ރައްޔިތުންގެ މަޖިލީހުގައި ސަރުކާރު ތަމްސީލްކުރާ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ)ން ކަމަށް މަޖިލީހުގެ ރިޔާސަތުން ކަނޑައަޅައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގެ ޖަލްސާގައި މަޖިލީހުގެ ރައީސް މުހައްމަދު އަސްލަމް ވިދާޅުވީ މަޖިލީހުގައި ސަރުކާރު ތަމްސީލުކުރާނީ ޕީއެންސީ ކަމަށާއި އެޕާޓީގެ ޕާލަމެންޓްރީ ގްރޫޕްގެ ލީޑަރަކީ ފެލިދޫ ދާއިރާގެ މެމްބަރު ފަޒުލް ރަޝީދު ކަމަށެވެ.
އާ ރައީސް ޑރ މުހައްމަދު މުއިއްޒުގެ ކެބިނެޓާއި އެކި މަގާމްތަކަށް ވަޑައިގަތުމަށް ޕީއެންސީގެ ތިން މެމްބަރުން އިސްތިއުފާ ދެއްވި އެވެ. އެއާއެކު މި ވަގުތު މަޖިލީހުގައި ތިއްބެވީ ސަރުކާރު ނިސްބަތްވާ ޕާޓީ، ޕީއެންސީގެ ދެ މެމްބަރުންނެވެ. އެއީ ފަޒުލްގެ އިތުރުން މިއަހަރުގެ އޮކްޓޫބަރު މަހު ތެރޭ އެ ޕާޓީއަށް ސޮއިކުރެއްވި ތުލުސްދޫ ދާއިރާގެ މެމްބަރު އިބްރާހިމް ނަސީމެވެ.
ޕީޕީއެމް މެމްބަރުންގެ ގޮތުގައިވެސް މަޖިލީހުގައި މިހާރު ތިއްބެވީ ދެ މެމްބަރުންނެވެ. އެއީ އޭދަފުށީ ދާއިރާގެ މެމްބަރު އަހުމަދު ސަލީމާއި މަހިބަދޫ ދާއިރާގެ މެމްބަރު އަހުމަދު ތޯރިގެވެ.
މަޖިލީހުގައި މިވަގުތު އެމްޑީޕީގެ 56 މެމްބަރުންނާއި އެމްޑީޕީން ވަކިވެގެންދިޔަ ޑިމޮކްރެޓްސްގެ 13 މެމްބަރުން ތިއްބެވި އެވެ.
އާ ސަރުކާރުގެ މަގާމްތަކަށް ވަޑައިގަތުމަށް 6 މެމްބަރުން އިސްތިއުފާ ދެއްވުމާއެކު މިވަގުތު މަޖިލީހުގައި ތިއްބެވީ 81 މެމްބަރުންނެވެ.
