ރައްޔިތުންގެ މަޖިލީހުގެ ރައީސްގެ އިތުބާރު ނެތް މައްސަލަ ހުށަހެޅިފައި އޮންނަ ވަގުތު މަޖިލީހަށް ހުށަހެޅޭ މަސައްކަތްތައް މަޑުޖެހޭ ގޮތަށް ގަވައިދުގައި ބަޔާންކޮށްފައިވީ ނަމަވެސް ގާނޫނު އަސާސީގައިވާ ގޮތުގެ މަތިން އިންތިހާބީ ރައީސް ހުވާ ކުރުމަށް އެއްވެސް ހުރަހެއް ނެތް ކަމަށް އެޓާނީ ޖެނެރަލްގެ އޮފީހުން ބުންޏެވެ.
އެޓާނީ ޖެނެރަލްގެ ވަކީލު ފާތިމަތު ހަލީމް އެ ކަން ފާހަގަ ކުރެއްވީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް އެ މަޖިލީހުގެ މެޖޯރިޓީ ޕާޓީ އެމްޑީޕީން ހުށަހަޅާފައިވާ ދުސްތޫރީ މައްސަލައިގެ އަޑުއެހުމުގަ އެވެ.
މަޖިލީހުގެ ގަވައިދުގެ 205 ވަނަ މާއްދާގެ އިޖުރާއަތްތައް ތަރުތީބު ކުރެވިފައިވާ ގޮތުން މަޖިލީހުގެ ރައީސްގެ އިތުބާރު ނެތް މައްސަލައެއްގެ ނޯޓިސް ހަމަވުމަށް ފަހު ދެން އެންމެ އަވަހަށް އޮންނަ ރަސްމީ ބަންދު ދުވަހެއްގައި އެ މައްސަލަ އެޖެންޑާކޮށް ކުރިއަށް ގެންދަން ޖެހެ އެވެ.
އަދި މަޖިލީހަށް ހުށަހެޅިފައިވާ ކަމެއްގެ ބަހުސް ކުރިއަށް ގެންދެވޭނީ އަދި މަޖިލީހުން ގޮތެއް ނިންމަން ޖެހޭ ކަމެއްގައި ގޮތެއް ނިންމޭނީ މަޖިލީހުގެ ރައީސްގެ އިތުބާރު ނެތް ގަރާރާ މެދު ގޮތެއް ނިންމުމަށް ފަހު ކަމަށް އެ ގަވާއިދުގައިވެ އެވެ.
ގާނޫނު އަސާސީގައި ބަޔާންކުރާ ގޮތުން، އިންތިހާބީ ރައީސް މަގާމުގެ ހުވާ ކުރުމުގެ ރަސްމިއްޔާތަކީ ރައްޔިތުންގެ މަޖިލީހުން ބާއްވާ ޖަލްސާއެކެވެ. އެހެންވެގެން އެ ރަސްމިއްޔާތަށް ހުރަސްއެޅޭ ފަދަ މޭރުމަކުން އެމްޑީޕީއަށް ނިސްބަތްވާ ބައެއް މަޖިލިސް މެންބަރުން މީގެ ކުރިން ވާހަކަ ދައްކަވާފައިވެ އެވެ.
އެ ކަން ފާހަގަކޮށް ފަނޑިޔާރު ހުސްނުއްސުއޫދު އަމާޒު ކުރެއްވި ސުވާލުގެ ޖަވާބުގައި އެޓާނީ ޖެނެރަލްގެ ވަކީލު ވިދާޅުވީ މަޖިލީހުގެ ގަވައިދުގައި ވެސް ބަޔާން ކުރަނީ ވަކި ދެ ކަމެއް ނުކުރެވޭނެ ކަމަށެވެ. އެއީ މަޖިލީހަށް ހުށަހެޅިފައިވާ ކަމަކަށް ބަހުސް ކުރުމާއި ފާސްކުރަން އޮތް ކަމެއް ފާސްކުރުމަށެވެ.
އެ ކަންކަމުގެ ތެރޭގައި އިންތިހާބީ ރައީސް ހުވާ ކުރުމުގެ މަސައްކަތް ނުހިމެނެ އެވެ.
"ގާނޫނު އަސާސީގެ 114 ވަނަ މާއްދާގައި އެ ބުނާ ރައީސުލްޖުމްހޫރިއްޔާ ހުވާ ކުރެއްވުމުގެ މަސައްކަތެއް ނުހިމެނޭ، އަދި މިހާރު އޮތް ރައީސުލްޖުމްހޫރިއްޔާގެ ދައުރު ހަމަވުމުން އާ ރައިސުލްޖުމްހޫރިއްޔާ ހުވާ ކުރަން އޮންނަ ދުވަހު ހުވާކުރައްވަން ޖެހޭ ކަމަށް ގާނޫނޫ އަސާސީގައި އޮވޭ،" އޭނާ ވިދާޅުވި އެވެ.
ގާނޫނު އަސާސީގައި ލާޒިމުކުރާ ވަކި ކަމެއް ނުކުރެވޭ ގޮތަށް ގަވައިދެއް ނުހެދޭނެ ކަމަށް ވެސް އޭނާ ވިދާޅުވި އެވެ.
މަޖިލީހުގެ ގަވައިދުގެ 205 ވަނަ މާއްދާގެ ބ. ގައި އޮންނަނީ ރައްޔިތުންގެ މަޖިލީހުގެ ރައީސް މަގާމުން ވަކިކުރުމަށް ހުށަހަޅައިފައިވާ މައްސަލައަށް ގޮތެއް ނިންމުމުގެ ޖަލްސާގެ ރިޔާސަތު ބަލަހައްޓަން ޖެހޭނީ ނައިބު ރައީސް ކަމަށެވެ.
ނައިބު ރައީސަށް ރިޔާސަތު ނުބެހެއްޓޭ ހާލަތެއްގައި ވާނެ ގޮތެއް ގަވައިދުގެ 205 ވަނަ މާއްދާގައި ނޯވެ އެވެ. އެހެންވެ މަޖިލީހުން އެ ކަމަށް އެކަނި ރިއާޔަތްކޮށް، މަޖިލީހުގެ ނައިބު ރައީސް އީވާ އަބްދުﷲ އާލާސްކަންފުޅާ އުޅުއްވާ ކަމަށް ވިދާޅުވެ ސަލާމުގައި ހުންނެވުމުން މަޖިލީހުގެ ޖަލްސާއެއް ވަނީ ކެންސަލް ކޮށްފަ އެވެ.
އެމްޑީޕީން ސުޕްރީމް ކޯޓަށް ހުށަހެޅި މައްސަލާގައި ބުނަނީ ނައިބު ރައީސް ފިޔަވައި އެހެން ބޭފުޅަކަށް ވެސް މަޖިލީހުގެ ރައީސްގެ އިތުބާރު ނެތް މައްސަލަ ގެންދެވޭނެ ކަމަށް ކަނޑައަޅައިދިނުމަށެވެ.
އެއީ މަޖިލީހުގެ ގަވާއިދުގެ 44 ވަނަ މާއްދާއާ ހަވާލާދީ އެވެ. އެ މާއްދާގައި ވަނީ މަޖިލީހުގެ ރައީސާއި ނައިބު ރައީސަށް ރިޔާސަތު ނުބެހެއްޓޭ ވަގުތު ރިޔާސަތު ބަލަހައްޓަން ފަސް މެންބަރަކު ކަނޑައަޅާފައި އޮންނަން ޖެހޭ ކަމެވެ.
މި މައްސަލަ ކުރިއަށް ގެންދަނީ ފަސް ފަނޑިޔާރުންގެ ބެންޗަކުންނެވެ. ރިޔާސަތުގައި އިންނެވީ ފަނޑިޔާރު މަހާޒު އަލީ ޒާހިރެވެ. ދެން ތިއްބެވީ ފަނޑިޔާރު ހުސްނުއްސުއޫދާއި، ފަނޑިޔާރު އަޒްމިރަލްދާ ޒާހިރާއި، ފަނޑިޔާރު އަލީ ރަޝީދާއި، ފަނޑިޔާރު ޑރ. އިބްރާހިމް މުހައްމަދެވެ.
ޝަރީއަތުން މަސައްކަތް ކުރަނީ މިއަދު ހަވީރު 3:00 ޖަހަންވާ އިރަށް އަޑުއެހުންތައް ނިންމުމަށެވެ. ކުރަން ހުރި ބަހުސްތައް ނުނިމޭނަމަ މާދަމާ އަޑުއެހުމެއް ބާއްވާނެ ކަމަށް ވެސް ރިޔާސަތުން އިއުލާން ކުރެއްވި އެވެ.
މި މައްސަލައިގެ ތެރެއަށް މަޖިލީހުގެ ރައީސް ނަޝީދާއި ނައިބު ރައީސް އީވާ ނިސްބަތްވާ ޑިމޮކްރެޓްސް ޕާޓީން ވެސް ވަނީ ތަދައްހުލްވެފަ އެވެ. ޑިމޮކްރެޓްސްއަކީ މިހާރު މަޖިލީހުގެ މައިނޯރިޓީ ޕާޓީ އެވެ.
އަދި އިިންތިހާބީ ރައީސް ޑރ. މުހައްމަދު މުއިއްޒު ނިސްބަތްވާ ޕީޕީއެމް/ޕީއެންސީން ވެސް މައްސަލައަށް ތަދައްހުލްވެފައިވެ އެވެ. ޕީޕީއެމް/ޕީއެންސީގެ ނުވަ މެންބަރަކު ރައްޔިތުންގެ މަޖިލީހުގައި ތިއްބަވަ އެވެ.
