އިޒްރޭލުގެ އަތް ދަށުން އަލް އަގްސާ މިސްކިތް މިނިވަން ކުރުމަށް ހަމާސް ޖަމާއަތުން ހޮނިހިރު ދުވަހު ފެށި ކުއްލި އޮޕަރޭޝަނާ ގުޅިގެން ހަމާސް ކުށްވެރި ކުރަން އެމެރިކާއިން ޕްރެޝަރު ކުރި ނަމަވެސް، އދ. ގެ ސަލާމަތީ މަޖިލީހުގެ ބައެއް މެމްބަރުން އެކަމާ ދެކޮޅު ހަދައިފި އެވެ.
އާދީއްތަ ދުވަހު ސިއްރުކޮށްގެން ބޭއްވި ސަލާމަތީ މަޖިލީހުގެ ބައްދަލުވުމުގައި އެމެރިކާއިން ޑިމާންޑު ކުރީ އެ މަޖިލީހުގެ މެމްބަަރު 15 ގައުމުން އެންމެ ހަރުކަށި އިބާރާތުން ހަމާސް ކުށްވެރި ކުރުމަށެވެ. އެކަމަކު ބައްދަލުވުން ނިންމާލީ އެކަމާ މެދު އެއްބަސްވުމެއް ނެތި އެވެ.
އެމެރިކާގެ ޑެޕިއުޓީ ސަފީރު ރޮބާޓް ވުޑް ވިދާޅުވީ ބައެއް ގައުމުތަކުން ހަމާސް ކުށްވެރި ކުރި ނަމަވެސް، ކައުންސިލްގެ ހުރިހާ މެމްބަރުން އެގޮތަށް އެއްބަސް ނުވި ކަމަށެވެ.
ރަޝިއާ އަދި ޗައިނާ ހިމެނޭ ގޮތަށް ބައެއް ގައުމުތަކުން ހަމާސްގެ ނަން ފާހަގަކުރަން ބޭނުމެއް ނުވި އެވެ. އެ ގައުމުތަކުން ބުނީ ދެ ފަރާތުން ވެސް އާންމުންނަށް ހަމަލާދިނުން ކުށްވެރި ކުރާ ކަމަށެވެ.
"އަޅުގަނޑުގެ ކޮމެންޓުގައި އޮންނާނެ ކުށްވެރިކޮށްފައި. އާންމުންނަށް ދޭ ހުރިހާ ހަމަލާއެއް ކުށްވެރި ކުރަމޭ،" ހަމާސްގެ ނަން ފާހަގަކުރަން ބޭނުންނުވުމުން އެމެރިކާއިން އަމާޒުކުރި ފާޑުކިޔުމާ ގުޅޭ ގޮތުން ރަޝިއާގެ ސަފީރު ވެސިލީ ނެބެންޒިއާ ވިދާޅުވި އެވެ.
އޭނާ ވިދާޅުވީ ރަޝިއާގެ މެސެޖަކީ ވަގުތުން ހަމަލާ ހުއްޓާލުން މުހިއްމު ކަމާއި، މާނަހުރި ގޮތެއްގައި މަޝްވަރާކޮށް، ހައްލު ހޯދުން ކަމަށެވެ.
ޗައިނާގެ ސަފީރު ޖަންގް ޖުން ވެސް ވިދާޅުވީ އާންމުންނަށް ދޭ ހުރިހާ ހަމަލާއެއް ކުށްވެރި ކުރާ ކަމަށެވެ.
"އެންމެ މުހިއްމު ކަމަކީ ހާލަތު އިތުރަށް ގޯސްވިޔަ ނުދީ އާންމުންގެ ފުރާނަ ސަލާމަތްކުރުން. ވަކިން ހާއްސަކޮށް މުހިއްމު އެއް ކަމަކީ ދެ ދައުލަތް ގާއިމް ކުރުމުގެ ހައްލަށް އެނބުރި އައުން،" އޭނާ ވިދާޅުވި އެވެ.
ޗައިނާއިން ފާހަގަކުރި ގޮތަށް ދެ ދައުލަތް ގާއިމްކުރުމުގެ ހައްލު އިސްކުރުމާ މެދު ނޫސްތަކުން ސުވާލު ކުރުމުން އެމެރިކާ ސަފީރު ވުޑް ވިދާޅުވީ މި ވަގުތު މުހިއްމީ ހަމާސް ކުށްވެރި ކުރުން ކަމަަށާއި މަޝްވަރާތައް ފެށުން ފަސްކުރެވިދާނެ ކަމަށެވެ.
"އެކަމަށް ވަގުތެއް އޮންނާނެ. މި ވަގުތު އެންމެ މުހިއްމީ، މީހުން ރަހީނު ކުރުން ހުއްޓުވައި، ހަމާސްގެ ޖަރީމާ ހުއްޓުވުން. މި ކަންކަން ކުރަން ޖެހޭނީ މި ތަރުތީބުން."
ޗައިނާއިން ބުނީ ސަލާމަތީ މަޖިލީހުގެ އަޑު ދުނިޔެއަށް އިއްވުން މުހިއްމު ކަމަށެވެ. އެކަމަކު ގައުމުތަކަށް އެއް ގަލަކަށް ނޭރުމުން އާދީއްތަ ދުވަހުގެ ބައްދަލުވުމަށް ފަހު ބަޔާނެއް ނުނެރެ އެވެ.
