ރައީސް ޔާމީން އިސްވެ ހުންނަވައި އުފެއްދުމަށް މަސައްކަތް ކުރާ ޕީޕަލްސް ނެޝަނަލް ފްރަންޓަކީ ގޮންޖެހުމެއް ނޫން ކަމަށް އިއްޔެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވި ނަމަވެސް، ޗެލެންޖުކުރުމުގެ ވިސްނުން ނުގެންގުޅުއްވާ ކަމަށް އެޕާޓީ އުފެއްދުމުގައި އިސްކޮށް އުޅުއްވާ ކުރީގެ ކޮމިއުނިކޭޝަން މިނިސްޓަރު މަލީހް ޖަމާލު ވިދާޅުވެއްޖެ އެވެ.
މަލީހު މިއަދު "އަދަދު" އަށް ވިދާޅުވީ، މިހާރު ވެެރިކަމުގައި އޮތް ޕީއެންސީއަކީ ރައީސް ޔާމީން އިސްވެ އުފެއްދެވި ޕާޓީ އެއް ކަމަށެވެ. އަދި މި ވެރިކަމަކީ ވެސް އެމަނިކުފާނަށް ބަޔަކު ވޯޓު ދެއްވައިގެން އައި ވެރިކަމެއް ކަމަށާއި، އެހެންކަމުން ރައީސްއާ ޗެލެންޖުކުރުމުގެ ވިސްނުން އެ ޕާޓީން ނުގެންގުޅޭނެ ކަމަށެވެ.
"[ޕީއެންއެފްއިން މި] ސަރުކާރު ދިފާއު ކުރާނީ، އެ ސަރުކާރު ނުދެއްކޭ ވާހަކަތައް ދައްކަން ޒިންމާދާރު ޕާޓީއެއް މިއީ. މި ޕާޓީގައި ތިއްބަވާނީ ޕީޕީއެމް/ޕީއެންސީގެ އެމަނިކުފާނަށް [ޔާމީނަށް] ތާއީދު ކުރާ މީހުން،" މަލީހު ވިދާޅުވި އެވެ.
މަލީހު ވިދާޅުވީ ޔާމީނުގެ ޕީއެންއެފަކީ ޕީޕީއެމް/ޕީއެންސީއާ ޗެލެންޖު ކުރުމަށް އުފައްދާ ޕާޓީއެއް ނޫން ކަމަށާއި އަބަދުވެސް މަސައްކަތް ކުރާނީ ސަރުކާރު ޒިންމާދާރުކުރުމަށް ކަމަށެވެ.
ޕީއެންއެފް އުފެއްދުމުގެ ހުއްދައަށް އެދުމުން މިދިޔަ ނޮވެމްބަރު 29، ގައި އިލެކްޝަން ކޮމިޝަނުން ވަނީ ހުއްދަ ދީފަ އެވެ. މިހާރު ކުރިއަށް ދަނީ ޕާޓީ އުފެއްދުމަށް ބޭނުންވާ އަދަދަށް މެންބަރުން ހަމަކުރުމުގެ މަސައްކަތެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް މުއިއްޒު ވިދާޅުވީ، ވެރިކަން ކުރާ ކޯލިޝަންއާ ޔާމީނު ދުރަށް ޖެހިވަޑައިގަތް ނަމަވެސް ދެ ޕާޓީގެ ގިނަ މެންބަރުން ތިބީ އެމަނިކުފާނާއެކު ކަމަށެވެ.
"އަޅުގަނޑަށް ގަބޫލުކުރެވެނީ, ރާއްޖޭގެ ރައްޔިތުން ތިއްބެވީ އަޅުގަނޑާ އެކީގައި, އަޅުގަނޑުމެންގެ ޓީމާ, ޕީޕީއެމް/ޕީއެންސީއާ އެކީގައި. ކުރިއަށް އޮތް ރައްޔިތުންގެ މަޖިލީހުގައި އަޅުގަނޑުމެންނަށް އިރާދަކުރެއްވިއްޔާ ތިން ބައިކުޅަ ދެބައި ދެއްވާނެ،" ރައީސް ވިދާޅުވި އެވެ.
ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާތީީ ނިމިދިޔަ ރިޔާސީ އިންތިހާބުގައި ރައީސް ޔާމީނަށް ވާދަ ނުކުރެވޭނެ ކަމަށް ސުޕްރީމް ކޯޓުން ނިންމުމާއެކު ދެ ޕާޓީގެ ސެނެޓުން ވާދަކުރާނެ ބޭފުޅަކު ނިންމަން ހުޅުވާލި ހިސާބުން ރައީސް މުއިއްޒު ޝައުގުވެރިކަން ފާޅުކުރެއްވި އެވެ. އޭގެ ކުރިން ވެސް މުއިއްޒު އިންތިހާބުގައި ވާދަކުރައްވާނެކަމުގެ އަޑުތައް ފެތުރެމުން ދިޔަ އެވެ.
ރައީސް މުއިއްޒު ވެރިކަމަށް ވަޑައިގަތުމަށް ކުރެއްވި ކެމްޕޭނުގައި އެންމެ ގިނައިން ދެއްކެވީ ރައީސް ޔާމީން މިނިވަންކުރުމުގެ ވާހަކަތަކެވެ. އަދި ވެރިކަމަށް ވަޑައިގަތަސް ޔާމީނަކީ މުހިންމު ބޭފުޅަކަށް ވާނެ ކަމަށް ވިދާޅުވެ، އެމަނިކުފާނަށް ދޭ ވޯޓަކީ ޔާމީނަށް ދޭ ވޯޓެއްކަން ސިފަވާ ގޮތަށް ގިނަ ވާހަކަތަކެއް ދެއްކެވި އެވެ.
