ލަންޑަން (ޑިސެމްބަރު 17) - އިނގިރޭސި ޕްރިމިއާ ލީގުގައި ރޭ ބޯންމަތާ ދެކޮޅަށް ކުޅެނިކޮށް، ކާޑިއަކް އެރެސްޓެއް (ހިތުގެ މައްސަލައެއް) ކުރިމަތިިވި ލޫޓަން ޓައުންގެ ކެޕްޓަން ޓޮމް ލޮކްޔާގެ ހާލު ރަނގަޅު ކަމަށް އެ ކްލަބުން ބުނެފި އެވެ.
ބޯންމަތުގެ ދަނޑުގައި ރޭ ކުޅުނު މެޗުގެ ދެ ވަނަ ހާފުގައި ލޮކްޔާ ދަނޑު މައްޗަށް ވެއްޓުނުއިރު، ދެ ޓީމު އޮތީ 1-1 އިން އެއްވަރުވެފަ އެވެ. ލޮކްޔާ އަށް ދަނޑުމަތީގައި އަވަސް ފަރުވާ ދީ، އެނާ ހޮސްޕިޓަލަށް ގެންދިޔަ ނަމަވެސް، މި ހާދިސާއާ ގުޅިގެން މެޗުގެ ކުޅުން ވަނީ މެދުކަނޑާލައިފަ އެވެ.
ލޫޓަން އިން ނެރުނު ބަޔާނެއްގައި ބުނީ ލޮކްޔާ އަށް ކާޑިއަކް އެރެސްޓެއް ކުރިމަތިވިކަން އެ ކްލަބުގެ މެޑިކަލް ޓީމުން ކަށަވަރުކޮށްދޭ ކަމަށެވެ. އަދި ދަނޑުމަތީގައި އަވަސް ފަރުވާ ދިނުމަށް ފަހު، އަށިގަނޑުގެ އެމްބިއުލަންސަށް ގެންދިއުމގޔެ ކުރިން ލޮކްޔާ ހޭ އަރާފައިވާ ކަމަށެވެ.
މެޗެއްގެ ތެރެއިން މީގެ ކުރިންވެސް ލޮކްޔާ އަށް ވަނީ ހިތުގެ މްއްސަލައެއް ކުރިމަތިވެފަ އެވެ. މި އަހަރުގެ މެއި މަހު ކުޅުނު ޗެމްޕިއަންޝިޕްގެ ޕްލޭއޮފްގައި ކޮވެންޓްރީއާ ދެކޮޅަށް ލޫޓަން ކުޅުނު މެޗުގައި ވެސް ލޮކްޔާ ދަނޑު މައްޗަށް ވެއްޓުނެވެ.
އެ ހާދިސާ އަށް ފަހު އޭނާ އަލުން ކުޅެން ނުކުތީ ހިތުގެ މައްސަލަ ރަނގަޅުކުރުމަށް ސާޖަރީއެއް ހެދުމަށް ފަހު އެވެ.
އެކަމަކު މި ފަހަރު ދިމާވި މައްސަލައާ ގުޅިގެން، އޭނާ އަށް އަލުން ކެރިއަރު ކުރިއަށް ގެންދެވިދާނެކަމާ މެދު ވަނީ ސުވާލު އުފެދިފަ އެވެ. ކުރިއަށް އޮތް ދުވަސްތަކުގައި ލޮކްޔާގެ އިތުރު ޓެސްޓްތަކެއް ހަދާނެ އެވެ.
