މެޑްރިޑް (ޑިސެމްބަރު 23) - މެންޗެސްޓާ ޔުނައިޓެޑަށް ކުޅެމުން އަންނަ ފްރާންސްގެ ތަޖުރިބާކާރު ޑިފެންޑަރު ރަފެއަލް ވަރާން ހޯދަން ސްޕެއިންގެ ރެއާލް މެޑްރިޑުން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
މީގެ ކުރިން ރެއާލަށް ކުޅުނު ވަރާން ވަނީ ރެއާލާ އެކު ގިނަ ކާމިޔާބީތަކެއް ހޯދައިފަ އެވެ. އެ ގޮތުން ރެއާލާ އެކު ހަތަރު ފަހަރު ޗެމްޕިއަންސް ލީގު ވަރާން ކާމިޔާބުކޮށްފައިވެ އެވެ.
ޖެނުއަރާ ޓްރާންސްފާ މާކެޓުގައި ވަރާންގެ ސޮއި ހޯދަން މެޑްރިޑުން ބޭނުންވަނީ އެ ޓީމުގެ ފަހަތަށް ކުޅެމުން އަންނަ ޑިފެންޑަރު ޑޭވިޑް އަލަބާގެ ކަކުލަށް ލިބުނު އަނިޔާއާ ގުޅިގެން މި ސީޒަނުގައި އޭނާއަށް އިތުރަށް ނުކުޅެވޭނެކަން ހާމަވުމުންނެވެ. މީގެ އިތުރުންވެސް ރެއާލްގެ ޑިފެންޑަރު އެޑާ މިލިޓާއޯ އަށް ވެސް އަނިޔާވެ މި ސީޒަނުގައި އިތުރަށް ނުކުޅެވޭނެ އެވެ.
އެހެންވެ، ރެއާލުން ބޭނުންވަނީ ވަރާން ލޯނު އެއްބަސްވުމެއްގެ ދަށުން މި ސީޒަނުގެ ބާކީބައިގައި އެ ޓީމަށް ގެންދާށެވެ.
ވަރާންގެ ސޮއި ހޯދުމަށް ރެއާލުން މަސައްކަތް ކުރަމުން އަންނައިރު، ވަރާން އާއި ޔުނައިޓެޑުގެ ކޯޗު އެރިކް ޓެން ހާގްއާ މައްސަލަ ޖެހުނު ކަމަށް ވެސް މީގެ ކުރިން މީޑިއާ ރިޕޯޓްތައް ބުންޏެވެ. އެކަމަކު ޓެން ހާގް ވަނީ އެ ވާހަކަ ދޮގު ކޮށްފަ އެވެ.
ވަރާން ހޯދުމަށް މީގެ ކުރިން ޖަރުމަނުގެ ބަޔާން މިއުނިކުން ވެސް މަސައްކަތް ކުރިއެވެ.
ސްޕެއިންގެ ގަދަ ބާރު ރެއާލްގައި ކާމިޔާބު ދުވަސްތަކެއް ހޭދަކުރުމަށްފަހު 2021 ވަނަ އަހަރު ވަރާން ޔުނައިޓެޑަށް ގެނައީ އޭރު އެ ޓީމްގައި ހުރި އޮލެ ގުނަ ޝޮލްޝެއާ އެވެ. އޭގެ ފަހުން ޓީމުގެ މުހިންމު ކުޅުންތެރިއެއްގެ ގޮތުގައި ވަރާން ފެނުނަސް އަނިޔާގެ ސަބަބުން ރެއާލްގައި ދެއްކި ފޯމެއް އޭނާ އަށް ނުދެއްކެ އެވެ.
