ލަންޑަން (އޮކްޓޯބަރު 28) - ކްރިސްޓަލް ޕެލަސް 2-1 އިން ބަލިކޮށް އިނގިރޭސި ޕްރިމިއާ ލީގުގެ އެއްވަނައިގައި ފަސް ޕޮއިންޓްގެ ލީޑެއް ޓޮޓެންހަމް ހޮޓްސްޕާ އިން ނަގައިފި އެވެ.
ޕްރިމިއާ ލީގުގެ އެއްވަނައިގައި 10 މެޗުން 26 ޕޮއިންޓް ހޯދައިގެން ޓޮޓެންހަމް އޮތްއިރު، ދެވަނަ އަދި ތިންވަނައިގައި އޮތް މެންޗެސްޓާ ސިޓީ އާއި އާސެނަލްއަށް ލިބިފައިވަނީ 21 ޕޮއިންޓެވެ. އެއީ އެއް މެޗު މަދުން ކުޅެގެންނެވެ. ލީގުގެ ހަތަރުވަނައިގައި 20 ޕޮއިންޓާއިއެކު އޮތީ ލިވަޕޫލް އެވެ.
ކްރިސްޓަލް ޕެލަސްގެ ދަނޑުގައި ރޭ ކުޅުނު މެޗުގެ ފުރަތަމަ ދެ ގޯލު ޖެހީވެސް ޓޮޓެންހަމުންނެވެ. ފުރަތަމަ ގޯލަކީ ޖޭމްސް މެޑިސަން ނަގައިދިން ހުރަހެއް ދިފާއުކުރަން އުޅުމުގެ ތެރޭގައި ޕެލަސްގެ ޑިފެންޑަރު ޖޮއެލް ވާޑް އަތުން ބައިކޮޅަށް ވަތް ގޯލެެކެވެ. ޓޮޓެންހަމްގެ ދެވަނަ ގޯލު ޖަހައިދިނީ ކެޕްޓަން ސަން ހުއެން މިން އެވެ. މިއީ މި ސީޒަންގައި ސަން ޖެހި 10 ވަނަ ގޯލެވެ.
މި މެޗުގައި ރަނގަޅު ކުޅުމެއް ދެއްކި ޕެލަސްއަށް ނަތީޖާގެ ފަރަގު ކުޑަކޮށްދިނީ ޖޯޑަން އަޔޫ އެވެ.
ސީޒަންގެ ފުރަތަމަ 10 މެޗުގެ ތެރެއިން އަށް މެޗުން ޓޮޓެންހަމް މޮޅުވެފައިވާއިރު، މިއީ 62 އަހަރުގެ ތެރޭގައި އެޓީމުން ސީޒަންގެ ފުރަތަމަ 10 މެޗު ބަލިނުވެ ނިންމާލި ފުރަތަމަ ފަހަރެވެ. އަދި މިއީ 1960-1961ގެ ސީޒަނަށްފަހު ލީގުގައި އެޓީމްގެ އެންމެ ރަނގަޅު ފެށުމެވެ.
ރޭގެ މެޗުގައި ޓޮޓެންހަމްގެ މިޑްފިލްޑަރު ރޮޑްރިގޯ ބެންޓަންކޫރު ވަނީ މިދިޔަ ފެބްރުއަރީގެ ފަހުން ފުރަތަމަ ފަހަރަށް މެޗެއްގައި ކުޅެން ނުކުމެފަ އެވެ. ބެންޓަންކޫރުގެ ކަކުލަށް ލިބުނު ބޮޑު އަނިޔާއިން ރަނގަޅުވެ އޭނާ ކުޅެން ނުކުތުމަކީ ޓީމަށް ލިިބުނު އިތުރު ހިތްވަރެއްގެ ގޮތުގައި ކޯޗު އަންގޭ ޕޮސްޓެކޮގްލޫ ސިފަކުރެ އެވެ.
ލީގުގައި ހޯދަމުން އަންނަ ރަނގަޅު ނަތީޖާތަކަށް އިޝާރާތްކޮށް ޓޮޓެންހަމްގެ ކޯޗު ޕޮސްޓެކޮގްލޫ ބުނީ ޕްރިިމިއާ ލީގަށް ވާދަކުރާ ޓީމެއްގެ ގޮތުގައި ގިނަ ބަޔަކު ޓޮޓެންހަމް ސިފަކުރި ނަމަވެސް އެޓީމްގެ އަމާޒު ހުރީ މެޗަކަށްފަހު މެޗެއް ކާމިޔާބުކުރުމަށްކަމަށެވެ. ލީގުގެ ވާހަކަ ދައްކާނީ ސީޒަންގެ ފަހުކޮޅަށް ދިޔުމުންކަމަށްވެސް އޭނާ ބުންޏެވެ.
އިނގިރޭސި ޕްރިމިއާ ލީގުގައި މިރޭ ކުޅޭ މެޗުތަކަށް ބަލާއިރު އާސެނަލުން ޝެފިލްޑް ޔުނައިޓެޑާ ދެކޮޅަށ ނުކުންނާނެ އެވެ. ޗެލްސީ އާއި ބްރެންޓްފޯޑު ވާދަކުރާއިރު، ނިއުކާސަލް ޔުނައިޓެޑް ނުކުންނާނީ ވުލްވްސްއާ ދެކޮޅަށެވެ.
