ސަރުކާރު ހިއްސާވާ ކުންފުނިތަކުގެ ތެރެއިން އަށް ކުންފުންޏެއްގެ މެނޭޖިން ޑިރެކްޓަރުންނަށް އައްޔަން ކުރާނީ އަންހެނުން ކަމަށް، އާ ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ރާއްޖޭގެ އަށް ވަނަ ރައީސުލްޖުމްހޫރިއްޔާގެ ގޮތުގައި ހުކުރު ދުވަހު ހުވާކުރައްވައި ވެރިކަމާ ހަވާލުވެވަޑައިގަންނަވާ މުއިއްޒު، ޒުވާނުންގެ މަރުކަޒުގައި ނޫސްވެރިންނާއެކު ބޭއްވި ބައްދަލުވުމުގައި ވިދާޅުވީ ޕަބްލިކް ސާވިސް މީޑިއާގެ މެނޭޖިން ޑިރެކްޓަރަކަށް އައްޔަން ކުރައްވާނީ އަންހެނެއް ކަމަށެވެ. އެ މަގާމަށް އައްޔަން ކުރައްވާ ބޭފުޅާ ރޭގެ ބައްދަލުވުމުގައި ނޫސްވެރިންގެ މޭޒުގައި އިންނެވި ކަމަށް އާ ރައީސް ފާހަގަ ކުރެއްވި އެވެ.
އަދަދު ނޫހަށް އެނގިފައިވާ ގޮތުގައި ޕީއެސްއެމްގެ މެނޭޖިން ޑިރެކްޓަކަށް ހަމަޖައްސަނީ، ކުރިން ޑީއާރުޕީ އަދި ފަހުން ބްރޯޑްކާސްޓިން ކޮމިޝަންގެ މެމްބަރުކަށް ހުންނެވި ޒީނާ ޒާހިރެވެ.
ބްރޯޑްކާސްޓިން ކޮމިޝަނަށް ދިޔުމަށްޓަކައި ނޫސްވެރިކަމުގެ ކެރިއަރު މެދުކަނޑާލި އެވެ. ވެބްސައިޓެއް ހައްދަވައިގެން ނޫސްވެރިކަން އަލުން އޭނާ ފެއްޓެވީ ބްރޯޑްކާސްޓިން ކޮމިޝަންގެ މެމްބަރުކަމުން 2020 ވަނަ އަހަރުގެ ފަހުކޮޅު އިސްތިއުފާ ދެއްވުމަށް ފަހު އެވެ.
ޒީނާ ހުންނެވި ބްރޯޑްކާސްޓިން ކޮމިޝަނަކީ ރާއްޖޭގެ މީޑިއާގެ ތާރީހުގައި ޓީވީތަކަށް އެންމެ ބޮޑަށް ފިޔަވަޅު އެޅި ކޮމިޝަނެވެ. ނޫސްވެރިންގެ ހައްގުތައް ހިމާޔަތްކުރުމުގެ ބަދަލުގައި އޭރު އެ ކޮމިޝަނުން ދިޔައީ ޓީވީތައް ބޮޑެތި އަދަދުތަކުން ޖޫރިމަނާ ކުރަމުންނެވެ. ޓީވީތަކުން ބައެއް ކޮންޓެންޓު އޮންއެއާކުރުން ހުއްޓުވި އެވެ.
"މަތިފަޑީގައި އަންހެން ބޭފުޅުން އިތުރުކުރުމަކީ އަޅުގަނޑުގެ ވައުދެއް،" މުއިއްޒު ވިދާޅުވި އެވެ.
އަންނަ އަހަރު ބާއްވާ ވިހި ވަނަ ރައްޔިތުންގެ މަޖިލީހަށް ވެސް ވީހާ ވެސް ގިނަ އަންހެނުން ވާދަ ކުރެއްވުމަށް ވެސް މުއިއްޒު އެދިވަޑައިގަތެވެ.
އާ ސަރުކާރުގެ ކެބިނެޓުގައި ވެސް ތިން މިނިސްޓަރުން ހިމެނޭކަން ވަނީ އެނގިފަ އެވެ.
