ލޫޓަން (ނޮވެމްބަރު 6) - އިނގިރޭސި ޕްރިމިއާ ލީގުގައި ރޭ ލިވަޕޫލާއި ލޫޓަން ވާދަކުރި މެޗުގައި ގޯލު ޖެހުމަށް ފަހު ފޯވާޑް ލުއިސް ޑިއާޒް އޭނާގެ ބައްޕަ މިނިވަންކޮށްދިނުމަށް ގޮވާލައިފި އެވެ.
ލީގުގައި ލޫޓަން އާއި ލިވަޕޫލް ވާދަކުރި މެޗުން ލިވަޕޫލް ބަލިވާން ދަނިކޮށް އެޓީމް ސަލާމަތްކޮށް ދިނީ ކޮލަމްބިއާގެ އެޓޭކަރު ލުއިސް ޑިއާޒް އެވެ. ޑިއާޒް ލިވަޕޫލަށް ގޯލު ޖަހައިދިނީ މެޗުގެ އިތުރު ވަގުތުގެ ތެރޭގަ އެވެ. މި ގޯލަށް ފަހު ޑިއާޒް ވަނީ މިދިޔަ ހަފުތާގައި ކިޑްނެޕްކުރި އޭނާގެ ބައްޕަގެ މިނިވަންކަމަށް ގޮވާލައިފަ އެވެ.
ލިވަޕޫލަށް ކުޅެމުން އަންނަ ކޮލަމްބިއާގެ ފޯވާޑް ލުއިސް ޑިއާޒްގެ ބައްޕަ ލުއިސް މެނުއެލް ޑިއާޒް ކިޑްނެޕް ކޮށްފައިވަނީ މިދިޔަ މަހުގެ 28 ވަނަ ދުވަހު އެވެ. އެގައުމުގެ އުތުރު ހިސާބެއް ކަމަށްވާ ލަ ގުއަޖީރާގެ ޕެޓްރޯލް ސްޓޭޝަނެއްގައި ހުއްޓާ ސައިކަލްގައި އައި ގޭންގެއްގެ ބަޔަކު ވަނީ ޑިއާޒްގެ ބައްޕަ ކިޑްނެޕްކޮށްގެން ގެންގޮސްފަ އެވެ.
ޑިއާޒްގެ ބައްޕަ ހޯދުމަށް އެގައުމުގެ ފުލުހުންނާއި އަސްކަރިއްޔާއިން ގުޅިގެން ބޮޑު މިލިޓަރީ އޮޕަރޭޝަނެއް ކުރިއަށްގެންދިޔަ އެވެ. ކޮލަމްބިއާގެ އަވަށްޓެރި ވެނެޒުއޭލާއަށް ޑީއާޒްގެ ބައްޕަ ގެންގޮސްފައިވާ ކަމަށް ބެލެވުނު ނަމަވެސް މިދިޔަ ހަފުތާ ބަންދުގައި ކިޑްނޭޕަރުން ވަނީ ޑިއާޒްގެ ބައްޕައާ ގުޅޭ މައުލޫމާތު ހާމަކޮށްފަ އެވެ.
ޑިއާޒްގެ ބައްޕަ ރަހީނުކޮށްފައިވާ ކަމަށް އެއްބަސްވެފައިވަނީ ކޮލަމްބިއާގެ ސަރުކާރާ ދެކޮޅު ހަނގުރާމަވެރި ޖަމާއަތެއް ކަމަށްވާ "ނެޝަނަލް ލިބަރޭޝަން އާމީ (އީއެލްއެން)ގެ ބައެކެވެ. މިކަމަށް މި ގްރޫޕުން އެއްބަސްވެފައި ވާއިރު، ޑިއާޒްގެ ބައްޕަ މާ ގިނަ ދުވަސްތަކެއް ނުވެ ދޫކޮށްލާނެކަމަށް ވެސް އެ ގްރޫޕުން ވަނީ ބުނެފަ އެވެ.
ޑީއާޒްގެ ބައްޕަ ރަހީނުކޮށްފައިވާ މައްސަލައިގައި ލޫޓަން މެޗުގެ ކުރިން ލިވަޕޫލް ކުޅުނު ދެ މެޗުގައިވެސް އޭނާ ނުކުޅެ އެވެ. ރޭގެ މެޗުގައި ޑިއާޒް ކުޅެން ނުކުތީވެސް ފަހު ހާފުގަ އެވެ. މެދުގެ ފަހު 10 މިނެޓެއްހާއިރު ކުޅެން ނުކުތް ނަމަވެސް އޭނާ ވަނީ ލިވަޕޫލް ބަލިވިޔަ ނުދީ ސަލާމަތްކޮށްދީފަ އެވެ.
މި ނަތީޖާގެ ސަބަބުން ލިވަޕޫލް ވަނީ ޕޮއިންޓްގެ ގޮތުން އާސެނަލްއާ އެއްވަރުކޮށް ލީގުގެ ތިންވަނަ އަށް ޖެހިލާފަ އެވެ. އާސެނަލް ވަނީ ހަތަރުވަނައަށް ވެއްޓިފަ އެވެ.
ޕްރިމިއާ ލީގުގައި މިރޭ ކުޅޭ މެޗުގައި ވާދަކުރާނީ ލީގުގެ އެއްވަނައިގައި އޮތް ޓޮޓެންހަމާއި، 13 ވަނައިގައި އޮތް ޗެލްސީ އެވެ.
