އުރީދޫ މޯލްޑިވްސްއިން އިންތިޒާމުކޮށްގެން ބާއްވަމުން އަންނަ "ފަން ރަން" އަދި ޑްރޯން ރޭހެއް އަންނަ ޑިސެމްބަރުގައި ބާއްވަން ނިންމައި، ބައިވެރިވުމުގެ ފުރުސަތު މިއަދު ހުޅުވާލައިފި އެވެ.
މި ރަން ކުރިއަށްދާނީ އަންނަ ޑިސެމްބަރު 22، ގެ ހަވީރު އެވެ.
އުރީދޫ "ފަން ރަން" އިއުލާނުކުރުމުގެ ގޮތުން މިއަދު އުރީދޫ ހެޑް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މައުލޫމާތު ދެއްވަމުން އުރީދޫގެ ޗީފް ކޮމާޝަލް އޮފިސާ، ހުސެއިން ނިޔާޒް ވިދާޅުވީ، ކަލާ ރަންގެ ނަމުގައި ފުރަތަމަ އެ ކުންފުނިން ފެށި މި ހަރަކާތަށް ބޮޑެތި ކުރިއެރުންތަކެއް ލިބިފައިވާކަމަށެވެ. އަދި މިހާރު ފަން ރަންއަކަށް ބަދަލުވެފައިވާ މި ހަރަކާތަށް ވަރަށް ގިނަ ކަންތައްތަކެއް އިތުރު ކުރެވިފައިވާކަން ނިޔާޒް ފާހަގަކުރެއްވި އެވެ.
އެގޮތުން ހާއްސަ ހަރަކާތެއްގެ ގޮތުގައި ޑީޖީއައިގެ ރާއްޖޭގެ ޑިސްޓްރިބިއުޓާ ސްޓެބިސިސްއާއި ގުޅިގެން ޑްރޯން ރޭހެއް ބޭއްވުމަށް ނިންމާފައިވާކަމަށް ނިޔާޒް ވިދާޅުވި އެވެ.
"އަޅުގަނޑުމެން އަބަދުވެސް ބަލަން މި ރަން އޮންނަ ދުވަހު ތަފާތު ކަންތައްތައް ކުރެވޭތޯ. މިދިޔަ ފަހަރު އަޅުގަނޑުމެން މޫދު ކުޅިވަރު ކަހަލަ ހަރަކާތްތައް ކުރިއަށް ގެންދިޔައިން. މިފަހަރު އަޅުގަނޑުމެން ތަފާތުކޮށްލުމުގެ ގޮތުން މި ބާއްވަނީ ޑްރޯން ރޭހެއް،" ނިޔާޒް ވިދާޅުވި އެވެ.
ބިގިނާ އަދި ޕްރޯ ދެ ކެޓަގަރީއަށް ބަހާލައިގެން ބާއްވާ މި ޑްރޯން ރޭސް ބޭއްވުމަށް ހަމަޖެހިފައިވަނީ ޑިސެމްބަރު 22، ގެ ހެނދުނުކަމަށް އުރީދޫއިން މައުލޫމާތުދެ އެވެ.
ނޫސްވެރިންނަށް މައުލޫމާތުދެއްވަމުން ސްޓެބިސިސްގެ މެނޭޖިން ޑިރެކްޓާ އިބްރާހީމް ނާހިދު ވިދާޅުވީ، ރާއްޖޭގައި ފުރަތަމަ ފަހަރަށް ބާއްވާ ޑްރޯން ރޭހުގެ ބައިވެރިއެއްގެ ގޮތުގައި އުރީދޫއާއެކު މަސައްކަތް ކުރުމަކީ، އެ ކުންފުންޏަށް ލިބޭ ފަހުރެއް ކަމަށެވެ.
މީގެ އިތުރުން މިފަދަ ޑްރޯން ރޭހެއް ބޭއްވުމުގެ މަގުސަދަކީ ރާއްޖޭގައި ޑްރޯން ދުއްވުމުގެ ޝައުގުވެރިކަން ހުންނަ މީހުންނަށް އައު ފުރުސަތެއް ހޯދައިދީ، ޝައުގުވެރިކަން އިތުރުކުރުން ކަމަށް ނިހާދު ވިދާޅުވި އެވެ.
"ނިސްބަތުން ރާއްޖޭގަ ވެސް މިހާރު ޑްރޯން ދުއްވުމުގެއ ޝައުގުވެރިކަން ހުންނަ މީހުން ގިނަ. ޑްރޯން ރޭހެއްގެ ގޮތުގަ ގެނެސްގެން ޝައުގުވެރިކަން އިތުރުކުރުން މި ފީލްޑަށް،" ނިހާދު ފާހަގަކުރެއްވި އެވެ.
މި ޑްރޯން ރޭހުގެ ބައިވެރިންނަށް ރޭހުގެ ކުރިން ޓްރެއިނިން ޕްރޮގްރާމްތަކެއް ވެސް ކުރިއަށްގެންދިއުމަށް އުރީދޫއިން ވަނީ ނިންމާފަ އެވެ. އަދި މި ހަރަކާތުގައި ޑްރޯން ދުވުން އަމަލީ ގޮތުން ތަޖުރިބާކޮށްލަން ބޭނުންވާ ފަރާތްތަކަށް އެ ފުރުސަތު ވެސް އޮންނާނެކަން ނިހާދު ފާހަގަކުރެއްވި އެވެ.
މި ރޭހުގެ ކެޓަގަރީތަކުން ވަނަތަކަށް ދާ ފަރާތްތަކަށް ހާއްސަ އިނާމުތަކެއް ކަނޑައެޅިފައިވާކަމަށް އުރީދޫއިން މައުލޫމާތުދެ އެވެ. އެގޮތުން ވަނަތަކަށް ދާ ފަރާތްތަކަށް ޑްރޯން ކެމެރާއެއް ލިބުމުގެ ފުރުސަތު އޮންނާނެކަމަށާއި، އިތުރު ތަފްސީލު ފަހުން ހާމަކުރާނެކަމަށް ނިހާދު ވިދާޅުވި އެވެ.
އުރީދޫ ފަން ރަން އަކީ ހުރިހާ އުމުރުފުރާއަކަށް ހުޅުވާލައިގެން މިގޮތަށް ބޭއްވޭ އެންމެ ބޮޑު އެއް ދުވުމުގެ ހަރަކާތެވެ. މި ދުވުމަކީ ވަކި ވަގުތަކަށް ނިންމަން ޖެހޭ ރޭހަކަށް ނުވާތީ، ހިނގާފައިވިޔަސް، ކޮރަމުންވިޔަސް، ނަށަމުންވިޔަސް ނުވަތަ ދުވެފަވިޔަސް ފުރިހަމަ ކުރެވޭނެ އެވެ.
މި ދުވުމުގެ ތަފާތުކަމަކީ ކޮންމެ އެއް ކިލޯ މީޓަރަކުން އޮބްސްޓަކަލްއަކާއި ކުރިމަތި ލާންޖެހުމެވެ.
އުރީދޫ ފަން ރަން ކިޓުތައް ލިބެން ހުންނާނީ ދެ ކެޓެގަރީއަކުންނެވެ. އެއީ، 100ރ. އަށް ލިބޭ ސްޓޭންޑަޑް ކިޓްސްއާއި 200ރ. އަށް ލިބޭ ފަން ކިޓެވެ. ސްޓޭންޑަޑްގައި ހިމެނޭނީ ފަން ރަން ޓީޝާޓު އަދި އަތުގައި އަޅާ ބޭންޑެވެ. ފަން ކިޓުގައި އުރީދޫ ފަން ރަން ޓީޝާޓާއި ބޭންޑުގެ އިތުރުން ފޮތި ދަބަހާއި އައިނު އަދި ބޮލުގައި އައްސާ ބަންޑާނާ ހިމެނޭނެ އެވެ.
އުރީދޫ އިން މިއަހަރު ކުޅުދުއްފުށީގައި ވެސް ފަން ރަން އެއް ބޭއްވި އެވެ. އެ ފަހަރު 4،000 މީހުން ބައިވެރިވި އެވެ.
