ބޭންކް އޮފް މޯލްޑިވްސް (ބީއެމްއެލް) ގެ އެހީއާއެކު، ނޭޝަނަލް ލައިބްރަރީ ތަރައްގީކޮށް ގެނެސްފައިވާ ޒަމާނީ ބަދަލު އެ ބޭންކުގެ ސީއީއޯ ކާލް ސްޓުމްކަ މިއަދު ބައްލަވާލައްވައިފި އެވެ.
ބީއެމްއެލްގެ އެހީތެރިކަމާއެކު، ނޭޝަނަލް ލައިބްރަރީ ޒަމާނީ ފެންވަރަށް ތަރައްގީ ކުރަން ކުރިއަށްގެންދިޔަ މަޝްރޫއު މިދިޔަ ޖެނުއަރީގައި ވަނީ ނިންމާލާފަ އެވެ. މީގެ ދެ އަހަރު ކުރިން 2021 ވަނަ އަހަރު ފެށި އެ މަސައްކަތަކީ ބީއެމްއެލްގެ 40 ވަނަ އަހަރީ ދުވަހާ ގުޅުވައިގެން ހިންގި މަޝްރޫއެކެވެ.
ބީއެމްއެލްގެ ސީއީއޯ ކާލް ސްޓުމްކަ ވަނީ މިއަދު ލައިބްރަރީއަށް ޒިޔާރަތްކުރައްވައި އެތަނުގައި މަސައްކަތް ހިނގަމުންދާ ގޮތް ބައްލަވާލައްވާފަ އެވެ.
ބީއެމްއެލްގެ އެހީގައި ލައިބްރަރީގައި ކުރެވުނު މަސައްކަތްތައް:
- ފުރަތަމަ ފަހަރަށް ލައިބްރަރީގައި ޒަމާނީ ސެކިއުރިޓީ ގޭޓެއް ގާއިމުކުރުން
- ފޮތް ކިޔުމަށް އާންމުކޮށް ބޭނުންކުރާ ތަން ތަރައްގީކުރުން
- ޒަމާނީ ވަސީލަތްތަކާއެކު މުޅިން އަލަށް އޯޑިއޯ ރިކޯޑުކުރެވޭނެ ބޫތެއް ގާއިމްކުރުން
- ގައުމީ ތަރިކައާ ގުޅުންހުރި ލިޔުންތަކާއި ފޮތްތައް ހުންނަ ކޮޓަރި ތަރައްގީކުރުން
- ލައިބްރަރީގައި ހުރި ފޮތްތަކާއި ލިޔުންތައް ޑިޖިޓަލްކުރުމުގެ މަސައްކަތަށް ބޭނުންވާ ހާއްސަ ސްކޭނަރެއް ބެހެއްޓުން
- މަޝްވަރާތައް ކުރަން ހާއްސަކޮށްފައިވާ ބައި ތަރައްގީކުރުން
- ސައިލެންޓް ރީޑިން ރޫމް ތަރައްގީކުރުން
- ދިރާސާތައް ކުރުމަށް ހާއްސަކޮށްފައިވާ ކޮޓަރި ތަރައްގީކުރުން
- ލައިބްރަރީގެ ހިދުމަތް ހޯދާ ފަރާތްތަކުން ބޭނުންކުރާ ކޮމްޕިއުޓަރުތައް އަޕްގްރޭޑުކުރުން
- ލައިބްރަރީގެ އިނގިރޭސިފޮތް ބަހައްޓާފައި ހުންނަ ސެކްޝަން ތަރައްގީކުރުން
ބީއެމްއެލްއިން ބުނެފައިވާ ގޮތުގައި އެ ބޭންކުން ޕްރޮޖެކްޓުތައް ހިންގާއިރު އެންމެ ބޮޑަށް ބަލަނީ ގިނަ ބަޔަކަށް އޭގެ ސަބަބުން މަންފާ ކުރާނެ ކަންކަމަށެވެ. އެގޮތުން، ނޭޝަނަލް ލައިބްރަރީ ތަރައްގީ ކުރުމަކީ ގައުމުގެ ތާރީހު ފަހަށް ރައްކާކުރުމަށް މުހިންމު ކަމެއް ކަމަށާއި މީގެ ސަބަބުން ކުރިމަގުގެ ޖީލުތަކަށް ވެސް ފައިދާވާނެ ކަމަށް ބޭންކުން ބުނެފައިވެ އެވެ.
