ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކި ކުރަން، ވެރިކަން ހިންގާ އެމްޑީޕީން ހުށަހަޅާފައި އޮތް މައްސަލަ ރަސްމީކޮށް ރައްޔިތުންގެ މަޖިލީހުގެ އެޖެންޑާއަށް ލީ އިއްޔެ އެވެ.
އަންނަ އާދީއްތަ ދުވަހު އެ މައްސަލަ ކުރިއަށް ގެންދަން ތާވަލުކޮށްފައިވާއިރު، ކުރިން ވެއްދި އިތުބާރު ނެތް ކަމުގެ މައްސަލައިގެ ތަޖުރިބާއަށް ބަލާއިރު، އާދީއްތަ ދުވަހުގެ ޖަލްސާ އޮމާންކަމާއެކު ދިޔުމަކީ ނާދިރު ކަމެކެވެ.
މި ނޫހަށް ދެއްވި އިންޓަވިއުއެއްގައި ނަޝީދު ލީޑު ކުރައްވާ ދަ ޑިމޮކްރެޓްސްގެ ޕާލަމެންޓަރީ ގްރޫޕުގެ ލީޑަރު އަލީ އާޒިމް ވިދާޅުވީ، އެމްޑީޕީން ވެސް މަސައްކަތް ކުރަނީ ރީތިކޮށް ނޫން ކަމަށާއި އެ ޕާޓީން ހަޑިކޮށް ކުޅެގެން ނަމަވެސް ޖަލްސާ ހުއްޓުވާނެ ކަމަށެވެ.
"މިކަމަކީ ކުރެވޭނެ ކަމެއް ނޫން. އަޅުގަނޑުމެން ނެތިން ފުރުސަތެއް ވެސް ދޭކަށް އެހާ އަން-ޑިމޮކްރެޓިކްކޮށް މިކަން ކުރާކަށް. އެއް ބަޔަކު ހަޑިކޮށް އުޅެންޏާމު، އަޅުގަނޑުމެން ވެސް ހަޑިކޮށް އުޅެގެން ވެސް މިކަން ވިޔަ ނުދޭނެ. އެބޭފުޅުން ވެސް އެ އުޅެނީ ރީތިކޮށެއް ނޫން މިވަގުތަކު. އެހެންވީމާ އަޅުގަނޑުމެން ވެސް އުޅޭނީ ރީތިކޮށެއް ނޫން،" އާޒިމް ވިދާޅުވި އެވެ.
އެމްޑީޕީން ވެސް އޮތީ މިފަހަރު ދޫ ދިނުމުގެ ރޫހެއްގައެއް ނޫނެވެ. އެ ޕާޓީގެ ޕާލަމެންޓަރީ ގްރޫޕުގެ ރައީސް މުހައްމަދު އަސްލަމް ވިދާޅުވީ، އާދީއްތަ ދުވަހުގެ ޖަލްސާ ކުރިއަށް ގެންގޮސްގެން މެނުވީ ރައްޔިތުންގެ މަޖިލީހުގެ އެއްވެސް މަސައްކަތެއް ކުރިއަށް ނުގެންދެވޭނެ ކަމަށެވެ. އޭގެ ތެރޭގައި އިންތިހާބީ ރައީސް ހުވާ ކުރުމަށް ބާއްވަންޖެހޭ ޖަލްސާ ވެސް ހިމެނެ އެވެ.
"އިތުބާރު އޮތް ކަމަށްވާ ނަމަ ހަމަ ކުރިއަށް ގެންދަވަންވީ. އިތުބާރު ނެތް ކަމަށް ވަނީ ނަމަ މަޖިލީހުގެ ގަވާއިދުގައިވާ ގޮތަށް ރިޔާސަތު ބަދަލުކޮށްގެންނޭ ކުރިއަށް ގެންދެވޭނީ. ހުވާ ކުރުމުގެ ރަސްމިއްޔާތު އެ ނޫން ގޮތަކަށް ކުރިއަށްގެންދަވާ ކަމަށް ވަނީ ނަމަ އަޅުގަނޑުމެންނަށް ވަރަށް ދައްޗޭ ގާނޫނީ ގޮތުން ހުވާ ކުރައްވައިގެން ހުންނެވި ރައީސެއް ކަމުގައި ބަލައިގަންނަން، ލެޖިޓިމޭޓު ރައީސެއް ކަމުގައި ބަލައިގަންނަން. އެހެންވެއްޖެއްޔާ ސަރުކާރުން ކުރާ ހުރިހާ ކަމެއް ވެސް އެންމެ ކުޑަމިނުން ކެބިނެޓު ވެސް ބަލައިގަންނަން ވަރަށް ދަތިވާނޭ. ބަލައިނުގަންނާނަން، ސާފުކޮށް ދަންނަވަންޏާ،" އަސްލަމް ވިދާޅުވި އެވެ.
މުހިންމު ބައެއް ހަބަރުތައް
ދުވަހުގެ ފޮޓޯ
ދިވެހިރާއްޖޭގެ ފޮރިން މިނިސްޓަރު އަބްދުﷲ ޝާހިދު، ފަލަސްތީނުން ރާއްޖެއަށް ކަނޑައެޅި އޮނަރަރީ ކޮންސުލް ރާގިބް އަހުމަދު ހަލަފާއެކު އިއްޔެ ބޭއްވި ރަސްމިއްޔާތެއްގެ ތެރެއިން: ފަލަސްތީނުގައި އިޒްރޭލުން ގަތުލްއާންމެއް ހިންގައި، ބޮޑެތި ހަނގުރާމައިގެ ޖަރީމާތައް ހިންގަމުންދާއިރު ރާއްޖެ ރައްޔިތުން ގޮވާލަމުންދަނީ އިޒްރޭލު ޕާސްޕޯޓު މަނާ ކުރުމަށް -- ފޮޓޯ: ފޮރިން މިނިސްޓްރީ
