ޓްރީ ޓޮޕް ހޮސްޕިޓަލުން ފުރަތަމަ ފަހަރަށް އެއްމާބަނޑު ބަލިވެ އިނުމަކުން ދެ ކުދިން ދެ ވަގުތެއްގައި ވިހެއުމުގެ ޕްރޮސީޖާ، އެސިންކްރޮނަސް ޓްވިން ޑެލިވަރީ (އޭޓީޑީ) ކާމިޔާބުކަމާ އެކު ފުރިހަމަ ކޮށްފި އެވެ.
އެ ހޮސްޕިޓަލުން ބުނީ އެސިންކްރޮނަސް ޓްވިން ބާތްސް އަކީ ވަރަށް މަދު ހާލަތްތަކުގައި ދިމާވާ ކަމަކަށް ވުމުން، ދިމާވެދާނެ އުނދަގޫ ހާލަތްތައް އަވަހަށް ދެނެގަތުމުގެ ގޮތުން މައިމީހާގެ ބޭނުންތަކަށް ހާއްސަ ފަރުވާއެއް ފޯރުކޮއްދީފައިވާ ކަމަށެވެ.
ޓްރީޓޮޕްގެ ޑޮކްޓަރުންގެ ޓީމުން ވަނީ މައިމީހާއަށާއި ދަރިފުޅަށް ބަލިވެ އިނުމުގެ މަރުހަލާތަކުގައި ކުރިމަތިވެދާނެ ތަފާތު ރިސްކުތަކުގެ ސަބަބުން ފަރުވާތެރިކަމާއިއެކު ގަވާއިދުން ބެލުމަށް ހާއްސަ ސަމާލުކަމެއް ދީފަ އެވެ.
އޭގެ އިތުރުން ސްވިފްޓް އެމަޖެންސީ ސިޒޭރިއަން ފުރިހަމަކުރީ އެ ހޮސްޕިޓަލުގެ ގާބިލު އޮބްސްޓެޓްރިކް އަދި ގައިނެކޮލޮޖިކަލް ޑޮކްޓަރުންގެ ޓީމުން ކަމަށް ޓްރީޓޮޕުން މައުލޫމާތު ދެ އެވެ. އަދި, ވިހެއުމަށް ފަހު ހޮސްޕިޓަލުން ދޫކޮށްލުމާ ހަމައަށް ތުއްތު ދަރިފުޅަށް ބޭނުންވާ ފަރުވާ ދިނުމަށްޓަކައި ޓްރީ ޓޮޕް ހޮސްޕިޓަލްގެ ކުޑަކުދިންގެ ޑޮކްޓަރުން ވަނީ ނިއޯނޭޓަލް އިންޓެންސިވް ކެއާ ޔުނިޓް (އެންއައިސީޔޫ) ގައި އެ ކުދިންނަށް އެންމެ އެކަށޭނަ ފަރުވާ ފޯރުކޮށްދިނުމަށް ފަހު ދުޅަހެޔޮ ސިއްހަތެއްގައި ދޫކޮށްލާފަ އެެވެ.
އެ ޕްރޮސީޖަރު ކާމިޔާބުކޮށްދިނުމުގައި އިސްކޮށް އުޅުއްވީ އޯބްސްޓެޓްރިކްސް އެންޑް ގައިނެކޮލޮޖީގެ ކޮންސަލްޓަންޓް ޑރ. މާރިއާ ކްރިސްޓީނާ އަލްމޮންޓޭ އަދި އޭނާގެ ޓީމާއެކު ނިއޯނެޓޮލޮޖިސްޓުން ކަމުގައިވާ ޑރ. އިންގްރިޑް، ޑރ. ބިޕިން، ޑރ. މުސްތަފާ އަދި ކުޑަކުދިންގެ ޑޮކްޓަރުން ކަމުގައިވާ ޑރ. އެލެސަންދްރާ އެވެ.
އެސިންކްރޮނަސް ޓްވިން ބާތްސް އަކީ ދުނިޔޭގެ އެކިކަންކޮޅުތަކުގައި ވެސް މަދުން ނޫނީ ނުފެންނަ ޕްރޮސީޖަރެއް ކަމުން ޓްރީޓޮޕް ހޮސްޕިޓަލުން މި ކާމިޔާބީ ފާހަގަ ކުރަނީ ރާއްޖޭގެ ސިއްހީ ދާއިރާއަށް ލިބުނު ކުރިއެރުމެއް ގޮތުގަ އެވެ.
ޓްރީޓޮޕުން ބުނީ އެ ހޮސްޕިޓަލުގެ ކޮންމެ ބަލި މީހަކަށް އަދި ހާއްސަކޮއް މާބަނޑުމީހުންނަށް ބަލިވެ އިނުމުގެ ހުރިހާ މަރުހަލާތަކެއް ބެލެހެއްޓުމުގައި ބޭނުންވާ ހާއްސަ ސިއްހީ ފަރުވާ ފޯރުކޮށްދިނުމަށް ހޮސްޕިޓަލްގެ ކުޅަދާނަ ޑޮކްޓަރުންގެ ޓީމްގެ އެންމެ ފުރިހަމަ އެއްބާރުލުން ދޭނެކަމަށެވެ.
ޓްރީޓޮޕް ހޮސްޕިޓަލްގެ ހިދުމަތްތަކާ ގުޅޭ އިތުރު މައުލޫމާތު މި ނަމްބަރަށް ގުޅުއިގެން އަދި މި މެއިލްއަށް އީމެއިލްކޮށްގެން ލިބޭނެ އެވެ.
