ރާއްޖޭގައި ބާއްވާ އެންމެ ފޯރިގަދަ އަދި އެންމެ ބޮޑު ފުޓްސަލް މުބާރާތް، ގޯލްޑަން ފުޓްސަލް ޗެލެންޖް 2024 ގެ ޓައިޓަލް ސްޕޮންސަރަކަށް ސޮނީ ސްޕޯޓްސް ހަމަޖައްސައިފި އެވެ.
މިއީ ސޮނީ އިން މުބާރާތުގެ ޓައިޓަލް ސްޕޮންސަރެއްގެ ގޮތުގައި ޖެހިޖެހިގެން މަސައްކަތް ކުރާ ތިން ވަނަ ފަހަރެވެ. އަންނަ މަހުގެ 14 ވަނަ ދުވަހު ފަށަން ނިންމާފައިވާ ގޯލްޑަން ފުޓްސަލް ޗެލެންޖް، 2024 ގެ ޓައިޓަލް ސްޕޮންސަރަކަށް ސޮނީ ހަމަޖެއްސުމަށް ބޭއްވި އިވެންޓް ކުރިއަށްދިޔައީ، އިއްޔެ ސޮނީ ހައުސްގަ އެވެ.
އިއްޔެގެ އިވެންޓްގައި، ގޯލްޑަން ފުޓްސަލް އެސޯސިއޭޝަންގެ ފަރާތުން ސޮއިކުރެއްވީ އެ ޖަމިއްޔާގެ ރައީސް ރިލުވާން މޫސާ އެވެ އަދި ސޮނީ ސްޕޯޓްސްގެ ފަރާތުން ސޮއިކުރެއްވީ އެ ކުންފުނީގެ މާކެޓިން އެގްޒެކެޓިވް އައިޝަތު ފަތީނާ އެވެ.
ގޯލްޑަން ފުޓްސަލް ޗެލެންޖް ކާމިޔާބު ކަމާ އެކު ކުރިއަށް ދިއުމުގައި ސޮނީ ސްޕޯޓްސް އަކީ ބޮޑު ހިއްސާ އެެކެވެ. އެ ގޮތުން ޓައިޓަލް ސްޕޮންސަރެއްގެ ގޮތުގައި މިދިޔަ އަހަރުތަކުގައި މަސައްކަތް ކުރިއިރު، އޭގެ ކުރިން ވެސް ސޮނީ ސްޕޯޓްސްގެ އެއްބާރުލުން ލިބެ އެވެ. ސޮނީ ސްޕޯޓްސް އަކީ ރާއްޖޭގައި އެންމެ އިތުބާރު ހިފޭ ސްޕޯޓްސް ބްރޭންޑް އެވެ. އެއީ ދުނިޔޭގެ މަގުބޫލު ބްރޭންޑްތަކުގެ ކޮލިޓީ ސާމާނު ސޮނީ ސްޕޯޓްސް އިން އަބަަދުވެސް ލިބޭތީ އެވެ.
އަލް ޝާލީ މެރިންއާ އެކު ގޯލްޑަން ފުޓްސަލް އެސޯސިއޭޝަން އިން ސޮއިކުރުމަށް ފަހު.
ގޯލްޑަން ފުޓްސަލް ޗެލެންްޖްގެ ގޯލްޑް ޕާޓްނަރަކަށް އަލް ޝާލީ މެރިން
ގޯލްޑަން ފުޓްސަލް ޗެލެންޖްގެ ގޯލްޑް ޕާޓްނަރެއްގެ ގޮތުގައި ޖެހިޖެހިގެން ތިން ވަނަ ފަހަރަށް ވަނީ އަލް ޝާލީ މެރިން ހަަމަޖައްސައިފަ އެވެ.
އަލް ޝާލީ މެރިންގެ ފަރާތުން ގޯލްޑަން ފުޓްސަލް އެސޯސިއޭޝަންއާ އެކު، އެއްބަސްވުމުގައި ސޮއިކުރެއްވީ އެ ކުންފުނީގެ ޖެނެރަލް މެނޭޖަރު އިސްމާއީލް ޝަރީފް އެވެ. ގޯލްޑަން ފުޓްސަލް އެސޯސިއޭޝަންގެ ފަރާތުން ސޮއިކުރެއްވީ، އެ ޖަމިއްޔާގެ ރައީސް ރިލުވާން މޫސާ އެވެ.
އަންނަ މަހު ފަށާ "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024" މުބާރާތުގަައި 129 ޓީމު ވާދަކުރާނެ އެވެ. އެ ގޮތުން، 320 މެޗު ކުޅޭ ގޮތަށް ހަމަޖެހިފައިވާއިރު، ކުރިއަށް އޮތް މުބާރާތުގައި ރާއްޖޭގެ ހުރިހާ އަތޮޅުން ޓީމުތައް ވާދަކުރާނެ އެވެ. މީގެ ކުރިން، ވ އަތޮޅާއި ނ. އަތޮޅުން މެޗުތަކެއް ނުފެނުނު ނަމަވެސް ކުރިއަށް އޮތް މުބާރާތުގައި އެ އަތޮޅުތަކުގެ މެޗުތައް ވެސް ކުރިއަށްދާނެ އެވެ.
ގޯލްޑަން ފުޓްސަލް ޗެލެންޖް ފެށުން އޮތީ ޗެރިޓީ ޝީލްޑް މެޗަކުންނެވެ. މިހާރު ޝެޑިއުލްކޮށްފައިވާ ގޮތުން، ޗެރިޓީ އަށް ކުޅޭ އެ މެޗުގައި އަންނަ މަހު 14 ވަނަ ދުވަހު ބައްދަލުކުރާނީ އެންމެ ފަހުގެ ދެ ޗެމްޕިއަނުން ކަމަށްވާ ތ. ތިމަރަފުށްޓާއި ލ. ގަން އެވެ.
ގޯލްޑަން ފުޓްސަލް ޗެލެންޖްގެ މީޑިއާ ޕާޓްނަރަކަށް ވަން ސްޕޯޓްސް ހަމަޖައްސާފައިވާއިރު، މީޑިއާ/ޕަބްލިކް ރިލޭޝަން (ޕީއާރް) ޕާޓްނަރެއްގެ ގޮތުގައި "އަދަދު" އިން މި ފަހަރު ވެސް މަސައްކަތް ކުރާނެ އެވެ. އޮފިޝަލް ފޮޓޯގްރަފީ ޕާޓްނަރަކީ އިމޭޖަސް.އެމްވީ އެވެ. އަދި އޮފިޝަލް ޖޯޒީ ޕާޓްރަނެއްގެ ގޮތުގައި ސޮއިކޮށްފައިވަނީ ޖާޒިއާ އެވެ.
