ޔަމަނުގެ ހޫތީންނަކީ ޓެރަސްޓި ޖަމާއަތެއް ކަމަށް އަލުން ކަނޑައެޅުމާމެދު ވިސްނަމުން ދާކަމަށް އެމެރިކާގެ ވައިޓްހައުސްއިން ބުނެފި އެވެ.
އެމެރިކާގެ ނެޝަނަލް ސެކިއުރިޓީ ކައުންސިލުގެ ތަރުޖަމާނު، ޖޯން ކާބީ ވިދާޅުވީ ދުނިޔޭގެ އެންމެ މުހިންމު އެއް ޓުރޭޑު ރޫޓު އޮންނަ ރަތް ކަނޑުގައި ދަތުރު ކުރަމުންދިޔަ މުދާ އުފުލާ ބޯޓެއް ހިފަހައްޓައި ހޫތީންގެ ބާރުގެ ދަށަށް ގެންދިއުމަކީ ފޭރުމުގެ އަމަލެއް ކަމަށާއި މިފަހަކަށް އައިސް ކުށެއް ނެތް އާންމުންނަށް އަމާޒުކޮށް ހޫތީން ހަމަލާތައް ދެމުންދާ ކަމަށެވެ. އޭނާ ވަނީ ހޫތީންގެ އަމަލުތައް ހަރުކަށި އިބާރާތުން ކުށްވެރި ކުރައްވައިފަ އެވެ.
ޓެރަސްޓު ޖަމާއަތްތަކުގެ ލިސްޓުން ހޫތީން އުނި ކުރީ ހަނގުރާމައިގެ ސަބަބުން ސުންނާފަތިވެފައިވާ ޔަމަނަށް، އެހީ ވެއްދުމުގައި ކުރިމަތިވަމުންދިޔަ ގޮންޖެހުންތަކުގެ ސަބަބުން އެހީ ފޯރުކޮށްދޭ ޖަމާއަތްތަކާއި އދ ގެ ފާޑުކިޔުންތައް އަމާޒުވުމުން އެމެރިކާގެ މިހާރުގެ ސަރުކާރުންނެވެ.
ޔަމަނުގެ ވެރި ރަށް، ސައްނާއާއި އުތުރުގެ ބޮޑު ބައެއްގެ މައްޗަށް ބާރު ފޯރުވަނީ އިރާނުގެ އެހީތެރިކަމާއެކު ހަރަކާތްތެރިވާ ކަމަށް ހުޅަނގުން ތުހުމަތު ކުރާ، ހޫތީންނެވެ. އެމީހުން ވަނީ ގާޒާއަށް ދެމުންގެންދާ ހަމަލާތަކަށް ރައްދު ދިނުމުގެ ގޮތުން ފާއިތުވި ހަފުތާތަކުގެ ތެރޭގައި އިޒްރޭލަށް މިސައިލާއި ޑުރޯން ހަމަލާތައް ދީފަ އެވެ. އަދި ރަތް ކަނޑުން ދަތުރު ކުރާ އިޒްރޭލާއި އިޒްރޭލަށް ވާގިވެރިވާ ގައުމުތަކުގެ ހުރިހާ އުޅަނދެއް ހިފަހައްޓާނެ ކަމުގެ އިންޒާރު ވެސް ހޫތީން ދީފައިވެ އެވެ.
އެގޮތަށް އިންޒާރު ދިނުމަށްފަހު ހޫތީން ވަނީ މިދިޔަ އާދީއްތަ ދުވަހު ރަތް ކަނޑުން ދަތުރު ކުރަމުންދިޔަ "ގެލެކްސީ ލީޑާ" އެމީހުންގެ ބާރުގެ ދަށަށް ގެންގޮސްފަ އެވެ.
އެ ބޯޓަކީ އިޒްރޭލުގެ ވިޔަފާރިވެރިޔާ، އަބްރަހަމް ރާމީ އުންގަރްއާ ގުޅުން އޮންނަ ބޯޓެކެވެ. ނަމަވެސް ބޯޓު އޮޕަރޭޓު ކުރަމުންދަނީ ޖަޕާނުގެ ފާމަކުންނެވެ. ޖަޕާނުން ދަނީ ބޯޓު މިނިވަން ކުރުމުގައި އެއްބަސްވުމަކަށް އާދެވޭތޯ، ހޫތީންނާ މަޝްވަރާ ކުރުމަށް މަސައްކަތް ކުރަމުންނެވެ.
ހޫތީންގެ ބާރުގެ ދަށަށް "ގެލެކްސީ ލީޑާ" ގެނައި އިރު، އޭގައި ފަޅުވެރިންގެ ގޮތުގައި 25 މީހުން ތިބި ކަމަށް މީޑިއާތަކުން ރިޕޯޓު ކުރެ އެވެ. ޖޯން ކާބީ ވަނީ އެއްވެސް ޝަރުތެއް ނެތި އެމީހުން މިނިވަން ކުރުމަށް ގޮވައިލައްވައިފަ އެވެ. ނަމަވެސް ބޯޓު މިނިވަން ކުރެވެން އޮންނާނެ ހަމައެކަނި ގޮތަކީ ގާޒާއަށް އިޒްރޭލުން ދެމުންގެންދާ ހަމަލާތައް އެއްކޮށް ހުއްޓައިލުން ކަމަށް މީގެ ކުރިން ހޫތީން ވަނީ ބުނެފަ އެވެ.
