ލަންޑަން (ނޮވެމްބަރު 12) - އިނގިރޭސި ޕްރިމިއާ ލީގުގައި އާސެނަލް އާއި މެންޗެސްޓާ ޔުނައިޓެޑް ރޭ ކުޅުނު މެޗުތައް ކާމިޔާބުކުރިއިރު، ވުލްވްސް އަތުން ފަހު ވަގުތު ޓޮޓެންހަމް ބަލިވެއްޖެ އެވެ.
ލީގުގައި ރޭ އާސެނަލުން ވަނީ އަމިއްލަ ދަނޑުގައި 3-1 އިން ބާންލީ ބަލިކޮށްފަ އެވެ. ލޫޓަން އަތުން 1-0 އިން ޔުނައިޓެޑް މޮޅުވިއިރު، އިތުރު ވަގުތުގައި ޖެހި ދެ ގޯލާއިއެކު ޓޮޓެންހަމް ވުލްވްސް އަތުން ބަލިވީ 2-1 އިންނެވެ.
މި ނަތީޖާތަކާ އެކު އާސެނަލް ވަނީ ޕްރިމިއާ ލީގު ތާވަލްގެ ދެ ވަނައަށް ޖެހިލާފަ އެވެ. އެއް މެޗު މަދުން ކުޅެ އެއް ވަނައިގައި އޮތް ސިޓީއަށް 27 ޕޮއިންޓް ލިބިފައިވާއިރު، އާސެނަލް ވެސް ދެ ވަނައިގައި އޮތީ 27 ޕޮއިންޓް ހޯދައިގެންނެވެ. ސިޓީ މިރޭ ނުކުންނާނީ ޗެލްސީއާ ދެކޮޅަށެވެ. ރޭ ވުލްވްސް އަތުން ބަލިވި ޓޮޓެންހަމް ވަނީ ތިން ވަނަ އަށް ވެއްޓިފަ އެވެ. އެޓީމަށް ލިބިފައިވަނީ 26 ޕޮއިންޓެވެ. 21 ޕޮއިންޓާ އެކު މެންޗެސްޓާ ޔުނައިޓެޑް އޮތީ ލީގުގެ ހަ ވަނައިގަ އެވެ.
ބާންލީ އަތުން އާސެނަލް މޮޅުވި މެޗުގައި އެ ޓީމުގެ ގޯލުތައް ޖަހައިދިނީ ލިއަންދްރޯ ޓޮރޮސާޑް، ވިލިއަން ސަލީބާ އަދި އެލެގްސަންޑާ ޒިންޗެންކޯ އެވެ. ބާންލީގެ ހަމައެކަނި ގޯލު ޖަހައިދިނީ ޖޯޝް ބްރައުން ހިލް އެވެ. މި މެޗުގައި ޓްރޮސާޑް ޖެހި ގޯލަކީ އާސެނަލްގެ ދަނޑު، އެމިރޭޓްސްގައި ޖެހި 1000 ވަނަ ގޯލެވެ.
މި މެޗުގައި ވެސް އަނިޔާގެ ސަބަބުން އާސެނަލްގެ ކެޕްޓަން މާޓިން އޮޑެގާޑެއް ނުކުޅެ އެވެ. އަދި ފަހު ވަގުތު ޑިފެންޑަރު ބެން ވައިޓަށް ވެސް މި މެޗުގައި ކުޅެވޭ ގޮތެއް ނުވި އެވެ. އަނެއްކޮޅުން ތޯމަސް ޕާޓޭ އާއި ގެބްރިއެލް ޖެސުސްވެސް ތިބީ ކުޅުމާ ދުރުގަ އެވެ.
މެންޗެސްޓާ ޔުނައިޓެޑުން ލޫޓަން އަތުން މޮޅުވީ ވިކްޓާ ލިންޑެލޮފް ޖެހި ގޯލުންނެވެ. އުނދަގޫ ހާލަތެއްގައި އޮތް ޔުނައިޓެޑަށް މި ލިބުނު މޮޅާއިއެކު ކޯޗު ޓެން ހާގަށް ހިތްހަމަޖެހުމުގެ ނޭވާއެއް ލެވޭނެ އެވެ. ސަބަބަކީ ނަތީޖާތައް ގޯސްވެ ޓެންހާގު މަގާމުން ވަކިކޮށްފާނެކަމަށް އަޑު ފެތުރެމުން އަންނާތީ އެވެ.
ސީޒަންގެ ފުރަތަމަ 10 މެޗުގައި ރަނގަޅު ނަތީޖާތަކެއް ނެރެ ކުރިން އެއް ވަނައިގައި އޮތް ޓޮޓެންހަމް ރޭގެ މެޗަށް ނުކުތީ އަނިޔާއާއި ސަސްޕެންޝަނުގެ ސަބަބުން ޓީމަށް ބޮޑެތި ބަދަލުތަކެއް ގެނެސްގެންނެވެ. މުހިންމު މިޑްފިލްޑަރު ޖޭމްސް މެޑިސަން އަދި މިކީ ވެންޑެވެން އަށް މި މެޗުގައި ނުކުޅެވުނުއިރު، މުހިންމު ދެ ޑިފެންޑަރުންކަމަށްވާ ކްރިސްޓިއަން ރޮމޭރޯ އާއި ޑެސްޓިނީ އުޑޯގީ ތިބީ ސަސްޕެންޝަނުގަ އެވެ.
ވުލްވްސް ކޮޅަށް ފުރަތަމަ ގޯލު ޖެހީ ޓޮޓެންހަމުންނެވެ. ޕެޑްރޯ ޕޮރޯ ނަގައިދިން ހުރަހަކުން މި ގޯލު ޖަހައިދިނީ ބްރެނަން ޖޯންސަން އެވެ. ވުލްވްސްއިން ނަތީޖާ އަނބުރާލީ މެޗުގެ އިތުރު ވަގުތުގަ އެވެ. އިތުރު ވަގުތުގެ އަށް މިނެޓު ރެފްރީ ދެއްކިއިރު، މި އަށް މިނެޓުގެ ތެރޭގައި އެޓީމުން ދެ ގޯލު ޖެހި އެވެ. ފުރަތަމަ ގޯލު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޕަބްލޯ ސަރާބިއާ އެވެ. އެޓީމް މޮޅުވީ މާރިއޯ ލެމީނާ ޖެހި ގޯލުންނެވެ.
ލީގުގައި ރޭ ނިއުކާސަލް ޔުނައިޓެޑުވެސް ވަނީ ބަލިވެފަ އެވެ. ބޯންމައުތު އަތުން 2-0 އިން ނިއުކާސަލް ބަލިވި މެޗުގައި ދެ ގޯލު ވެސް ޖަހައިދިނީ ފޯވާޑް ޑޮމިނިކް ސޮލާންކީ އެވެ.
