ޗެކް ރިޕަބްލިކްގެ ވެރިރަށް، ޕްރޯގްގެ ޔުނިވާސިޓީއެއްގައި ދިން ބަޑީގެ ހަމަލާތަކެއްގައި 15 ކުދިން މަރާލައި 24 ކުދިން ޒަހަމުކޮށްލައިފި އެވެ.
އެގައުމުގެ ފުލުހުން ބުނެފައި ވަނީ ހަމަލާ ދީފައި ވަނީ ހަތިޔާރު އަޅައިގެން ހުރި އެންމެ މީހެއް ކަމަށާއި ފުލުހުންގެ ހަމަލާތަކުގައި އޭނާ މަރާލާފައިވާ ކަމަށެވެ. ހަމަލާދީފައި ވަނީ ވެސް އެ ޔުނިވާސިޓީގެ ދަރިވަރެއް ކަމަށް ޕްރޯގު ފުލުހުންގެ ޗީފް މާޓިން ވޮންޑްރަސެކް ވިދާޅުވި އެވެ. ނަމަވެސް ހަމަލާ ދިން ދަރިވަރާ ގުޅޭގޮތުން އިތުރު އެއްވެސް މައުލޫމާތެއް ފުލުހުން ނުދެ އެވެ.
ޗެކް ރިޕަބްލިކްގެ ޗާލްސް ޔުނިވާސިޓީގައި މިއަދު ދިން އެ ހަމަލާއަކީ އެއްވެސް ޖަމާއަތަކާ ނުވަތަ ސިޔާސީ މަގުސަދެއް ހާސިލު ކުރުމަށް ދިން ހަމަލާއެއް ކަމަށް ނުބެލެވޭ ކަމަށެވެ.
އެކްސްގައި ޕްރޯގްގެ ބޮޑުވަޒީރު ޕެޓާ ފިއާލާ ކުރެއްވި ޕޯސްޓެއްގައި ވިދާޅުވީ އެ ހަމަލާއާ ގުޅިގެން ވަރަށް ބޮޑަށް ހިތާމަ ކުރައްވާ ކަމަށާއި ޗެކް ރިޕަބްލިކްގެ އިރުމަތީ ސަރަހައްދުތަކަށް ކުރައްވަމުން ގެންދަވާ ދަތުރުފުޅު ކުރުކޮށްލެއްވުމަށްފަހު އެނބުރި ޕްރޯގްއަށް ދިއުމަށް ދަތުރު ފަށާފައި ވާކަމަށެވެ.
މުޅި ޗެކް ރިޕަބްލިކު ސިއްސުވާލި އެ ހަމަލާއާ ގުޅިގެން އެގައުމުގެ ފުލުހުން ވަނީ ކޮންމެހެން ބޭނުމެއް ޖެހިގެން ނޫނީ ބޭރަށް ނުކުމެ ނޫޅުމަށް ރައްޔިތުންނަށް އަންގައި އިލްތިމާސްކޮށްފަ އެވެ.
