ވެރިކަމާ ހަވާލުވެވަޑައިގެންނެވި ރައީސް ޑރ. މުހައްމަދު މުއިއްޒުގެ ސަރުކާރުގެ މަސައްކަތްތައް ކުރިއަށްގެންދިޔުމަށް ރައްޔިތުންގެ މަޖިލީހުން ފުރިހަމަ އެއްބާރުލުން ދެއްވާނެ ކަމުގެ ޔަގީންކަން އެ މަޖިލީހުގެ ރައީސް މުހައްމަދު އަސްލަމް ދެއްވައިފި އެވެ.
މިއަދު ހަވީރު ޖުމްހޫރީ މައިދާނުގައި ބޭއްވި ރައްޔިތުންގެ މަޖިލީހުގެ ހާއްސަ ޖަލްސާގައި ޑރ. މުއިއްޒު ވަނީ ވެރިކަމުގެ ހުވާ ކުރައްވާފަ އެވެ. އަރިހުގައި މަޖިލިސް ރައީސްގެ ހައިސިއްޔަތުން ހުންނެވީ އަސްލަމް އެވެ.
އެ ޖަލްސާގައި ދެއްކެވި ވާހަކަފުޅުގައި އަސްލަމް ވަނީ މިއީ ދިވެހި ޖުމްހޫރިއްޔާއަށް ތާރީހީ ދުވަހެއް ކަމަށާއި، ދިވެހި ބަރުލަމާނަށް ވަރަށް ތާރީހީ ޖަލްސާއެއް ކަމަށް ވިދާޅުވެފަ އެވެ. އަދި, އާ ރައީސް އާއި އެމަނިކުފާނުގެ ނައިބު ރައީސްގެ ހުވާ ކުރެއްވި މަޖިލީހުގެ ކުރީގެ މެމްބަރު ހުސައިން މުހައްމަދު ލަތީފަށް އަސްލަމް މަރުހަބާ ދެންނެވި އެވެ.
"ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅުއްވަން ހުރި ކަންކަން ނުވަތަ މަޖިލީހުގައި އެދޭ ކަންކަން، މަޖިލީހުގެ ނިޒާމުގެ ތެރޭގައި ކުރިޔަށް ގެންދިޔުމުގައި، ދިވެހިރާއްޖޭގެ ގާނޫނުއަސާސީ އާއި ގާނޫނުތަކާއި އަދި ރައްޔިތުންގެ މަޖިލީހުގެ ގަވާއިދުގެ ތަރަހައިގެ ތެރެއިން ވީ އެންމެ ރަނގަޅަކަށް ކުރިޔަށް ގެންދާނެ ކަމުގެ ޔަގީންކަން އަރުވަން," އަސްލަމް ވިދާޅުވި އެވެ.
ރައްޔިތުންގެ ލާބަ އާއި މަންފާ އަށް ކުރަންޖެހޭ އެންމެހާ ކަންކަމަށް ރައްޔިތުންގެ މަޖިލީހުން ކުރަންޖެހޭ ކަންކަން ކުރުމުގައި އެއްބާރުލުން ދޭނެ ކަމަށް އަސްލަމް ވިދާޅުވި އެވެ.
އެގޮތުން, މަޖިލީހުން ކުރިއަށް އޮތް ދުވަސްތަކުގައި ކުރަން އޮތީ މުހިންމު މަސައްކަތްތަކެއް ކަމަށާއި އެ މަސައްކަތްތައް ނިންމުމަށް މަސައްކަތް ކުރައްވާނެ ކަމަށް އޭނާ ވިދާޅުވި އެވެ. އަސަލަމް ފާހަގަކުރެއްވީ 2024 ގެ ބަޖެޓުގެ މަސައްކަތްތަކެެވެ.
"ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގައި ބަޔާންކުރާ މުއްދަތުގެ ކުރިން އަޅުގަނޑުމެންގެ އަންނަ އަހަރަށް ލަފާކުރާ ބަޖެޓުގެ މަސައްކަތް ނިންމާނެ ކަމުގެ ޔަގީންކަން އަރުވަން," އަސްލަމް ވިދާޅުވި އެވެ.
"ދިވެހި ލޮބުވެތި ރައްޔިތުންގެ އުއްމީދަކީ، އަދި އެދުމަކީ އެ ރައްޔިތުންނާއި މުޅި ގައުމުގެ ލާބަ އާއި މަންފާ އަށް ދައުލަތުގެ ބާރުތަކުން މަސައްކަތް ކޮށްދިނުން. ހިދުމަތް ކޮށްދިނުން,"
ރައްޔިތުންގެ މަޖިލީހުގައި މިވަގުތު ތިއްބަވާނީ ސަރުކާރު ހިންގާ ކޯލިޝަނުގައި އޮތް ޕާޓީތަކުގެ މަދު މެމްބަރުންތަކެކެވެ. މަޖިލިސް 19 އަށް ހޮވުނު ޕީޕީއެމް/ޕީއެންސީ ކޯލިޝަނުގެ ގިނަ މެމްބަރުންތަކެއް މިރޭ ކެބިނެޓުގެ ހުވާ ކުރައްވާނެ އެވެ.
އެހެންކަމުން, އިދިކޮޅުގައި އޮންނާނީ ނިމިގެންދިޔަ ވެރިކަން ކުރި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އެވެ. އަސްލަމް ވެސް ނިސްބަތްވެވަޑައިގަންނަވާ އެ ޕާޓީގެ މެޖޯރިޓީއެއް މަޖިލީހުގައި އެބައޮތެވެ.
އާ ސަރުކާރުގެ ކެބިނެޓަށް މިރޭ މެމްބަރުން އައްޔަނުކުރާއިރު މަޖިލީހުގެ ރުހުން ހޯދަން ޖެހޭނެ އެވެ. ބެލެވޭ ގޮތުގައި ވެރިކަން ބަދަލުވެ އާ ސަރުކާރަށް ފުރުސަތު ދިނުމުގެ ގޮތުން ބަޖެޓު ފާސްކޮށް އާ ކެބިނެޓަށް އެމްޑީޕީން ރުހުން ދޭނެ އެވެ.
