ވަޒީރުންނަށް ރުހުން ދިނުމުގެ މައްސަލައާ ގުޅޭގޮތުން މިއަދު ބާއްވަން ތާވަލު ކުރި ކޮމިޓީ ބައްދަލުވުން ކޯރަމް ހަމަނުވެގެން ކެންސަލް ކޮށްފި އެވެ.
ވަޒީރުންނަށް ރުހުން ދިނުމުގެ މައްސަލައާ ގުޅޭގޮތުން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން މިއަދު 09:00 ގައި ކޮމިޓީ ބައްދަލުވުމެއް ބޭއްވުމަށް ނިންމި އެވެ. އެހެން ނަމަވެސް، އެ ބައްދަލުވުން ކެންސަލް ވެފައިވާކަން، މަޖިލީހުގެ އިދާރާއިން މީޑިއާތަކަށް އެންގި އެވެ.
ކޮމެޓީގެ މުގައްރިރު އަދި މާފަންނު ހުޅަނގު ދާއިރާގެ މެމްބަރު، މުހައްމަދު ފަހާލު ވިދާޅުވީ ކޮމެޓީގެ ބައްދަލުވުން ކެންސަލްކުރީ ކޯރަމް ހަމަ ނުވެގެން ކަމަށެވެ.
"ތިން މެމްބަރަކު ސޮއިކޮށްފައި ހުށަހެޅީމަ، މިއަދު ޖަލްސާ ބާއްވަން ނިންމީ. ސޮއި ކޮށްފައި ހުށަހެޅީ ޕީއެންސީގެ އިބްރާހިމް ނަސީމް، ޕީޕީއެމްގެ ތޯރިގް އަދި މިހާރު އަމިއްލަ މެމްބަރެއްގެ ގޮތުގައި ހުންނެވި، އަބްދުﷲ ރިޔާޒް، އޭގެ ތެރެއިން ވެސް، އެއް މެމްބަރަކު ކޮމެޓީއަށް ވަޑައިނުގަންނަވާ،" ފަލާހު ވިދާޅުވި އެވެ.
ފަލާހު ވިދާޅުވި ގޮތުގައި ކޮމެޓީ ބައްދަލުވުން ފެށުމަށް ހަތަރު މެމްބަރުން ތިއްބަވަން ޖެހެ އެވެ. އަދި ކޮމެޓީ ވޯޓެއް ނެގުމަށް ހަ މެމްބަރުންގެ ކޯރަމްއެއް ބޭނުންވެ އެވެ.
އެހެންނަމަވެސް، މިއަދު ކޮމެޓީ ބައްދަލުވުން ފެށުމަށް ހާޒިރުވެ ތިއްބެވީ އެންމެ ތިން މެމްބަރުން ކަމަށް ފަލާހު ވިދާޅުވި އެވެ.
ވަޒީރުންނަށް ރުހުން ދިނުމުގެ މައްސަލާގައި ކޮމިޓީން ރިޕޯޓު ފާސްކޮށްފައި އޮތީ ގަވައިދާ އެއްގޮތަށް ނޫން ކަމަށް ނިންމައި އެ ރިޕޯޓު އަނބުރާ ކޮމެޓީއަށް ފޮނުވާލީ މި މަހުގެ 18 ވަނަ ދުވަހު އެވެ.
ވަޒީރުންނަށް ރުހުން ދިނުމުގެ މައްސަލަ ކުރިއަށް ގެންދެވެން ނެތީ އަދި ކޮމެޓީ ރިޕޯޓު ގަވާއިދާ ހިލާފު ކަމަށް ނިންމީ، ވަޒީރުންނަށް ރުހުން ދިނުމުގެ ކުރިން ވުޒާރާތަކުގެ މެންޑޭޓް ފާސް ކުރުމަށް ސަރުކާރުން ހުށަހަޅާފައި ނުވާތީ ކަމަށް، ތުޅާދޫ ދާއިރާގެ މެމްބަރު ހިސާން ހުސެއިން ހުށަހެޅުއްވި ނިޒާމީ ނުކުތާއަށް ރިއާޔަތްކޮށް މަޖިލީހުގެ ރިޔާސަތުން ނިންމި އެވެ.
