ފަލަސްތީނުގެ ހަމާސްއާ ދެކޮޅަށް ކުރާ ހަނގުރާމައިގައި އިޒްރޭލަށް އެހީތެރިވުމަށް އެމެރިކާއިން މަތިންދާ ބޯޓު އުފުލާ ދެ ވަނަ މަނަވަރެއް ފޮނުވަން ނިންމާފައިވާ ކަމަށް އެ ގައުމުގެ ޑިފެންސް ސެކްރެޓަރީ ލޮއިޑް އޮސްޓިން ވިދާޅުވެއްޖެ އެވެ.
އޮސްޓިން ވިދާޅުވީ އިޒްރޭލު ހިމެނޭ މެޑިޓެރޭނިއަން ކަނޑުގެ އިރުމަތީ ސަރަހައްދަށް މަނަވަރު ފޮނުވަން ނިންމީ އިޒްރޭލާއެކު ބާއްވާ ގާތް ވަރުގަދަ ގުޅުމާއި އިޒްރޭލުގެ ސަލާމަތަށް އެމެރިކާއިން އަހަމިއްޔަތު ދޭކަން ޔަގީންކަން ދިނުމަށް ކަމަށެވެ.
އިޒްރޭލާއި ހަމާސްގެ ހަނގުރާމަ މި އޮކްޓޯބަރު 7 ގައި ފަށާފައި ވާއިރު، ހަނގުރާމައިގެ ތިންވަނަ ދުވަހު އެމެރިކާއިން ވަނީ މި ވަގުތު ދުނިޔޭގައި އޮތް އެންމެ ބޮޑު މަތިންދާ ބޯޓު އުފުލާ މަނަވަރު ކަމަށްވާ 'ޔޫއެސްއެސް ޖެރާލްޑް އާރު ފޯޑު" އަދި އެ އުޅަނދުގެ ފުލީޓުތައް އިޒްރޭލު އައްސޭރިއަށް ފޮނުވައިފަ އެވެ.
މިހާރު ފޮނުވަން ނިންމީ "ޔޫއެސްއެސް ޑްވައިޓު އެއިސަންހަވާ" އާއި އެ މަނަވަރުގެ ފުލީޓުގައި ހިމެނޭ އުޅަނދުތަކެވެ.
މިއީ ހަނގުރާމަ އިތުރަށް ވަރުގަދަ ވިޔަ ނުދިނުމަށް މުހިންމު ނިންމުމެއް ކަމަށް އޮސްޓިން ވިދާޅުވި އެވެ.
މިއީ އިޒްރޭލަށް ދޭ ހަމަލާތައް ހުއްޓުވުމަށް އެމެރިކާއިން ވާ ތައްޔާރީއެއް ކަމަށް އޮސްޓިންގެ ބަޔާނުގައި ވިދާޅުވެފައި ވާއިރު، ލުބުނާނުގެ ހިޒްބުﷲ އަދި އީރާނުން ވަނީ ހަނގުރާމައިގައި އެމެރިކާ ބައިވެރިވެއްޖެ ނަމަ ބަދަލުގައި ހަމަލާދޭނެ ކަމަށް ބުނެފަ އެވެ.
ހޮނިހިރު ދުވަހު ފެށި ހަނގުރާމައިގައި މިހާތަނަށް ފަލަސްތީނުގެ 2،000 އަށްވުރެ ގިނަ މީހުން ޝަހީދުކޮށްލާފައި ވާއިރު، ގާޒާގެ އިތުރުން އިޒްރޭލުން ވަނީ ލުބުނާނަށާއި ސީރިއާއަށް ވެސް ހަމަލާދީފަ އެވެ. ލުބުނާނުގެ އަސްކަރީ މަރުކަޒަކަށާއި ސީރިއާގެ މައި ދެ އެއާޕޯޓަށް އިޒްރޭލުން ހަމަލާދީފައިވެ އެވެ.
