ރައީސް އޮފީހުގެ ތަރުޖަމާނުގެ މަގާމަށް ބްރޯޑްކާސްޓިން ކޮމިޝަންގެ ކުރީގެ ރައީސް މުހައްމަދު ޝަހީބު އައްޔަން ކުރަން ނިންމައިފި އެވެ.
މި ކަން ޝަހީބު ވަނީ "އަދަދު" ނޫހަށް ކަށަވަރުކޮށްދެއްވައިފަ އެވެ. މިކަމާ ބެހޭ ގޮތުން ރައީސް އޮފީހުން އަދި ރަސްމީ ބަހެއް އަދި ނުބުނެ އެވެ.
ޝަހީބު ވަނީ ނޫސްވެރިކަމުގެ ދާއިރާއިންނާއި ދިވެހި ބަހަށް ހިދުމަތް ދިނުމުގެ ދާއިރާއިން އެވޯޑުތަކެއް ވެސް ހާސިލުކޮށްފަ އެވެ. 2004 ވަނަ އަހަރު ހަވީރުގެ ރަން ގަލަން އެވޯޑު އަދި 2019 ވަނަ އަހަރު ނޫސްވެރިކަމުގެ އަލިމަސް ގަލަން އެވޯޑު ހާސިލްކޮށްފައިވެ އެވެ. އަދި ލިޔުންތެރިކަމުގެ ދާއިރާއިން ރައީސުލްޖުމްހޫރިއްޔާ ދެއްވާ ގައުމީ އިނާމު، 2007 ވަނަ އަހަރު ލިބިވަޑައިގެންނެވި އެވެ.
ކުރިން "ހަވީރު" އަދި "ސަން" ގެ ސީއޯއޯގެ ފަދަ އިސް މަގާމުތައް ފުރުއްވާފައިވާ ކުރީގެ ނޫސްވެރިޔާ ޝަހީބު، ޕީޕީއެމްގެ ފުރަތަމަ ސަރުކާރުގައި ހުންނެވީ ބްރޯޑްކާސްޓިން ކޮމިޝަންގެ ރައީސްގެ މަގާމުގަ އެވެ. ވީޓީވީއާއި ދައުލަތުގެ މީޑިއާ ގައި ވެސް އޭނާ މަސައްކަތް ކުރެއްވި އެވެ.
ބްރޯޑްކާސްޓިން ކޮމިޝަނުގައި ޝަހީބު ހުންނެވި ދުވަސްވަރު، ބައެއް ޓީވީ ސްޓޭޝަންތައް ބޮޑެތި އަދަދުތަކުން ޖޫރިމަނާ ކުރުން ފަދަ ނިންމުންތަކުގެ ސަބަބުން ޝަހީބަށް ވެސް ބޮޑެތި ފާޑުކިޔުންތަކެއް އަމާޒުވި އެވެ.
އޭރު ޓީވީ ސްޓޭޝަންތައް ޖޫރިމަނާ ކުރަމުން ދިޔައީ، އޭރުގެ ވެރިކަންކުރާ ޕީޕީއެމްގެ މެޖޯރިޓީ އޮތް ރައްޔިތުންގެ މަޖިލީހުން ފާސްކުރި އަބުރު ރައްކާތެރިކުރުމުގެ ގާނޫނެއްގެ ދަށުން ބްރޯޑްކާސްޓިން ކޮމިޝަނަށް ލިބިދޭ ބާރުގެ ބޭނުން ކޮށްގެނެވެ.
ސަރުކާރު ބަދަލުވެ، އެމްޑީޕީއަށް މަޖިލީހުގެ މެޖޯރިޓީ ލިބުނު ފަހުން ބްރޯޑްކާސްޓިން ކޮމިޝަންގެ މެންބަރުން މަޖިލީހުގެ ކަމާ ބެހޭ ކޮމިޓީއަށް ހާޒިރުކުރި ދުވަހެއްގައި ޝަހީބު ވަނީ ވަކި ޓީވީ ސްޓޭޝަންތަކަށް އަމާޒުކޮށް ޖޫރިމަނާކުރި ކަމަށް ވެސް އެއްބަސްވެފަ އެވެ.
ނަމަވެސް އޭނާއަކީ ރިޔާސަތު ބަލަހައްޓަވާ މެންބަރު ކަމަށް ވާތީ، އޭނާއަށް އޭގައި ކުރެވޭނެ ކަމެއް ނޯންނަ ކަމަށް ވިދާޅުވެ އަމިއްލަ ނަފުސު ދިފާއު ކުރައްވާފައިވެ އެވެ.
ދެހާސްނަވާރަވަނަ އަހަރު ބްރޯޑްކޮމްގެ މެންބަރު ކަމުން އޭނާ ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާފައިވަނިކޮށް މަގާމުން އިސްތިއުފާ ދެއްވި އެވެ.
