ލަންޑަން (ޑިސެމްބަރު 24) - ފުލަމްގެ މައްޗަށް ބާންލީ އިން 2-0 ގެ ނަތީޖާއަކުން ކުރިހޯދި އިނގިރޭސި ޕްރިމިއާ ލީގުގެ މެޗުގައި ރެފުރީކަންކޮށް ޕްރިމިއާ ލީގުގައި ރެފުރީކަން ކުރި ފުރަތަމަ އަންހެން ރެފުރީގެ ޝަރަފު ރެބެކާ ވެލްޝް ހޯދައިފި އެވެ.
ވެލްޝް އެންމެ ފުރަތަމަ ރެފުރީކަން ކުރަން ފެށީ 2010 ވަނަ އަހަރު އެވެ. އެކަމަކު، އޭރު އޭނާ ރެފުރީކަން ކުރަމުން އައީ ޕާޓް ޓައިމް ވަޒީފާއެއްގެ ގޮތުގަ އެވެ. އޭނާ ފުލް ޓައިމް ރެފުރީކަން ކުރަން ފެށީ 2019 ވަނަ އަހަރުން ފެށިގެންނެވެ.
މި އަހަރުގެ ޖަނަވަރީ މަހު ވެލްޗު ވަނީ ޗެމްޕިއަންޝިޕުގައި ވެސް ރެފުރީކަން ކޮށްފަ އެވެ. އެއާ އެކު އޭނާ ވެގެންދިޔައީ ޗެމްޕިއަންޝިޕުގައި ރެފުރީކަން ކުރި ފުރަތަމަ އަންހެން ރެފުރީ އަށެވެ.
ވެލްޝް ރެފުރީކަން ކުރި މެޗުން މޮޅުވި ބާންލީގެ ކޯޗު އަދި ކުރީގެ މެންޗެސްޓާ ސިޓީގެ ކުޅުންތެރިޔާ ވިންސެންޓް ކޮމްޕެނީ ވަނީ ވެލްޗްއަށް މަރުހަބާ ކިޔައިފަ އެވެ. ކޮމްޕެނީ ބުނީ މިއީ ވެލްޝް އަށް ތާރީހީ މެޗެއް ކަމަށާއި، އޭނާ ހޯދި މި ކާމިޔާބީއަށް މަރުހަބާ ކިޔާ ކަމަށެވެ.
ދަނޑުމަތީގައި ޖެހިލުން ކުޑަ އަންހެން ރެފުރީ، ވެލްޝް ވަނީ 2020 ވަނަ އަހަރު ފީފާ އެލީޓް ރެފުރީންގެ ލިސްޓަށް ވެސް އަރައިފަ އެވެ.
