އުރީދޫ އަދި ސްޓެބިސިސް މޯލްޑިވްސް އިން އިންތިޒާމުކޮށްގެން ރާއްޖޭގައި ބޭއްވި އެންމެ ފުރަތަމަ ޑްރޯން ރޭހުގެ ވަނަތަކަށް ދިޔަ ބައިވެރިންނަށް އިނާމު ހަވާލުކޮށްފި އެވެ.
މިދިޔަ ހޮނިހިރު ދުވަހު އޮތް އުރީދޫ ޑްރޯން ރޭސް ބޭއްވީ ދެ ކެޓަގަރީއަކަށް ބަހާލައިގެންނެވެ. އެއީ "ސްކައި އެލީޓް" (އެފްޕީވީ ޑްރޯން) އާއި ނޮން-އެފްޕީވީ ޑްރޯންތަކަށް ހާއްސަކޮށްގެން "ސްކައި ވޯކާ" ކެޓަގަރީ އެވެ. މި ރޭހުގައި 12 ޑްރޯން ޕައިލެޓުން ވާދަކުރި އެވެ.
ސްކައި ވޯކާ ކެޓަގަރީގައި ހަތަރު ހުރަހަކުން އަށް ޕައިލެޓުން ޑްރޯންތަކަށް ދުއްވާފައިވާއިރު، ސްކައި އެލީޓް ކެޓަގަރީން ހަތަރު ބައިވެރިން ވަނީ ނުވަ ހުރަހަކުން ދަތުރުކޮށް، އެންމެ ހަލުވި ވަގުތުގެ ތެރޭގައި ދެ ލެޕް ނިންމުމަށް ވާދަކޮށްފަ އެވެ.
ސްކައި އެލީޓް ކެޓަގަރީން ވާދަކުރިފަރާތްތަކުގެ ތެރެއިން 1:00:55 ގެ ތެރޭގައި ރޭސް ނިންމާ އެއްވަނަ އަށް ދާ ފަރާތައް ލިބޭ ޑީޖޭއައި މިނީ 3 ޕްރޯ (ޑީޖޭއައި އާރްސީ) ކާމިޔާބު ކޮށްފައިވަނީ މުހައްމަދު އާލިން ޝާފިއު އެވެ. 1:06:11 އިން ރޭސް ނިންމައި، ހަމްޒާ ވަސީމް ދެވަނަ ހޯދާފާ ވާއިރު، ތިން ވަނަ ކާމިޔާބުކޮށްފައިވަނީ 1:08:10 މިނެޓުން ރޭސް ނިންމި ހުސައިން އަލޫފް ރިޔާޒެވެ.
ދެވަނަ އަށް ދިޔަ ފަރާތަށް ތިން މަސް ދުވަހުގެ (1536 ޖީބީ) ޕެކޭޖާއި އެކު އުރީދޫ 5ޖީ އެއާފައިބާ ޑިވައިސް އެއް ލިބިފައިވާއިރު ތިން ވަނަ ހޯދި ފަރާތައް ލިބުނީ 2000 ރުފިޔާގެ މޫލީ ވައުޗަރެކެވެ.
ސްކައި ވޯކާ ކެޓަގަރީގެ އެއްވަނަ އިބްރާހިމް ޝަބީލް 01:11:78 އިން ރޭސް ނިނަމާފައިވާއިރު، ދެވަނަ އަށް ދިޔަ އައްޝަމް ޝަރީފް 01:25:94 ތެރޭގައި ރޭސް ނިންމި އެވެ.
މި ކެޓެގަރީ އިން އެއްވަނަ ހޯދި ޝަބީލް އަށް ޑީޖޭއައި މިނީ 2 އެސްއީ އެއް ލިބިފައިވާއިރު ދެ ވަނަ ހޯދި ފަރާތައް ތިން މަސް ދުވަހުގެ (750 ޖީބީ) ޕެކޭޖާއި އެކު އުރީދޫ 5ޖީ އެއާފައިބާ ޑިވައިސް އެއް ލިބިފައިވެ އެވެ.
މީގެ އިތުރުން 01:27:36 ރޭސް ނިންމާ ތިން ވަނަ ހޯދި މިފްޒާލް އިބްރާހިމް ފަޒީލަށް 1000 ރުފިޔާގެ މޫލީ ވައުޗަރެއް ލިބިފައިވެ އެވެ.
ޑްރޯން ރޭހާއި ގުޅިގެން އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒް ވިދާޅުވީ، މިއަހަރުގެ ޑްރޯން ރޭހުގެ ކާމިޔާބީގެ މައްޗަށް ބިނާކޮށް، އައު ކަންތައްތަކާއެކު މިއަށްވުރެ ވެސް ފުރިހަމަކަމާއެކު އުރީދޫ ޑްރޯން ރޭސް ކުރިއަށް ގެންދާނެ ކަމަށެވެ.
އުރީދޫ ޑްރޯން ރޭސް 2023 ގެ ކާމިޔާބީއާއި އެކު، އުރީދޫ މޯލްޑިވްސް އާއި ސްޓެބިސިސް މޯލްޑިވްސް ގުޅިގެން ރާއްޖޭގައި ޑްރޯން ރޭސިން ކުރިއެރުވުމަށް އިތުރު މަސައްކަތްތަކެއް ކުރާނެކަމަށް އެ ކުންފުނިން މައުލޫމާތުދެ އެވެ.
