އިރާގުގައި ގާއިމުވެތިބި އެމެރިކާ ސިފައިން ތިބޭ މަރުކަޒުތަކަކަށް އަނެއްކާ ވެސް ހަމަލާތަކެއް ދީފި އެވެ.
ގޮވާ ތަކެއްޗާއި ޑްރޯން ބޭނުން ކޮށްގެން ބުރާސްފަތި ދުވަހު ވެސް ތިން ހަމަލާ އެފަދަ މަރުކަޒުތަކަކަށް އަމާޒުވި ކަމަށް އެމެރިކާގެ އަސްކަރިއްޔާގެ މަސްދަރަކާ ހަވާލާދީ ރޮއިޓާސްއިން ރިޕޯޓުކޮށްފައިވެ އެވެ.
އިޒްރޭލުން ފަލަސްތީނުގެ ގާޒާއަށް މެދުކެނޑުމެއް ނެތި ބޮން އަޅައި ދެމުންދާ ހަމަލާތަކުގެ ރައްދެއްގެ ގޮތުން މެދުއިރުމަތީގައި ހުރި އެމެރިކާގެ ބޭސްތަކަށް އަންނަނީ ހަމަލާ ދެމުންނެވެ.
އޮކްޓޯބަރު 7 އިން ފެށިގެން މިހާތަނަށް އެމެރިކާގެ ސިފައިންގެ މަރުކަޒުތަކަށް 40 އަށްވުރެ ގިނަ ހަމަލާ ދީފައިވެ އެވެ. މިހާތަނަށް އެ ހަމަލާތަކުގައި 56 އެމެރިކާ ސިފައިންނަށް އަނިޔާ ލިބިފައިވެ އެވެ.
ހުޅަނގު ބަގުދާދުގައި ހުންނަ ބޭސްއަށް އަމާޒުކޮށް ފޮނުވި ޑްރޯންތައް ވައްޓާލާފައިވާ ކަމަށް އެމެރިކާއިން ބުނެ އެވެ.
މި ހަމަލާތަކުގެ ފަހަތުގައި ވަނީ އީރާން ކަމަށް އެމެރިކާއިން ތުހުމަތު ކުރެ އެވެ. މި ތުހުމަތުތައް އީރާނުން ދޮގުކުރެ އެވެ.
