ކުޑަކުދިންނަށް ހާއްސަކޮށްގެން ތައްޔާރުކޮށްފައިވާ "އޯލަ" އެޕްލިކޭޝަން އަށް ސަބްސްކްރައިބް ކުރާއިރު އުރީދޫ އެމް-ފައިސާ އިން ޕޭމަންޓު ދެއްކޭ ގޮތް ހަދައިފި އެވެ.
"އޯލަ" އަކީ ރައްކާތެރި، ފަހި މާހައުލެއްގައި ކުދިވެރިންނަށް ކަމުދާނޭ ހިތްގައިމު ދިވެހި ވާހަކަތައް މެދުނުކެނޑި ފޯރުކޮށްދޭ ކުޑަކުދިންގެ ވާހަކަ އެޕްލިކޭޝަން އެކެވެ. މި އެޕުގައި ކުޑަކުދިންގެ ވާހަކަތަކުގެ އިތުރުން، ކުޑަކުދިންނާ ގުޅޭ ދިވެހި ރައިމްސް ތަކާއި ލަވަތަކުގެ އިތުރުން އެޑިއުކޭޝަނަލް އަދި ހޭލުންތެރިކަން އިތުރުކޮށްދޭ ވީޑިއޯ ވެސް ހުންނާނެ އެވެ.
ކުޑަކުދިންނަށް ހާއްސަ މި އެޕްލިކޭޝަނަށް އުރީދޫ އެމްފައިސާ މެދުވެރިކޮށް ފައިސާ ދެއްކޭ ގޮތް ހަދައި އެކަން ތައާރަފުކުރީ މިއަދު އެވެ.
އެކަމަށްޓަކައި އުރީދޫ ހެޑް އޮފީހުގައި ބޭއްވި ހާއްސަ ހަފްލާގައި ވާހަކަ ދައްކަމުން އުރީދޫގެ ޗީފް ކޮމާޝަލް އޮފިސަރު، ހުސައިން ނިޔާޒް ވިދާޅުވީ ޑިޖިޓަލް ޕްލެޓްފޯމްތަކުގައި އޯލަ ކަހަލަ ދިވެހި އުފެއްދުންތައް ފެންނަމުން ދިއުމަކީ އުފާވެރި މަންޒަރެއް ކަމަށެވެ.
އަދި އުރީދޫއިން އަބަދުވެސް މަސައްކަތް ކުރަނީ ޓެލެކޮމިއުނިކޭޝަންގެ އެންމެ ފަހުގެ ޓެކްނޮލޮޖީއާއި ހިދުމަތްތައް ދިވެހިންނަށް ފޯރުކޮށްދިނުމަށް ކަމަށާއި އެގޮތުން ކަސްޓަމަރުންނަށް ފޯރުކޮށްދޭ ޑޭޓާ ބޭނުންތެރިގޮތުގައި ހޭދަކުރާނެ ގޮތްތަށް ތައާރަފުވުމަކީ މުހިއްމު ކަމެއް ކަމަށް ނިޔާޒު ވިދާޅުވި އެވެ.
އޯލަ އެޕަށް އެމް-ފައިސާ އިންޓަގްރޭޓްކޮށްކުރުމާ ގުޅޭޮތުން މިއަދު ބޭއްވި އިވެންޓް. މިއީ ކުޑަކުދިންގެ ދިވެހި ވާހަކަ އެޕްލިކޭޝަނެއް---ފޮޓޯ: މިރާން ނާޝިމް/އަދަދު
"އެމް-ފައިސާ މެދުވެރިކޮށް އޯލަ އަށް ސަބްސްކްރައިބްކޮށް، އޯލަ ގެ މުއްސަނދި ދިވެހި ކޮންޓެންޓާ އެކު ޒުވާން ޖީލުގެ މެދުގައި ބަހަށް އޮތް ލޯބި އާލާ ކުރުމަށް އިތުރަށް މަގުފަހި ކޮއްދެވިގެން ދިއުމީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. ކުރިއަށް އޮތް ތަނުގައި ވެސް މިފަދަ ދިވެހި އުފެއްދުންތައް އިތުރަށް ކުރިއެރުވުމުގައި އުރީދޫ ގެ އެއްބާރުލުން ލިބިގެންދާނެ." ނިޔާޒު ވިދާޅުވި އެވެ.
އެޕްލިކޭޝަނާ ގުޅޭގޮތުން ވާހަދައްކަމުން އޯލަ މީޑިއާގެ ކްރިއޭޓިވް ލީޑް، ސަމާހަތު އިބްރާހިމް ބުނި ގޮތުގައި މި އެޕްލިކޭޝަނަކީ ކުޑަކުދިންނަށް ހުރިހާ ގޮތަކުން ވެސް ރައްކާތެރި އެޕްލިކޭޝަނެކެވެ. މިވަގުތު އޯލަ ފޮތްހަރުގައި ހުންނާނީ އުމުރުން ހަތް އަހަރުން ދަށުގެ އުމުރު ފުރައަށް ގިންތިކުރެވިފައިވާ ވާހަކަތަކެވެ. ނަމަވެސް ކުރިއަށް އޮތް ދުވަސްތަކުގައި މި އެޕްއަކަށް ކޮންމެ މަހަކު މަދުވެގެން ހަތަރު އާ ކޮންޓެންޓް އިތުރުކުރަން ޕްލޭން ކޮށްފައިވާ ކަމަށް ސަމާހަތް ބުންޏެވެ.
އޯލަ އެޕަށް އެމް-ފައިސާ އިންޓަގްރޭޓްކޮށްކުރުމާ ގުޅޭޮތުން މިއަދު ބޭއްވި އިވެންޓް. މިއީ ކުޑަކުދިންގެ ދިވެހި ވާހަކަ އެޕްލިކޭޝަނެއް--- ފޮޓޯ: މިރާން ނާޝިމް/އަދަދު
"އޯލާ އެޕް އަށް ސަބްސްކްރައިބް ކުރައްވާ ފަރާތްތަކަށް ޕޭމަންޓް މެތަޑެއްގެ ގޮތުގައި އެމް-ފައިސާ އިންޓަގްރޭޓް ކުރެވިގެން ދިއުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. އަދި އެމް-ފައިސާއާ އެކު މި ޕާޓްނާޝިޕްގެ ސަބަބުން ރާއްޖޭގެ އެކި ކަންކޮޅުތަކުގައި ދިރިއުޅޭ އާއިލާތަކަށް އޯލާ އެޕްގެ ތަޖުރިބާ އިތުރަށް ފުރިހަމަ ވެގެން ދިއުމަކީ ޔަގީންކަމެއް," ސަމާހަތު ބުންޏެވެ.
އޯލަ އަޖުމަ ބަލާލަން ބޭނުންނަމަ ލިމިޓެޑް ކޮންޓެންޓުތަކާއެކު ހިލޭވެސް ބޭނުންކޮށްލެވޭއިރު ހުރިހާ ކޮންޓެންޓުތަކަށް އެކްސެސްވެވޭނީ ސަބްސްކްރިބްޝަން ޕްލޭން އެއް އެކްޓިވޭޓުކޮށްލުމުންނެވެ. އެގޮތުން މަހުން މަހަށް، 150ރ ދައްކާލާ ގޮތަށް ނުވަތަ 25 ޕަސެންޓުގެ ޑިސްކައުންޓާއެކު މުޅި އަހަަރަށް އެއްފަހަރާ ވެސް ސަބްސްކްރައިބް ކޮށްލެވޭނެ އެވެ.
