ރިޔާދު، ސައުދީ އަަރަބިއްޔާ (އޮކްޓޫބަރު 11) - ސައުދީ ޕްރޯ ލީގުގެ އަލް ނަސްރާ އެކު ހަދާފައިވާ ކޮންޓްރެކްޓު 2027އާ ހަމައަށް އިތުރުކުރަން ކްރިސްޓިއާނޯ ރޮނާލްޑޯ ބޭނުންވާކަން ހާމަކޮށްފި އެވެ.
ސައުދީ ލީގުގެ އަލް ނަސްރަށް ޕޯޗުގަލްގެ ކެޕްޓަން ރޮނާލްޑޯ ބަދަލުވީ 2022ގެ ޑިސެމްބަރު މަހުގަ އެވެ. އިނގިރޭސި ކުލަބު މެންޗެސްޓާ ޔުނައިޓެޑު ދޫކޮށް ރޮނާލްޑޯ އަލް ނަސްރަށް ބަދަލުވީ 75 މިލިއަން ޑޮލަރުގެ ޑީލެއްގަ އެވެ.
ރޮނާލްޑޯ، އަލް ނަސްރާ އެކު ހަދާފައިވާ ކޮންޓްރެކްޓް ހަމަވާނީ 2025ގަ އެވެ. ރޮނާލްޑޯ ބޭނުންވަނީ އިތުރު ދެ އަހަރަށް ކޮންޓްރެކްޓް އާކުރާށެވެ. ސައުދީ މީޑިއާތަކުން ރިޕޯޓްކުރާ ގޮތުން ރޮނާލްޑޯ ވަނީ އިންޓަނޭޝަނަލް ބްރޭކުގެ މެޗުތައް ކުޅުމަށް ޕޯޗުގަލް ޓީމާ ގުޅުމުގެކުރިން ކޮންޓްރެކްޓްގެ ވާހަކަ އަލް ނަސްރުގެ ވެރިންނާ ހިއްސާކޮށްފަ އެވެ.
އެ ގޮތުން، 2026ގެ ވޯލްޑް ކަޕްގެ ކުޅުމުގެ އުއްމީދުގައި ހުރި ރޮނާލްޑޯ ބޭނުންވަނީ ވޯލްޑް ކަޕަށް ފަހު ރިޓަޔާ ކުރާށެވެ. ރޮނާލްޑޯ ވޯލްޑްކަޕް ކުޅެން ބޭނުންވަނީ އަލް ނަސްރުގެ ކުޅުންތެރިއެއްގެ ގޮތުގައި ހުރެފަ އެވެ.
އެމެރިކާ، ކެނެޑާ އަދި މެކްސިކޯގައި ބާއްވާ ވޯލްޑް ކަޕު ކުޅޭއިރު ރޮނާލްޑޯ އަށް ވާނީ 41 އަހަރެވެ. ރޮނާލްޑޯ ވޯލްޑްކަޕްގައި ކުޅެފިނަމަ އޭނާ ވާނީ ވޯލްޑްކަޕްގައި ކުޅޭނެ ހަތަރު ވަނަ އަށް އެންމެ މުސްކުޅި ކުޅުންތެރިޔާ އަށެވެ. ރޮނާލްޑޯ، 38، ސައުދީގެ އަލް ނަސްރަށް ބަދަލުވެ އަންނަނީ ރަނގަޅު ކުޅުމެއް ދައްކަމުންނެވެ. މިހާތަނަށް ރޮނާލްޑޯ ވަނީ އެ ކުލަބަށް ކުޅުނު 30 މެޗުގައި 25 ގޯލު ޖަހާފަ އެވެ.
