ލަންޑަން (ނޮވެމްބަރު 22) - އެއް ވިޔަފާރިއެއްގެ ދަށުން ހިންގާ ކްލަބްތަކުން ލޯން ޑީލުތަކުގެ ސިފައިގައި ކުޅުންތެރިން ޓްރާންސްފާ ކުރާ ކުރުން ނިމުމަކަށް ގެންނަން ޕްރިމިއާ ލީގުން ކުރި މަސައްކަތް ނާކާމިޔާބުވެއްޖެ އެވެ.
އިނގިރޭސި ޕްރިމިއާ ލީގުން ނެގި ވޯޓުގައި އެ ޑީލުތައް ހުއްޓުވަން ވޯޓު ދީފައިވަނީ 13 ކްލަބުންނެވެ. ގަވާއިދު ފާސްކުރަން ވޯޓު ބޭނުންވާ އަދަަދަކީ 14 އެވެ. ހަތް ކްލަބުން ނިންމީ އެ އެ ގަވާއިދު ނުގެނެސް މިހާރު ވެސް އޮންނަ ގޮތަށް އެއް ނެޓްވޯކެއްގެ ދަށުން ހިންގާ ކްލަބްތައް ޓްރާންސްފާ ކުރެވޭ ގޮތަށް ބޭއްވުމަށެވެ.
މިއާ އެކު، ޖެނުއަރީ ޓްރާންސްފާ މާކެޓްގައި ނިއުކާސަލް ޔުނައިޓެޑަށް، ސައުދީ ޕްރޯ ލީގުގެ އަލް-ހިލާލް އަށް ކުޅެމުން އަންނަ ކުޅުންތެރިން ކުރި ލޯން ޑީލެއްގެ ދަށުން ގެނެވޭނެ އެވެ. އަލް-ހިލާލް އާއި ނިއުކާސަލް ޔުނައިޓެޑް ހިންގަނީ ސައުދީ ޕަބްލިކް އިންވެސްޓްމަންޓް ފަންޑް (ޕީއައިއެފް) އިންނެވެ. އަލް ހިލާލް އަށް ކުޅޭ ޕޯޗުގީސް މިޑްފީލްޑަރު، ރުބެން ނެވޭސް، ނިއުކާސަލަށް ލޯން ޑީލެއްގައި ގެންނަ ގޮތަށް އަންނަނީ މަޝްވަރާ ކުރަމުންނެވެ.
މީގެ އިތުރުން، ކްރިސްޓަލް ޕެލަސް އާއި ފްރާންސްގެ ލިޔޯންގެ މެދުގައި ވެސް ލޯން ޑީލްތަކެއް ހިނގާނެ ކަމަށް ރިޕޯޓްތައް ބުނެ އެެވެ.
