ވެނެޒުއޭލާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް އެމެެރިކާއިން ލުއިތަކެއް ދީފި އެވެ.
އެމެރިކާއިން ވެނުޒުއޭލާއަށް ލުޔެއް ދިނީ ބައިނަލްއަގްވާމީ އޮބްޒާވަރުންގެ ބައިވެރިވުމާ އެކު ޑިމޮކްރަޓިކް އިންތިހާބެއް ބޭއްވުމަށް ވެނެޒުއޭލާއިން އެއްބަސްވުމުންނެވެ.
ވެނެޒުއޭލާގެ ތެލާއި, ގޭސް އަދި ރަން އުފެއްދުމުގެ އިންޑަސްޓްރީތަކާ ދެކޮޅަށް އެމެރިކާއިން ދަތިކުރުމުގެ ފިޔަވަޅުތަކެއް ވަނީ އަޅާފަ އެވެ. މިނިވަން އިންސާފުވެރި އިންތިހާބެއް ބޭއްވުމަށް އެ ގައުމުގެ ސަރުކާރާއި އިދިކޮޅު ފަރާތްތަކުން އެއްބަސްވީ މިދިޔަ އަންގާރަ ދުވަހު އެވެ.
އެއާ އެކު އެމެރިކާއިން ވަނީ 2019 އިން ފެށިގެން އަޅާފައިވާ ބައެއް ފިޔަވަޅުތަކަށް ލުއިދީފަ އެވެ. އެގޮތުން, ކުރިއަށް އޮތް ހަ މަސް ދުވަހު ވެނެޒުއޭލާއިން ބޭނުންވާ މާކެޓުތަކަށް ތެޔޮ އެކްސްޕޯޓު ކުރުމުގެ ފުރުސަތު ވަނީ ފަހިކޮށްފަ އެވެ. ގޯލްޑް އެކްސްޕޯޓަށް ވަކި މުއްދަތެއް ދީފައި ނުވެ އެވެ.
އެއްވެ އުޅުމާއި ހިޔާލު ފާޅުކުރުމުގެ މިނިވަންކަމަށް ހުރަސް އަޅާތީ އަޅާފައިވާ ފިޔަވަޅުތަކަށް ލުއި ދީފައި ނުވެ އެވެ.
އިންތިހާބީ މަރުހަލާތަކަށް ހުރަސް އަޅައިފިނަމަ އަލުން އަނބުރާ ފިޔަވަޅުތައް ތަންފީޒު ކުރަން ފަށާނެ ކަމަށް އެމެރިކާއިން ވަނީ އިންޒާރު ދީފަ އެވެ. އޭގެ އިތުރުން, ގަވާއިދާ ހިލާފަށް ހައްޔަރުކޮށްފައިވާ އެމެރިކާގެ ރައްޔިތުންނާއި ވެނެޒުއޭލާގެ ސިޔާސީ ހައްޔަރީން ދޫކޮށްލުމަށް ވެސް އެމެރިކާއިން ވަނީ ގޮވާލާފަ އެވެ.
އެމެރިކާގެ ކުރީގެ ރައީސް ޑޮނާލްޑް ޓްރަމްޕްގެ ސަރުކާރުން ވެނެޒުއޭލާއާ ދެކޮޅަށް ހަރުކަށި ދަތިކުރުމުގެ ފިޔަވަޅުތަކެއް އެޅީ 2018 ގައި އެ ގައުމުގައި ބޭއްވި އިންތިހާބަކީ ސައްހަ ނޫން އިންތިހާބެއް ކަމަށް ކަނޑައެޅުމަށް ފަހު އެވެ.
