ރައީސުލްޖުމްހޫރިއްޔާގެ ރަސްމީގެކޮޅުގެ މުވައްޒަފަކު، ކުރީގެ ރައީސް އިބްރާހިމް މުހައްމަދު ސޯލިހުގެ އަނބިކަނބަލުން ފަޒުނާ އަހުމަދުއާ ބައްދަލުކުރާކަމުގެ ތުހުމަތުގައި ވަޒީފާއިން ވަކިކޮށްފި އެވެ.
އެ މުވައްޒަފު ވަކިކުރުމާ ގުޅޭ މައުލޫމާތު އެނގޭ ސަރުކާރުގެ އޮފިޝަލަކު "އަދަދު" ނޫހަށް ވިދާޅުވީ އެ އަންހެން މީހާ ގަވާއިދުން ފަޒުނާއާ ބައްދަލުކޮށް މައުލޫމާތު ހިއްސާކުރާކަން އެނގިފައިވާ ކަމަށެވެ.
"އޭނާއަކީ 2019 ވަނަ އަހަރު ވަޒީފާއަށް ދިން މީހެއް. އޭނާ ގަވާއިދުން ފަޒުނާއާ ބައްދަލުކުރާ ކަމުގެ މައުލޫމާތު ވަނީ ލިބިފައި. މައުލޫމާތު ގެންދާ ކަމަށް ވަނީ އެނގިފައި،" އެ އޮފިޝަލް ވިދާޅުވި އެވެ.
ނަމަވެސް އެއީ ކޮން ކަހަލަ މައުލޫމާތެއް ކަމެއް އޭނާ ވިދާޅެއް ނުވެ އެވެ.
އިތުރު ދެ މުވައްޒަފަކު ވަކިކުރަން ނިންމާފައިވާކަން ވެސް ވަނީ އެނގިފަ އެވެ.
އެ މުވައްޒަފުން ވަކިކުރުމާ ގުޅިގެން ފަޒުނާ ވަނީ ފޭސްބުކްގައި ކަންބޮޑުވުން ފާޅުކުރައްވައިފަ އެވެ.
ފަޒުނާ ވިދާޅުވީ ތިން މުވައްޒަފަކު ކަނޑާލާފައިވާ ކަމަށާއި އެއީ ފިރިހެނަކާއި ދެ އަންހެނުން ކަމަށެވެ. ވަކިކުރީ ކައްކާއަކާއި ބަދިގޭގައި މަސައްކަތްކުރާ މީހެއްގެ އިތުރުން ހައުސްކީޕިން އިންޗާޖު ކަމަށް ފަޒުނާ ވިދާޅުވި އެވެ.
"ވަޒީފާއިން ކަނޑާލި އެއް އަންހެނަކީ ކޮންމެ މަހަކު ޓްރާންސްފިއުޝަން ހަދަންޖެހޭ (ލޭއަޅަންޖެހޭ) ތެލަސީމިއާ ކުއްޖެއްގެ މަންމަ. އެއީ ސިޔާސީ މުވައްޒަފެއް ނޫން،" ފަޒުނާ ވިދާޅުވި އެވެ.
ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވިދާޅުވީ މުވައްޒަފުން ވަކިކުރުމުގެ ކަންކަން ހިނގާނީ އުސޫލާ އެއްގޮތަށް ކަމަށާއި "ސަރުކާރު ބަދަލުވެގެން ވަކި އާކަމެއް ނުހިނގާ" ކަމަށެވެ.
"އެޕޮއިންޓްކޮށްފައި ތިބޭ މުއައްޒަފުން ވަކިވުމާއި އޮނިގަނޑަށް އަންނަ ބަދަލުތަކުގެ ސަބަބުން ވަޒީފާއިން ވަކިވުމާއި ނުވަތަ ވަޒީފާ އުނިކޮށްލުމާއި ކޮންޓްރެކް މުއައްޒަފުންގެ، ކޮންޓްރެކް މުއްދަތު ހަމަވުމުން ކޮންޓްރެކްޓް އާކުރުމާއި ނުކުރުމާއި އަދި ކޮންޓެކްޓް ހަމަނުވަނީސް އަމިއްލައަށް ވަކިވުމާއި އަދި ކޮންޓްރެކްޓާއި ހިލާފުވެގެން ވަކިކުރުމަކީ އަބަދުވެސް ހިނގަހިނގައި ހުންނަ ކަންކަން،" ހަލީލު ވިދާޅުވި އެވެ.
ރައީސް ޑރ. މުހައްމަދު މުއިއްޒު މުލިއާގެއަށް ބަދަލުވެވަޑައިގަންނަވާނީ އެކޮޅުގައި އިތުރުކުރާ ދެ ކޮޓަރީގެ މަސައްކަތާއި މަރާމާތުގެ މަސައްކަތް ނިމުމަށް ފަހު އެވެ. އެ މަސައްކަތްތައް ކުރަމުން ދިޔަ ނަމަވެސް، ސާޖިދާ ރަސްމީގޮތުން ބައެއް ފަރާތްތަކާއެކު ބާއްވަންޖެހޭ ބައްދަލުވުންތައް އެ ގެކޮޅުގައި ބާއްވަ އެވެ.
