހިންމު މަސައްކަތްތަކެއް ހުރިއިރު އެ މަސައްކަތްތައް މަޖިލީހުގައި ހިނގާފައި ނުވެ އެވެ.
އެކަމާ ގުޅޭގޮތުން "އަދަދު"އިން މަޖިލީހުގެ ރައީސް މުހައްމަދު އަސްލަމްއާ ސުވާލު ކުރުމުން ވިދާޅުވީ، މަޖިލީހުގެ ތަޅުމަށް ކަމެއް އެޖެންޑާކޮށްފައި ވާނަމަ ޖަލްސާތައް ބާއްވާނެ ކަމަށެވެ. މަޖިލީހުގެ ތަޅުމަށް ކަމެއް އެޖެންޑާ ކޮށްފައި ނުވަނީ، ކޮމިޓީ މަސައްކަތްތައް ކުރިއަށް ނުދާތީތޯ ސުވާލު ކުރުމުން އަސްލަމް އެ ކަމަށް އިންކާރު ކުރެއްވި އެވެ.
ތިންވަނަ ދައުރުގެ މުއްދަތު އިތުރު ކުރުމަށް ފަހު ޖަލްސާތައް ކުރިއަށް ނުދާތީ، އެކަމާ ގުޅޭ ގޮތުން ކުރި ސުވާލުތަކަށް އަސްލަމް ސާފު ޖަވާބެއް ދެއްވާފައެއް ނުވެ އެވެ.
މި މުއްދަތުގެ ތެރޭގައި ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީން، ވަޒީރުންނަށް ރުހުން ދިނުމުގެ މައްސަލާގައި ކޮމިޓީ ބައްދަލުވުމެއް ބާއްވަން ތާވަލު ކުރި އެވެ. އެހެންނަމަވެސް، އެ ދުވަހު ވެސް ކޮމިޓީގެ ކޯރަމް ހަމަ ނުވެގެން ބައްދަލުވުން ބާއްވާފައި ނުވެ އެވެ.
އޭގެ ފަހުން މިއަދު، މަޖިލީހުގެ އިމްތިޔާޒާއި ސުލޫކު ކޮމިޓީއިން ބައްދަލުވުމެއް ބޭއްވި އެވެ. އެ ކޮމިޓީ ބައްދަލުވުމުގައި ކުރިއަށް ދިޔައީ އިހަވަންދޫ ދާއިރާގެ މެމްބަރު މުހައްމަދު ޝިފާއުއަށް މަރުގެ އިންޒާރު ދިން މައްސަލަ އެވެ. އެ ކޮމިޓީ ސިއްރު ކުރީ އެވެ.
މި ވަގުތު މަޖިލީހުން ކުރަން އޮތް އެންމެ މުހިންމު މަސައްކަތަކީ ވަޒީރުންނަށް ރުހުން ދިނުމެވެ. ވަޒީރުންނަށް ރުހުން ދިނުމުގެ މައްސަލާގައި ކޮމިޓީއިން ދިރާސާކޮށް ނިންމި ގޮތުގެ ރިޕޯޓު ތަޅުމަށް ފޮނުވުމުން، އެ ރިޕޯޓު އަނބުރާ ކޮމިޓީ މަރުހަލާއަށް ފޮނުވާލީ ވުޒާރާތަކުގެ މެންޑޭޓް މަޖިލީހުން ފާސް ނުކޮށް، ވަޒީރުންނަށް ރުހުން ނުދެވޭނެ ކަމަށް ތުޅާދޫ ދާއިރާގެ މެމްބަރު ހިސާން ހުސެއިން ހުށަހެޅި މައްސަލައަށް ރިސާޔަތުން ރިއާޔަތް ކުރުމަށް ފަހު އެވެ. ރިޔާސަތުން އެގޮތަށް ނިންމީ މަޖިލީހުގެ މެޖޯރިޓީ އަދި މައިނޯރިޓީ ޕާޓީ ކަމަށްވާ، އެމްޑީޕީ އަދި ޑިމޮކްރެޓްސް އާ މަޝްވަރާ ކުރުމަށް ފަހު އެވެ.
މި މަހުގެ 18 ވަނަ ދުވަހު ވަޒީރުންނަށް ރުހުން ނުދިނުމުން، ވުޒާރާތަކުގެ މެންޑޭޓް ފާސް ކުރުމަށް ސަރުކާރުން މަޖިލީހަށް އެ ދުވަހު ފޮނުވި އެވެ. އެހެންނަމަވެސް، އެކަމާ ގުޅޭ އެއްވެސް މަސައްކަތެއް މަޖިލީހުގައި ކޮށްފައެއް ނުވެ އެވެ.
މާދަމާ އަކީ މި ދައުރުގެ ފަހު ދުވަސް ކަމަށް ވާއިރު، މިހާރު މިއޮތް ހާލަތުގައި މަޖިލީސް މެމްބަރުން މިއަހަރުގެ ޖަލްސާތައް ނިންމައި، ދެ މަސް ދުވަހުގެ ޗުއްޓީއަށް ދާނީ ވަޒީރުންނަށް ރުހުން ނުދީ އެވެ. އަންނަ އަހަރުގެ މަޖިލީހުގެ ޖަލްސާތައް ފަށާނީ ފެބްރުއަރީ މަހުގެ ތެރޭގަ އެވެ.
