މިއަހަރުގެ އުރީދޫ ފަން ރަންގައި ބައިވެރިވާން ބޭނުންވާ ފަރާތްތަަކަށް އިތުރު ފުރުސަތެއް އެ ކުންފުނިން ހުޅުވާލައިފި އެވެ.
އުރީދޫއިން މިއަދު ބުނީ މި ފުރުސަތު ހުޅުވާލީ ގިނަ އަދަދެއްގެ އާންމުން އެކަމަށް އެދެމުންދާތީ ކަމަށެވެ. ނަމަވެސް މިފުރުސަތުގައި ބައިވެރިވުމުގެ ސްލޮޓްތައް ހުންނާނީ ވަކި އަދަދަކަށް ކަމަށް އުރީދޫއިން ބުނެ އެވެ.
ޑްރޯން ރޭހަކާއެކު ކުރިއަށް ގެންދަން ހަމަޖެހިފައިވާ މިއަހަރުގެ ފަން ރަން އޮންނާނީ އަންނަ ޑިސެމްބަރު 22، ގެ ހަވީރެވެ. އުރީދޫއިން ބުނީ މި އަހަރުގެ ރަންގައި މިހާރު ވެސް 5000 އަށްވުރެ ގިނަ މީހުން ބައިވެރިވާނެ ކަމަށް ލަފާކުރެވޭ ކަމަށެވެ.
މިހާރު ހުޅުވާލާފައިވާ ލިމިޓެޑް ސްލޮޓްތަކަށް ޝައުގުވެރިވާ ދުވުންތެރިންނަށް މޫލީ މެދުވެރިކޮށް ބޭނުންވާ ފަން ރަން ކިޓަށް މިހާރު އޯޑަރުކޮށް ރެޖިސްޓްރީ ކުރެވޭނެ ކަމަށް އެ ކުންފުނިން ބުނެ އެވެ.
އުރީދޫ ފަން ރަން ކިޓްތައް ދެ ކެޓަގަރީއަކަށް ބަހާލައިގެން ލިބެން ހުންނާނެ އެވެ.
- 100 ރުފިޔާގެ ސްޓޭންޑަޑް ކިޓްތަކުގައި ފަން ރަން ޓީޝާޓާއި ރިސްޓްބޭންޑް ހިމެނެ އެވެ.
- 200 ރުފިޔާގެ ފަން ކިޓްތަކުގެ ތެރޭގައި ފަން ރަން ޓީޝާޓަކާއި ރިސްޓްބޭންޑާއި ފޮތި ކޮތަޅާއި ލޮލުގައި އަޅާ ގޮގްލްސް އަދި މަލްޓިޕާޕަސް ބަންޑާނާ ހިމެނެ އެވެ.
އުރީދޫއިން ބުނިގޮތުގައި ހަ އަހަރުން މަތީގެ ހުރިހާ ފަރާތްތަކަށް މި ދުވުމުގައި ބައިވެރިވުމުގެ ފުރުސަތު ހުޅުވާލައިފައިވާއިރު ތަފާތު ހަރަކާތްތަކެއް ހިމެނޭ ފަސް ކިލޯމީޓަރުގެ މި ކުރު ދުވުމަކީ އަލަށް ދުވާ ފަރާތްތަކާއި އާއްމުކޮށް ދުވާ ފަރާތްތަކަށްވެސް ބައިވެރިވުމަށް މަޖާވާނެ ދުވުމެކެވެ.
އެ ހަރަކާތުގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށް އުރީދޫއިން ބުންޏެވެ. އެގޮތުން ފަން ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލަގައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދާއިރު މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ، ޖޮގްކޮށްފަ، ދުވެފަ ނޫނީ ނަށަމުން ވެސް އެ ދުވުން ނިންމިދާނެ ކަމަށް ވެސް އުރީދޫއިން ބުންޏެވެ.
އޭގެ އިތުރުން މިއަހަރުގެ ރަންއަށް ތަފާތު އަދި މަޖާ ކަމެއްގެ ގޮތުގައި އުރީދޫއިން ބައިވެރިންނަށް ބިބް ކަސްޓަމައިޒްކޮށް ބިބްގައި ބޭނުންނަމެއް ޖެހުމުގެ ފުރުސަތު ވެސް ވަނީ ފަހިކޮށްދީފަ އެވެ. ނަމަވެސް ދުވުމުގެ ތާރީހު ގާތްވެފައިވާތީ ބިބް ކަސްޓަމައިޒޭޝަންގެ ފުރުސަތު މިހާރު ވަނީ ބަންދުކޮށްފަ އެވެ.
މި ދުވުމުގައި ބައިވެރިވުމަށް https://mool.ee/funrun2023 މެދުވެރިކޮށް ފަން ރަން ކިޓަށް އޯޑަރު ކުރުމުން ރަޖިސްޓްރީ ކުރެވޭނެ އެވެ.
