ރައީސުލްޖުމްހޫރިއްޔާ ޑރ. މުހައްމަދު މުއިއްޒު, ކުރީގެ ރައީސް ޑރ. މުހައްމަދު ވަހީދު ހަސަން މަނިކުއާ މިއަދުގެ ވަގުތެއްގައި ބައްދަލުކުރައްވައިފި އެވެ.
މި ބައްދަލުކުރެއްވުމުގައި ގައުމުގެ އިޖުތިމާއީ އަދި ސިޔާސީ ކަންކަމާ ގުޅޭގޮތުން ދެ ބޭފުޅުން މަޝްވަރާ ކުރެއްވި ކަމަށް ރައީސް އޮފީހުން ހާމަކޮށްފައިވެ އެވެ. އެ ބައްދަލުވުމާ ގުޅޭ އިތުރު ތަފްސީލެއް ހާމަކޮށްފައި ނުވެ އެވެ.
ރައީސް މުއިއްޒުއަށް އިދިކޮޅު ޓިކެޓު ލިބިވަޑައިގަތުމާ ހަމައަށް ޕީޕީއެމްގައި ވަހީދު މަޑުކުރެއްވި އެވެ. އަދި, އެ ޕާޓީގެ ޓިކެޓަށް ޝައުގުވެރިކަން ވެސް ފާޅުކުރެއްވި އެވެ. ނަމަވެސް, ރައީސް މުއިއްޒުއަށް ޓިކެޓު ލިބިވަޑައިގަތުމުން ތާއީދު ކުރެއްވީ ގާސިމަށެވެ.
ރިޔާސީ އިންތިހާބުގައި ވަހީދު ތާއިދުކުރައްވައި ކެމްޕޭން ކުރެއްވީ ޖުމްހޫރީ ޕާޓީގެ ލީޑަރު ގާސިމް އިބްރާހިމްއަށެވެ. ދެވަނަ ބުރުގައި އެއްވެސް ކެންޑިޑޭޓަކަށް ވަހީދު ތާއީދު ނުކުރައްވަ އެވެ.
ރައީސް މުއިއްޒު ގެންދަވަނީ ސިޔާސީ ލީޑަރުންނާ އެކު ސިލްސިލާ ބައްދަލުވުންތަކެއް ބާއްވަމުންނެވެ. ފާއިތުވި ހަފްތާގެ ތެރޭގައި ގާސިމާއި، އެމްޑީއޭގެ ލީޑަރު ސަންޓްރެވެލް އަހުމަދު ސިޔާމާއި އެމްއެންޕީގެ ރައީސް ނާޒިމް އަދި ޑިމޮކްރެޓިކްސް ޕާޓީގެ ރައީސް ހަސަން ލަތީފުއާ ބައްދަލުކުރެއްވި އެވެ.
އޭގެ އިތުރުން, އިއްޔެގެ ވަގުތެއްގައި އެމަނިކުފާނު ވަނީ ކުރީގެ ރައީސް މައުމޫން އަބްދުލްގައްޔޫމާ އެކު ވެސް މަޝްވަރާ ބައްދަލުވުމެއް ބާއްވާފަ އެވެ.
